Jeofa hã kado po maa de woore ne naa ga diŋ Bible.—Ɓil ɓe ni mono, naa da’ kefder wo ni me’ me’ hãã 66. Maapo ndo wii ba jag see ɓo yaŋ ga: ‘Bible a le gen là? Yern diŋ woselà?’ Maa yiŋ jag ti wiigi jag sen wo mono, daga naa mo wãã ti ɗeŋ maaga leder sen a le age la mo ɗa.

1. Hayga yer Bible diŋ jar téebeere wo lay, wer mayse ga à wãã ga á diŋ wããre Baa là?

Yer kefder se ɓil Biblen diŋ jar téebeere po wo 40 de ti, à joŋ kiŋgi yerge ɓe 1600 de ti, à tĩĩ wer yerge ɓe le nen kiŋgi maa 1513 taŋgu wur maa ni naa no, se wo go ɓo’ jag nen kiŋgi maa 98 nen wur maa ni naa no. Koh ba de maaga jar yerge ɓen hay wo mbaara sar sar laybla mono (jar maa po hay wo diŋ jar koɗ horog wo, maa po hay wo diŋ jar bag cẽẽ wo, maa po hay wo diŋ waŋre wo), wããre ɓaaran wãã diŋ ti mopo boŋ ɓuy tu . Sen hay joŋ na joŋge là? Sen diŋ werga wããre sen a le diŋ jag Baa (Jaŋ 1 Tesalonig wo 2:13). Jar yerge ɓen hay yer wo bay diŋ ɗiggi ɓaara wa. Amaa kay ra maa ‘siɗ wããre Baa diŋ nenterse ma bay ɗag’ no a (2 Piyer 1:21). Baa joŋ joŋre de nenterse ɓe maa bay ɗagn nen maaga jar sen mo ko wo ɗiggi se day mo yer wo ne.—2 Timote 3:16.

2. À yer Bible diŋ maa kay wose wo là?

Á yer wããre maa de cõõre maa ɓil Biblen diŋ maa kay “wer jar [ . . . ] ɓuy, ɓiini jar [ . . . ] ɓuy, jag jar ɓuy, ngaɓa jar ɓuy” (Jaŋ Naage nene 14:6). Wara Bible go de ferge de wer jag wo pur de daŋ kefder lan wo ɓuy. Jar wara ngaɓa jaŋ wo Wããre Baa de jag ɓaara daŋge ɓuy.

3. Jeofa joŋ joŋge maaga Bible mo caa wer go wa là?

Bible hay de yerge diŋ ɓil kefder po maaga ig wo blag ge go ga, doo hõõge wo de papyrus wo. Jar maaga hay wo da Wããre Baa yer wo ne go ti kefder maa tigriŋ wo ngaɓa debaŋ. De maaga jar kluuri sir maa po wo, jar kluuri maa peel tiŋ-Baa maa po hay ɗig wo ga saara mo caa wer Bible go mono, jar maa po hã wo see ɓaara go maaga à mo caa wer ɓe go wa. Jeofa laa men jobo noga mopo go maŋ jag ɓe ndalge de naa ga. Bible wãã ga: “Wããre mani Baa naa joŋ ge mbe yaŋ wo tum sag sage.”—Esayi 40:8.

 FRUGGI NEN HADGE NO

5. Bible yãã go jag re po wo

 6. Kefder maa jar ɓuy

Bible diŋ kefder maaga daŋ go de ferge de jag puri, day go de ɓesge debaŋ ti tamsir lay mono. Jaŋ Joŋre 10:34, 35, ni ndal wee ti wiigi jag maa blam wo la no:

• Wer may ga Baa da ga naa mo fer Wããre sen go de wer jag puri, day ni naa mo ɓesn go ne jar là?

• Mayse co jag ɓo yoo fẽẽre maaga à ngaɓ ti Bible wo mo ta’ la là?

 KLUURI HADGE NO

Bible diŋ Wããre Baa, day Baa dur nen maaga á mo hay go de dusgi wara ne jar ɓuy.

Ferge ko nen hadge no

• Maaga à wãã ga Baa hã ẽgre nenterse ɓe maa bay ɗagn ne jar téebeere wo maa yer Bible mono, á da wããge na ga hãylà?

• Maaga hãã wara Bible yaŋ kay ɗa, go de ferge wer jag puri, go de dusgi wer ngaɓa lay mono, mayse ngris mo ni là?

• Maaga Baa dur debaŋ ga se mo ndal de ɓo mono, á joŋ see mo na joŋge là?