LESEN 05
Baibel Em Tok Bilong God i Kam Long Yumi
Jehova i givim yumi Baibel. Em wanpela gutpela presen i gat 66 liklik buk long en. Tasol ating yu laik save: ‘Baibel i kamap olsem wanem? Husat i as bilong ol tok bilong en?’ Bilong bekim ol dispela askim, yumi bai stori long hau tok bilong God long Baibel i kam long yumi.
1. Sapos ol man i raitim Baibel, hau na God i As bilong ol tok bilong en?
Inap olsem 40 narapela narapela man i bin raitim Baibel insait long 1,600 yia, kirap long yia 1513 B.C.E. i go inap long 98 C.E. samting. Na ol dispela man i bilong kain kain bekgraun. Maski i olsem, olgeta tok bilong Baibel i stret wantaim. Hau na dispela i kamap? Long wanem, God yet i As bilong ol tok bilong Baibel. (Ritim 1 Tesalonaika 2:13.) Ol man i raitim Baibel ol i no raitim tingting bilong ol yet, nogat, “holi spirit i kirapim ol long autim ol tok God yet i bin givim long ol.” a (2 Pita 1:21) God i yusim holi spirit bilong em long givim tingting, o kirapim, ol man long raitim ol tingting bilong em.—2 Timoti 3:16.
2. Husat inap kisim Baibel?
Ol man bilong “olgeta kantri, long olgeta traib, long olgeta tokples na long olgeta lain pipol” inap kisim helpim long gutnius i stap long Baibel. (Ritim Revelesen 14:6.) God i stiaim ol samting bambai Baibel i stap long planti tokples winim olgeta narapela buk. Klostu olgeta man inap kisim Baibel. Dispela em tru maski ol man i stap long wanem hap o ol i mekim wanem tokples.
3. Olsem wanem Jehova i lukautim Baibel na i no bagarap?
Ol man i raitim ol tok bilong Baibel long ol samting we i no inap stap longpela taim, olsem pepa ol i wokim long pitpit. Tasol ol man husat i laikim Baibel ol i kopim gut na mekim kopi gen long han. Na tu, maski sampela bikman i traim long pinisim wok bilong Baibel, sampela narapela i redi long dai bambai ol i ken seivim Baibel. Jehova i no inap larim wanpela man o wanpela samting i pasim em long toktok wantaim yumi. Baibel i tok: “Tok bilong God bilong yumi i save stap oltaim oltaim.”—Aisaia 40:8.
KISIM SAMPELA SAVE MOA
Kisim sampela save moa long hau God i yusim holi spirit long givim tingting long ol man i raitim Baibel, lukautim gut na i no bagarap, na hau em i stiaim ol samting na bai ol man long olgeta hap inap ritim Baibel.
4. Baibel i kamapim klia husat i As bilong ol tok bilong en
Pilaim VIDIO. Bihain ritim 2 Timoti 3:16, na stori long ol dispela askim.
-
Sapos ol man i raitim Baibel, wai na yumi kolim olsem Tok Bilong God?
-
Yu ting i stret long bilip olsem God i givim tingting bilong em long ol man em ol i raitim Baibel?
Wanpela seketeri i raitim pas, tasol ol tok bilong pas i kam long man i givim tingting long em long raitim. Olsem tasol, ol man i raitim Baibel, tasol tok bilong en i kam long God
5. Baibel i abrusim bagarap
Baibel em buk bilong God, olsem na em i lukautim gut. Kirap long bipo yet, sampela bikman i traim long bagarapim Baibel. Ol bikman bilong lotu i traim long haitim Baibel. Tasol maski i gat pasin birua na ol man i tok long kilim i dai ol man i tanim ol tok bilong Baibel, planti man i redi long dai long lukautim Baibel. Bilong kisim save long wanpela bilong ol, pilaim VIDIO, na stori long ol dispela askim.
-
Taim yu save long bikpela wok ol man i mekim bilong lukautim Baibel na bai i no bagarap, dispela i mekim na yu amamas long ritim? Wai?
Ritim Buk Song 119:97, na stori long dispela askim:
-
Wanem samting i kirapim planti man long trensletim na tilim Baibel maski ol man inap kilim ol i dai?
6. Wanpela buk bilong olgeta man
Baibel em wanpela buk we ol man i bin trensletim na tilim planti tru winim olgeta narapela buk. Ritim Aposel 10:34, 35, na stori long ol dispela askim:
-
Wai na God i laik ol i mas trensletim Baibel long planti tokples na tilim long olgeta hap?
-
Dispela lesen i stori long Baibel, so yu laikim wanem samting long en?
Klostu
100%
bilong populesen bilong graun
inap kisim Baibel long wanpela tokples em ol i save long en
Em i stap long winim
3,000
tokples
long Baibel olgeta o sampela hap bilong en
5,000,000,000
Namba bilong ol kopi bilong Baibel ol i wokim,
em i winim tru olgeta narapela buk
SAMPELA MAN I TOK: “Baibel em wanpela olpela buk tasol em ol man i raitim.”
-
Yu ting wanem?
-
Wanem evidens i soim olsem Baibel em Tok Bilong God?
OL BIKPELA POIN
Baibel em Tok Bilong God, na God i stiaim ol samting na bai ol man long olgeta hap inap ritim Baibel.
Riviu
-
Taim yumi tok holi spirit bilong God i givim tingting long ol man long raitim Baibel, dispela i makim wanem samting?
-
Long ol samting yu lainim long dispela lesen, yu kirap nogut long wanem samting long Baibel?
-
Yu pilim olsem wanem taim yu save olsem God i stiaim gut ol samting bambai em inap toktok wantaim yu?
MEKIM WOK PAINIMAUT
Ritim stori long histori bilong Baibel—kirap long fes manuskrip i kam inap long ol Baibel bilong nau.
Kisim save long hau Baibel i bin abrusim tripela bikpela hevi.
Lukim ol samting ol man i mekim bilong trensletim Baibel maski ol inap dai.
Ol i bin mekim kopi long Baibel na trensletim planti taim. Hau bai yu save tru olsem ol tok bilong en i no bin senis?
“Yu Ting Ol i Bin Senisim o Paulim Tok Bilong Baibel?” (Atikol long websait)