DYONDZO 05
Bibele Yi Ni Mahungu Lama Humaka Eka Xikwembu
Yehovha u hi nyike nyiko ya risima ku nga Bibele, leyi endliweke hi tibuku ta 66. Kambe u nga ha tivutisa: ‘Bibele yi huma kwihi? Yi tsariwe hi mani?’ Leswaku hi hlamula swivutiso leswi, a hi kambisiseni leswaku hi ma kume njhani mahungu lama humaka eka Xikwembu lama nga eBibeleni.
1. Leswi Bibele yi tsariweke hi vanhu swi ta njhani hi ku yi huma eka Xikwembu?
Bibele yi tsariwe hi vanhu va kwalomu ka 40 naswona yi teke kwalomu ka malembe ya 1 600 leswaku yi hetiwa ku sukela hi 1513 B.C.E. ku ya eka va-98 C.E. Vatsari va yona a va huma eka mindhavuko yo hambanahambana kambe ya pfumelelana. Hikwalaho ka yini yi nga kanetani? Hikuva Bibele yi huma eka Xikwembu. (Hlaya 1 Vatesalonika 2:13.) Vatsari va yona a va nga tsali leswi humaka eka vona. Kambe “a va vulavula leswi humaka eka Xikwembu va kongomisiwa hi moya lowo kwetsima.” a (2 Petro 1:21) Xikwembu xi tirhise moya lowo kwetsima leswaku xi pfuna vavanuna volavo va tsala mianakanyo ya xona.—2 Timotiya 3:16.
2. Bibele yi endleriwe vamani?
Mahungu lamanene lama nga eBibeleni ma nga pfuna “matiko hinkwawo, tinyimba hinkwato, tindzimi hinkwato ni vanhu hinkwavo.” (Hlaya Nhlavutelo 14:6.) Xikwembu xi endle leswaku Bibele yi kumeka hi tindzimi to tala ku tlula tibuku hinkwato ematin’wini. Namuntlha vanhu vo tala va na yona Bibele, ku nga khathariseki leswaku va vulavula ririmi rihi kumbe va tshama kwihi.
3. Yehovha u yi sirhelele njhani Bibele?
Bibele a yi tsariwe eka swilo leswi a swi ta onhaka hi ku famba ka nkarhi swo tanihi dzovo ni papirasi. Kambe vavanuna lava a va rhandza Bibele va yi kope hi vukheta. Hambileswi vafumi van’wana ni varhangeri va vukhongeri a va lava ku herisa Bibele kambe van’wana a va tiyimisele hambi ku ri ku fa leswaku va sirhelela Bibele. Yehovha a nge pfumeleli munhu kumbe nchumu wo karhi wu n’wi sivela ku vulavula na hina. Bibele yi ri: “Rito ra Xikwembu xa hina ri tshama hilaha ku nga heriki.”—Esaya 40:8.
ANAKANYISISA
Dyondza swo tala hi ndlela leyi Xikwembu xi tirhiseke vanhu ku tsala Bibele, ndlela leyi xi yi sirheleleke ha yona ni ku endla leswaku vanhu va yi kuma.
4. Bibele ya boxa leswaku yi huma kwihi
Tlanga VHIDIYO. Kutani u hlaya 2 Timotiya 3:16, ivi mi bula hi swivutiso leswi landzelaka.
-
Leswi Bibele yi tsariweke hi vanhu, hikwalaho ka yini yi vitaniwa Rito ra Xikwembu?
-
Xana wa tshemba leswaku Xikwembu a xi byela vatsari va Bibele leswi a va fanele va swi tsala?
