RIWIɄKWEYNA 06
Chʉká aʼzari ʉwa neykari azi nari kwakumana nanʉnno
Niwipáw «mazey nari chʉká meʼzánʉkwa ni» (Salmo 36:9). Imari nʉnáy narizáy meʼzano. Iʼngwiri inʉ kwey ʉwa neykari ínʉseʼ kineki gauʼ nari kwakumákʉchʉ una nanʉnno aʼzʉna ni. Emí ʉwa nanʉndi, kwey awkwa neykari awʉtari aʼzanuʼ narízʉna nanʉnno. Ey ʉweʼki, Jeuwá niwigownáy nanʉndi kʉkwa neykari awʉtari aʼzʉna nanʉnno. a Bibriáseʼri emí nari akwakumana ni wásʉya sí sékʉnʉn awkwa. Ey unigeʼri ʉwáy nanʉnno meʼzʉn awʉngwa ni.
1. Kuʼnawa awiri kaʼari azi nari kwakumʉngwari niʼna nanʉnno.
Bibriáseʼri eméy wásʉya ni: «Eʼri, Niwipáw kuʼnawa awiri kaʼa gow una ni» (Génesis 1:1). Iʼngwí científico ɉinari kuʼnawa awiri kaʼseʼ kwey ʉwa neykari bunna nanʉnno aʼzʉna ni. Ey ʉweʼki, Niwipawri kuʼnawa awiri yow emaʼba kaʼgʉmʉseʼ kwey ʉwa neykari azi nisi gow unʉnno. “Azʉɉumamʉ”—ánugwe seymʉkesin—inʉ kwey ʉwa neyka gow una ni: wirakoʼku awiri iʼngeygwi kaʼgʉmʉ diwʉ́n diwʉ́n kwʉn nuga gowgwi una ni. (Génesis 1:2).
2. Niwipawri iari kaʼgʉ́mʉri gowna nanʉnno.
Jeuwáseʼri gowkʉchʉ nʉʼkin auʼ nari akwʉngwasi gow una ni (Isaías 45:18). Íkʉri ayaʼba zeyzey aʼzari aʼkwakin kukwéy kʉnanʉngwasi Niwipawri kaʼgʉmʉ aʼgwasí kawi gow una ni. (Isaías 40:28 awiri 42:5seʼ aʼgwa ú). Científico ɉinari Niwikaʼgʉ́mʉri ingumʉ́n aʼgwasí kawa ni wásʉya ni. Ey awi nʉ́nkʉri, iʼngeygwi kaʼgʉmʉ kwey ʉwa neykaseʼri kukwéy nanuʼ neyka ni.
3. Iari anaʼnuga gwasi diwʉ́n nʉ́nkura nanʉnno.
Jeuwari Kaʼ ʉngowkiri ayaʼba chʉká aʼzari kwey awʉngwa neyka gow una ni. Kʉtʉkʉnʉn, inʉ chikirú zari bori ʉwa neyka gow awiri anaʼnuga gowgwi una ni. Ey unáyuri, Niwipawri íkʉri a zaná kawi gowgwi una ni (Génesis 1:27seʼ aʼgwa ú). Iari anaʼnuga gwasi diwʉ́n nʉ́nkura nanʉnno. Niwipawri a zaná kawi niwigowna nameʼ a azi neyka nanʉndi ayeygwi nikʉkweygwi nanʉn nuga ni. Zaguzanamʉ awiri gugín reʼgúkʉkwa neyka niwikʉnanʉkwéy neyka ni. Ayeygwi manʉnkaʼ diwʉ́n diwʉ́n aseykumʉya riwiʉkwéy nariri, inʉ du zari gow una neyka sekʉnanʉn nusi, awiri zamaya awkwa neykasin zeyzey reʼkusʉkwéy nanʉngwasi niwigow una ni. Anaʼnugáseʼri unikʉkwéy kʉnanuʼ nanʉnno, ey ʉweʼki, manʉ́nkaʼri Niwipáw kaʼmʉkanʉkwéy niwikʉnanʉn nuga ni.
INGUMɄ́N RIWIɄKWASI
Chʉká aʼzari ʉwa neykari Niwipawseʼ gowna nʉnní meʼzʉn awiri Bibriaseʼ wasʉyari nʉnáykʉchʉ ni meʼzʉn awkwasi bay sekʉnanʉn. Awiri íkʉseʼ uniga neykari Niwipáw sí inʉ niweʼzawiʉnno niweʼzari ʉnkʉriwín núkʉkwa nʉngwa ni.
4. Chʉká aʼzari ʉwa neykari bunna neyka ni
Inʉ wingawi una neykari Niwipawseʼ gowna neykaseʼ pari kʉriwí winuna neyka ni. Ey ʉwameʼ, zeywamʉ kʉkumʉya ni. Ey ʉweʼki, inʉ kinki zeywamʉ kʉkumizʉna nanʉn nuga nanʉnno. WIDEW chwa unayu, ema sí rimasey awkwa:
-
Bema ɉuna Niwipawseʼ gow una neykásinri ikʉseʼri kʉriwí inʉ wingow awaki nuga no.
