LEKTIONA 05
I bibla hi o Debleskro liil ap mende
O Jehowah das menge i bibla. I bibla hi jek liil, hoi pes dran 66 tikne lila khetne tchiwella. Bud putchenn pen: Koon tchinas i bibla? Konestar well li tchatchepah? Rakras kanna pral kowa, har mer ko liil o Deblestar lam.
1. Te tchinan menshe i bibla, har nai well li o Deblestar?
Ninna kai was i bibla ca. 40 morshendar dran bud themma, an ca. 1 600 bersha tchinlo (1530 glan i Christeste - ca. 98 pal i Christeste), hi li jaake, har te wals li dran jek wast kerdo. Har djal kowa? I bibla hi o lab o Deblestar (Dik pal an 1. Tessalonikarja 2:13). I tchinepangre tchinan gar pre, hoi jon kaman, jon tchinan kowa pre, “hoi o Dewel lenge penas” (2. Petro 1:21). O Dewel las peskro ducho a un tchiwas kowa, hoi job menge kamell te penell, an lengro dji (2. Timoteo 3:16).
2. Koneske hi i bibla mishto?
An “haki natsjona, haki harmenatsjona, hako rakepen un hake themma” dell i bibla. Lakro latcho lab hi hakeneske mishto (Dik pal an Debleskro Tsiro 14:6.). O Dewel mukas te well, kai was i bibla an budeder tchipja tchinlo. Kek wawar liil della an jaake bud tchipja. Jaake haiwah: Hakeneske nai well i bibla mishto. Hi jek, kai i mensho djiwella: Hakenes nai well i bibla.
3. Har das o Jehowah garda ap i bibla?
I bibla was ap koowa har ledera un papyrus tchinlo, hoi pal i tsiro paash djala. O kamlepen bud morshendar his jaake baro, kai tchinan jon i bibla pengre wastentsa tele, te atchell li. Ap koi jek rig dan menshe, kai kaman, te dell i bibla buder gar ap i phub. Ap i wawar rig dan ninna wawar, kai dan pengro djipen, te atchell i bibla menge. O Jehowah mukell pes kekestar te stopprell, te rakrell lo mentsa. An i bibla hi tardo: “O rakepen o baro Deblestar kowa atchell hako tsireske” (Jesaja 40:8).
RODAS DUREDER
Kanna dikeh, har o Dewel peskro lab an i menshengre djia tchiwas, har job ap i bibla garda das un har job kras, te nai well hakenes i bibla.
4. I bibla penell pestar, koon lat tchinas
Te dikan o VIDEO, palle dikenn pal an 2. Timoteo 3:16, un rakrenn khetne pral:
-
Har nai well i bibla o Debleskro lab, te was li menshendar tchinlo?
-
Hoi penals tu: Nai patsell jek kowa, kai dell o Dewel menshen kowa an o shero, hoi job menge kamell te penell?
Te kamell i rai i liil te tchinell, penell lo ap i tchinepaskreste, hoi te tchinell lo pre. Jaake hi kowa ninna pash i bibla. Ninna te was i bibla tchinepangrendar tchinlo, hi li o liil o Deblestar
5. I bibla atchas an hako tsiro
Te well i bibla o Deblestar, palle hunte dell lo ninna garda ap late. Kote dan pale un pale menshe, kai kaman, te dell i bibla buder gar ap i phub. Pralstune an i kangri kran bisemake, te haiwenn i menshe gar, hoi i bibla tchatchepah penella. Bud wawar kaman, te atchell i bibla. Fothe moldo lenge i bibla his, dikan jon o merepen an i jak. An ko Video well pral sawo morsheste rakedo. Te dikan o VIDEO, rakrenn khetne pral:
-
Kanna, kai djineh, hoi halauter kerdo was, te atchell i bibla: Motivierell tut kowa, te draweress budeder an i bibla? Hoske peneh tu kowa?
Dikenn pal an Gilja 119:97, un rakrenn khetne pral:
-
Hoske kaman jaake bud pengro djipen te dell, te atchell i bibla?
6. I liil hakeneske
Ap i tseli phub dell kek wawar libro an jaake bud tchipja, har i bibla. Dikenn pal an Bitchepangre 10:34, 35, un rakrenn khetne pral:
-
Hoske kamell o Dewel, te well i bibla an jaake bud tchipja tchinlo?
-
Hoi hi tuke ap i bibla shukar?
Sigo
100 %
i menshendar ap i phub
nai len i bibla an i tchip, hoi jon haiwenna
I bibla dell an budeder har
3 000
tchipja
tseles un ninna an kotja
5 000 000 000
kope — jaake penenn le kowa — was i bibla kerdo,
bud kope budeder, har hako wawar libro
BUD PENENNA: “I bibla was i menshendar tchinlo.”
-
Hoi penals tu?
-
Hoi sikrella, kai hi i bibla o Debleskro lab?
HOI KATE PENLO WAS
I bibla hi o liil o Deblestar ap mende. Job kras, te nai well hakenes i bibla.
Hoi penals tu?
-
Hoi well kol labentsa penlo, kai “tchiwas” o Dewel lauter an kolengre djia, kai tchinan i bibla?
-
Hoi kras an kaja lektiona, kai was i bibla an tire jaka budeder moldo?
-
Hoi well an tiro dji, kanna, kai djineh, kai kras o Dewel jaake bud, te nai rakrell lo tuha?
BUDEDER
Kate hi pral i biblakri historia tchinlo — Kola original liila un o tchinepen an wawar tchipja.
Kate hatseh, har i bibla pal lino was un har joi atchas.
Kate shuneh, hoi menshe riskieran, te nai tchinenn le i bibla an wawar tchipja.
I bibla was bud kope tele tchinlo un an wawar tchipja tchinlo. Kate nai drawereh, hoske mer nai patsah, kai atchas o biblakro lab.
“Was i bibla manipulieredo? Atchas o lab?” (I artikla online)
a An i Lektiona 07 well sikedo, kai hi o Debleskro ducho i Debleskri soor, hoi job lella, te well tchomone kerdo.
