Yehova oonivaha etthu ya efaita yinceene, Biibiliya. Nto Biibiliya orina iliivuru 66 saamukhaani. Woonasa wene, nyuwo munniikoha so: ‘Biibiliya okhumme woowi? Tani ori mwaneene Biibiliya?’ Wira naakhule makoho awo, nrowe niwehe moota Biibiliya ophiyale awe mpakha hiyo.

1. Okhala wira Biibiliya olempwale ni atthu, xeeni ohimyaka wira Nuulumo na Muluku?

Biibiliya olempwale ni alopwana 40 ni soovira iyaakha 1600 olempwaka. Eliivuru yoopacerya yaalempwale 1513 Kristu ohinatthi orwa, eliivuru yookiserya elempwale mwaakha 98 nuumala Kristu orwa. Alopwana yaamulepa Biibiliya yaari a makhalelo oovirikana. Akina yaari amakampusi, akina yaatotha ihopa ni akina yaari mamwene. Hata vaari siiso, itthu yaalempe aya sinnivarihana. Vaaweryaneyale sai eyo wiiraneya? Mwaha woowi, Muluku tori mwaneene Biibiliya. (Mmusome 1 aTesaloonika 2:13.) Alopwana ale yaamulepa Biibiliya khahiyo wira yaalepa muupuwelo aya. Ohiya-vo, awo “yaahilavula moolumo a Muluku, yeettihiwaka ni munepa woowaarya”. a (2 Pedru 1:21) Tthiri Muluku aahirumeela munepa awe woowaarya wira owiirihe alopwana awo olepa muupuwelo awe.—2 Timootheyo 3:16.

2. Tani anittottela mureerelo muhupi wa Biibiliya?

“Atthu a maloko otheene, ni a mahimo otheene, ni a mattaava otheene, ni a makhuli otheene” annittottela mureerelo ihapari sooreera siri mBiibiliyani. (Mmusome Wiisuupulula 14:6.) Olelo-va, Biibiliya onniphwanyaneya mattaava manceene ovikana iliivuru sikina. Tthiri Muluku tiirinhe wiiraneya eyo. Nto atthu otheene molumwenkuni anoowerya omusoma Biibiliya, moohicikha nttaava anilavula aya aahiiso elapo anikhala aya.

3. Yehova omukhapelenle sai Biibiliya?

Biibiliya aalempwale sirumeeliwaka itthu sowaakuva ohononeya. Nto vaweryaneyale sai Biibiliya ophiya mpakha olelo-va? Alopwana yaasiveliwa Nuulumo na Muluku yaahikopiyari ni matata ikwaha sinceene ni yaanivaha ephoole yuulupale okathi yaakopiyari aya. Muxankiho mukina okhala wira atthu akina yaarina owerya yaahiimananiha ommala-maliha Biibiliya. Masi hata vari siiso yaahikhala atthu yaalenve okumi aya wira amukhapelele Biibiliya. Tthiri vannooneya wira Yehova aahikhapelela Nuulumo nawe ni khaamweemerenrye mutthu wala etthu emuhiihaka orumeela Nuulumo nawe wira olavule ni hiyo. Eyo ennivarihana ni ele Biibiliya onihimya awe oriki: “Masu a Muluku ahu annikhala mahiku othene”.—Yesaya 40:8.

 MWIIXUTTE ITTHU SIKINA

5. Atthu anceene yaaniphavela ommala-maliha Biibiliya, masi owo ohoopowa

 6. Eliivuru ya atthu otheene

Biibiliya eliivuru ehireere otaphuleliwa ni okaiwa olumwenku wotheene. Musome Miteko 10:34, 35, nuumala-vo mwaakhule makoho anittharelana:

• Xeeni Muluku oniphavela awe wira Nuulumo nawe nitaphuleliwe ni okaiwa mattaava manceene?

• Etthu xeeni enoosivelani vanceene voohimya sa Biibiliya?

 IPONTO SUULUPALE

Biibiliya, Nuulumo na Muluku ni owo ohiiriha wira atthu otheene awerye okhalana Biibiliya.

Wuuluula

• Biibiliya onihimya wira Muluku aahaaruma atthu omulepa Biibiliya. Eyo enitaphulela exeeni?

• Etthu xeeni enoosivelani vanceene voohimya sa otaphuleliwa ni okaiwa Biibiliya?

• Exeeni yoosivenleni mwaha wa Biibiliya owerya woopowa hata atthu anceene yaimananinhe ommala-maliha? Munoonela sai vano musuwenle anyu wira Muluku ohiimananiha wira oosuweliheni Nuulumo nawe?