GURUY NI 05
Thin rok Got e Bay u Bible
Bay reb e tow’ath nrib manigil ni ke pi’ Jehovah ngodad ni aram e Bible. Nel’ i ragag nge nel’ ken e babyor ni bay u lan e Bible. Machane sana rayog ni nge lungum u wan’um: ‘Uw e ke yib e Bible riy? Ma thin rok mini’ e bay riy?’ Ra ngad nanged e fulweg ko gal deer ney, mab t’uf ni ngad weliyed rogon ni ke yag ni nge taw e thin rok Got u lan e Bible ngodad.
1. Faanra girdi’ e ke yoloy e Bible, me ere mang fan nrayog ni nga dogned ni thin rok Got e bay riy?
Sogonap’an 40 e pumoon nra yoloyed e Bible u lan sogonap’an 1,600 e duw ni tabab ko duw ni 1513 B.C.E. nge yan i mada’ nga bang ko duw ni 98 C.E. Yugu aram rogon nib thilthil e piin nra yoloyed, machane dariy reb e thin riy nib togopuluw nga reb. Mang fan? Bochan ni thin rok Got e bay riy. (Mu beeg e 1 Thessalonika 2:13.) Pi n’en nra yoloyed nga but’ e gathi lem rorad, ya gelngin Got nib thothup e yib i ying ngorad “ngar weliyed e thin ni ke yib rok Got.” a (2 Peter 1:21) I fanay Got gelngin nib thothup ni nge thagthagnag e thin rok nga laniyan’ e pi girdi’ ney ngar yoloyed nga but’.—2 Timothy 3:16.
2. Mini’ e rayog ni nge yib angin e thin nu Bible ngak?
Ke yog Got ni “urngin e pi nam, nge ganong nge thin nge gubin mit e girdi’” nrayog ni nge yib angin ngorad e thin nib fel’ ni bay u Bible. (Mu beeg e Revelation 14:6.) Ngiyal’ ney e boor mit e thin ni kan pilyeg e Bible ngay ma dariy ba ken e babyor ni aram rogon. Ba dake gubin e girdi’ e ngiyal’ ney nrayog ni ngar beeged e Bible ni yugu demtrug e gin yad ma par riy ara thin rorad.
3. Uw rogon ni ke ayuweg Jehovah e Bible ni nge par ni ka rogon?
Ni yoloy e Bible nga daken yungi babyor nib mom ni nge kireb. Machane piin nib ga’ fan e Bible u wan’rad e ur abweged e thin riy nga yugu boch e babyor ni yad be yoloy nga pa’rad. Yugu aram rogon ni bay boch e girdi’ nib ga’ lungurad nra guyed rogon ni ngar kirebnaged e Bible, machane bay boch e girdi’ nra ted e yafos rorad nga thatharen e riya’ ni ngar ayuweged ndab ni kirebnag. De pag Jehovah be’ ara ban’en ni nge taleg e girdi’ ndab ra beeged e Bible. Be gaar e Bible: “Thin rok Somol e bay i par ndabi m’ay biid.”—1 Peter 1:24, 25.
KUM FIL BOCH BAN’EN U MURUNG’AGEN
Kum fil boch ban’en u rogon ni thagthagnag Got nga laniyan’ e girdi’ ni ngar yoloyed e Bible, me ayuweg ni nge par ni ka rogon, me n’igin ni nge yag ni beeg urngin e girdi’.
4. Be tamilangnag e Bible rarogon e En ni Thin Rok e bay riy
Mu yaliyew e re VIDEO ney. Ngemu’ mi gimew beeg e 2 Timothy 3:16, mi gimew weliy e fulweg ko gal deer ni baaray.
-
Faanra girdi’ e ke yoloy e Bible, me ere mang fan ni yima yog ni Thin rok Got?
-
Uw rogon u wan’um e re n’ey?