Matsalana a nga ha komberiwa ku tsala papila hi muthori wakwe kambe rungula leri a ri tsaleke a ri humi eka yena, ri huma eka muthori wakwe. Hilaha ku fanaka, Bibele yi tsariwe hi vanhu kambe rungula ra yona ri huma eka Xikwembu
5. Bibele yi pone mihlaselo yo tala
Swa fanela ku va Xikwembu xi sirhelela Bibele hikuva yi huma eka xona. Vafumi va ringetile ku herisa Bibele. Varhangeri va vukhongeri va ringetile ku yi tumbeta. Vanhu vo tala va veke vutomi bya vona ekhombyeni leswaku va sirhelela Bibele hambileswi a va kanetiwa va tlhela va xungetiwa hi ku dlayiwa. Leswaku u kuma swo tala hi un’wana wa vanhu volavo, tlanga VHIDIYO, ivi mi bula hi swivutiso leswi landzelaka:
-
Leswi u tivaka matshalatshala lama endliweke leswaku ku sirheleriwa Bibele, xana swi ku endla u lava ku yi hlaya? Hikwalaho ka yini u vula tano?
Hlaya Pisalema 119:97, ivi mi bula hi xivutiso lexi:
-
I yini lexi endleke leswaku vanhu vo tala va veka vutomi bya vona ekhombyeni hi ku hundzuluxela Bibele ni ku tlhela va endla leswaku van’wana va yi kuma?
6. Buku ya vanhu hinkwavo
Bibele i buku leyi hundzuluxeriweke ni ku tlhela yi kumiwa hi vanhu vo tala ku tlula tibuku letin’wana hinkwato ematin’wini. Hlaya Mitirho 10:34, 35, ivi mi bula hi swivutiso leswi landzelaka:
-
Hikwalaho ka yini Xikwembu xi lava leswaku Rito ra xona ri hundzuluxeriwa ri tlhela ri kumiwa hi vanhu vo tala?
-
I yini lexi ku tsakisaka hi Bibele?
Vanhu va kwalomu ka
100
wa tiphesente emisaveni hinkwayo
va na yona Bibele hi ririmi leri va ri twisisaka
Ya kumeka hi tindzimi to tlula
3 000
yi helerile kumbe yi nga helelanga
Ku kandziyisiwe Tibibele ta kwalomu ka,
5 000 000 000
ku nga nhlayo leyi tlulaka tibuku hinkwato
VAN’WANA VA RI: “Bibele ko va buku ya khale leyi tsariweke hi vanhu.”
-
Wena u ri yini?
-
I yini lexi kombisaka leswaku Bibele i Rito ra Xikwembu?
NKATSAKANYO
Bibele i Rito ra Xikwembu naswona xi endle leswaku vanhu hinkwavo va kota ku yi kuma.
Mpfuxeto
-
Swi vula yini loko hi ku Xikwembu xi tirhise vanhu ku tsala Bibele?
-
I yini leswi ku hlamarisaka hi ndlela leyi Bibele yi sirheleriweke ha yona, ndlela leyi yi hundzuluxeriweke ha yona ni ndlela leyi vanhu va yi kumeke ha yona?
-
U titwa njhani hi matshalatshala lawa Xikwembu xi ma endleke leswaku xi kota ku vulavula na wena?
KUMA LESWI ENGETELEKEKE
Hlaya hi ndlela leyi Bibele yi tsariweke ha yona ku suka eka matsalwa ya khale ku ya eka vuhundzuluxeri bya manguva lawa.
“Ndlela Leyi Bibele Yi Poneke Ha Yona Ku Fikela Namuntlha” (Xalamuka!, November 2007)
Hlaya hi ta ndlela leyi Bibele yi poneke mihlaselo yinharhu leyikulu ha yona.
“Ndlela Leyi Bibele Yi Poneke Ha Yona” (Xihondzo xo Rindza No. 4 2016)
Vona ndlela leyi van’wana va vekeke vutomi bya vona ekhombyeni ha yona leswaku va hundzuluxela Bibele.
Bibele yi kopiwile yi tlhela yi hundzuluxeriwa ko tala. U nga tiyiseka njhani leswaku mahungu lama nga eka yona a ma cinciwanga?
“Xana Bibele Yi Cinciwile?” (Nhlokomhaka leyi kumekaka eka website)
a Hilaha swi nga ta hlamuseriwa hakona eka dyondzo 07, moya lowo kwetsima i matimba lama Xikwembu xi ma tirhisaka.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