Urákʉri eméy kawi gawʉnʉngwa kazari gow ukumana neyka ni. Ey awʉndi, emí inʉ kwey ʉwa neykari inʉseʼri gowna nanʉnno. Hebreos 3:4seʼ aʼgwa unayu, ema sí rimasey awkwa:
-
Inʉ kwey ʉwa neykari bema ingumʉ́n arunhá meʼkúsʉya no.
-
Kuʼnawa awiri kaʼgʉmʉseʼ kwey ʉwa neykari bunna nariza nʉnáy meʼzano.
Riwía ú
Ingumʉ́n ʉnkʉriwía awʉn meʼɉunʉndi, jw.org -seʼri niwipaperi awiri widew aya sí wásʉya mikaʼchona awiza ni. «¿Lo diseñó alguien?» awiri «Opiniones sobre el origen de la vida».
«Eri, urákʉʼri bunna gunti nanʉnno, ey ʉweʼri inʉ yow chwizari ʉwa neykari Niwipawseʼ gowna ni».
5. Bibriaseʼ inʉ bunna neyka sí wasʉyari nʉnáykʉchʉ neyka ni
Génesis kʉnowkwa 1seʼri, Kaʼgʉmʉ awiri ayaʼba chʉká aʼzari kwey ʉwa neykari emí nari bunna ni wásʉya ni. Ímari nʉnáykʉchʉ ki nanʉnno, kwa cuento ki nanʉnno. Widew chwa unayu, ema sí rimasey awkwa:
-
Bibriáseʼri Kaʼgʉmʉ awiri imaʼba kwey ʉwa neykari chinwa ɉwía nánʉkin bunna ni zawiʉya ki nanʉnno.
-
Bibriaseʼ inʉ bunna neyka sí wásʉya neykari nʉnáykʉchʉ nʉnní meʼzano.
Génesis 1:1seʼ aʼgwa unayu, ema sí rimasey awkwa:
-
Iʼngwí científico ɉinari inʉ kwey ʉwa neykari bunna gunti nʉnní wásʉya ni. Bibriaseʼ naʼgwakʉn nugeyka awi ikʉnhaseʼ winwásʉya neykari akingwi naní meʼzano.
Iʼngwiri Niwipáw pinna ɉuna gawʉngwásiri evolucionseʼ pari ingiti ingiti una ki nʉnno aʼzʉna ni. Génesis 1:21, 25, 27seʼ aʼgwa unayu, ema sí rimasey awkwa:
-
Bibriáseʼri Niwipawri wakʉ gow unayu imaʼba pari iʼngeygwi anaʼnuga aʼchoriri, ey unayu ikʉ kwakumʉngwa aʼchwi gowna zawiʉya ki nanʉnno. Kwa íwari inʉ azi kawi chwʉkwa nanʉndi emí kawi gowna ki nanʉnno.
6. Niwipawseʼ iʼngeygwi ɉuna gowna gwasi manʉ́nkaʼri diwʉ́n kinki nʉ́nkura neyka ni
Manʉ́nkaʼri anaʼnuga gwasi diwʉ́n niwikawa ni. Génesis 1:26seʼ aʼgwa unayu, ema sí rimasey awkwa:
-
Niwipáw zaná kawi niwibunna nameʼ zaguzanʉkwéy niwikʉnariri iʼngeygwi chʉwi kʉnikʉkwéy niwikʉnʉna ni. Ímari a sí inʉ niweʼzawiʉya no.
IʼNGWINÉ YEYKARI: «Bibriaseʼ inʉ bunna sí wasʉyari cuento zʉʼn naʼkinó».
-
Mari azi nʉwarunhakwe.
RIGAWIɄWA NEYKA
Jeuwari kuʼnawa awiri kaʼseʼ chʉká aʼzari kwey ʉwa neykari aseʼ gowna neyka ni.
Rigʉnchunhasʉkwasi
-
Bibriáseʼri kuʼnawa awiri kaʼ bori nʉnna neyka siri azi zawiʉya no.
-
Niwipawri evolucionseʼ pari kwey ʉwa gowna ki nanʉnno.
-
Iari manʉ́nkaʼri chʉká aʼzari kwey ʉwa gwasi diwʉ́n aneyka nanʉnno.
INGUMɄ́N IZATAKA AWKWA
Iʼngwi ɉuna sekʉnanʉn nusiri imari bunna nanʉnno meʼzari sékʉnʉn awkwa.
«Bunna neyka siri inʉ niweʼzawiʉya no» (¡Despertad!, septiembre, 2006)
Achʉnari gʉmʉsinʉ Bibriaseʼ eʼ inʉ bori nʉnkwe wásʉya neyka sí aʼzawín nuga chwa ú.
Evolución sí waseykumʉya ey awi Bibriaseʼ wasʉyari akingwi wasayʉnno meʼzari sékʉnʉn awkwa.
a Riwiʉkweyna 25seʼri Niwipawri íkʉzey nari nikʉnʉngwa aʼzʉna neyka sí wásʉya ni.