Rayog ni nge yog be’ boch e thin ngak be’ ni nge yoloy nga babyor. Ere ku arrogon e Bible ni yugu aram rogon ni girdi’ e ra yoloyed, machane thin rok Got e bay riy
5. Ke par e Bible ni ka rogon ni yugu aram rogon ni kan guy rogon ni ngan kirebnag
Faanra ke yib e Bible rok Got, ma gad manang nra ayuweg ni nge par ni ka rogon. Kab kakrom i yib ni ke guy boch e girdi’ nib ga’ lungurad rogon ni ngar kirebnaged e Bible. Ma pi tayugang’ ko teliw e kar guyed rogon ndabi nang e girdi’ e thin riy. Boor e girdi’ nra ted e yafos rorad nga thatharen e riya’ ni ngar ayuweged ndab ni kirebnag ni yugu aram rogon ni un togopuluw ngorad. Mu yaliyew e re VIDEO ney ni murung’agen bagayad e pi girdi’ nem, mi gimew weliy e fulweg ko gal deer ni baaray.
-
Ga baadag ni ngam beeg e Bible e chiney ni kam nang gelngin e gafgow ni yan boch e girdi’ u fithik’ ni ngar ayuweged ndab ni kirebnag, fa? Mang fan?
Mu beegew e Psalm 119:97, mi gimew weliy e fulweg ko re deer ni baaray:
-
Mang e k’aring boor e girdi’ ni ngar ted e yafos rorad nga thatharen e riya’ ya nge yag nra pilyeged e Bible mar wereged ko girdi’?
6. Ba ke babyor ni fan ngak urngin e girdi’
Bible e aram e re ke babyor nth’abi yoor mit e thin ni kan pilyeg ngay, ma boor e girdi’ ni bay rorad. Mu beegew e Acts 10:34, 35, mi gimew weliy e fulweg ko gal deer ni baaray:
-
Mang fan ni baadag Got ni ngan pilyeg e Thin rok nga boor mit e thin mu kun wereg ko girdi’ ni yoor?
-
Mang ban’en u rarogon e Bible ni ga baadag?
Ba chugur i
gubin e girdi’
u fayleng
nrayog ni ngar beeged e Bible u reb e thin ni yad manang fan
Ke pag
3,000
mit e thin ni kan pilyeg ngay
ni boch e ba polo’ ma boch e yu yang riy
5,000,000,000
Ken e Bible ni kan ngongliy
ndariy ba ken e babyor ni taareb rogon ngay
MA GAAR BOCH E GIRDI’: “Bible e ba ke babyor ni ke kakrom ni girdi’ e ra yoloyed.”
-
Uw rogon e re n’ey u wan’um?
-
Mang e be micheg ni Bible e Thin rok Got?
N’EN KAN FIL
Bible e Thin rok Got ma ke n’igin ni nge yag ni beeg urngin e girdi’.
Ngan Sul u Daken
-
Nap’an ni gad ra yog ni Got e ke thagthagnag nga laniyan’ e girdi’ ni ngar yoloyed e Bible, ma mang e be yip’ fan?
-
Mang e ba fel’ u wan’um u rogon ni ke yag ni nge par e Bible ni ka rogon, nge rogon ni yibe pilyeg, nge rogon ni yibe wereg ko girdi’?
-
Uw rogon Got u wan’um e chiney ni kam nang ni boor ban’en ni ke rin’ ya nge yag nim beeg e Bible?
MU GAY MURUNG’AGEN
Mu beeg murung’agen rogon ni un abweg e thin nu Bible u boch e babyor nga boch keb i mada’ ko chiney ni kan pilyeg nga boor mit e thin.
Mu fil rogon ni ke yag ni nge magey e yungi babyor nni yoloy e thin nu Bible ngay nde wod nge m’ay, nge rogon ni par ni ka rogon ni yugu aram rogon ni immoy boch e girdi’ ni ur guyed rogon ni ngar kirebnaged, ara ngar thilyeged e thin riy.
“Rogon ni Ke Par e Bible ni Ka Rogon” (Fare Wulyang ko Damit, July 2016)
Mu guy rogon ni tay boch e girdi’ e yafos rorad nga thatharen e riya’ ya nge yag nra pilyeged e Bible.
Boor yay ni kan abweg e thin nu Bible nga boch e babyor maku yibe pilyeg. Ere uw rogon nrayog ni nge mich u wan’um ndawori thil e thin riy?
“Has the Bible Been Changed or Tampered With?” (Article ni bay ko website)
a Gad ra weliy ko Guruy ni 07 ni gelngin Got nib thothup e aram gelngin ni ma maruwel.
