CƐ̃́Ɛ́-ÐƐ̀ 06
Xwɛ̀ Fɛ̀ɛ̀ Nyu Ma Gbɔ Dèɛ̀ Kɛ́?
‘Ðé Geɖepɔɔ gbo, ɖéɛ̀ fɛ̀ɛ̀ sɔ̀ìn.’ (Wɛ́ɖɛ́ 36:9) M̀ poɛ jàà? Nyɔ ɖíɛ́ ɓè poɛ̀n hwìɖìi kà ɓɛ́ fɛ̀ɛ̀ se dà jɛ́ɛ́ ɖò kè ɖɛ-páún-po-po ɖò mú sɔ̀ìn nyɛ. Ɔ dyi jàà jùìn, nìí, à nì-nì kpá ɔ mìɔùn sɔ̃ kɔ̃. Kɛɛ, ɔ jù ké fɛ̀ɛ̀ dyi ɖé Jɛhova gbo sɔ̀ìn ní, nìí, ɔ mu xwíníín ɓéɖéìn. Ɔ se ná nìì? a Dyé ɖɛ Baɓoɔ cɛ̃ ɓá fɛ̀ɛ̀ gbɔ dè jè dyí kè xwíníín kɔ̃̀ jè ɖɛ nìà wɛ nyuà fɔ̀nɔ̀-hwòɖò kɛ.
1. Xwɛ̀ dyɔɔ̀ kè ɓóɖó-kpàà nyu ma gbɔ dèɛ̀ kɛ́?
Baɓoɔ ɖá: “Ðé ɖɛ dè gbɔ múɛɛ, Geɖepɔɔ mɛ zɔ̃̀ɔ̀ dyɔɔ̀ kè ɓóɖó-kpàɔ̀.” (Jɛ́nɛ́sì 1:1) Ðɛ-dyuò-nyɔ̀ pàɖà wɔ̃́ìn gbo kà ɓɛ́ dyɔɔ̀ kè ɓóɖó-kpàà ɓéɖé gbɔ-dè-dè kɛ. Xwɛ̀ Geɖepɔɔ nyu ma wa mɛɛ kɛ́? Ɔ nyùìn ma ɔ kũ̀à-mú-nyùìn-kpè mɔ̀à ɔ—“zùùɔ̀”—kɛɛ kũ̀à mú, ɓɛ́ ɔ ké ɖɛ séín nì ɖé dyɔɔ̀ dyí kè nɔ ɓóɖó-kpàà kɔ̃ɛɛ mɛ. Wa ɖíɛ́ ɓè mɔ̀, dɛ̀nɛ̀-dyù mɛ́nɛ́ɛ́ ɓèɔ̀ kè dɛ̀nɛ̀ ɓèɔ̀.—Jɛ́nɛ́sì 1:2.
2. Xwíníínɔ̀ nyɛ́ kɔ̃̀ jè Geɖepɔɔ mɛ ma ɓóɖó-kpàà kɛ́?
Jɛhova ‘se ma ɓóɖó-kpàà mɛ, ɓɛ́ ɔ ké fóɖóún kpá, kɛɛ ɔ mɛ ma ɓóɖó-kpàà ɓɛ́ nyɔùn-dyù kéɛ kɔ̃ cĩ́.’ (Àzédyà 45:18) Ɔ mɛ ma ɓóɖó-kpàɔ̀ ɓɛ́ ɔ ké cĩ́-naín nɔ̀mɔ̀ dyíin jù ɓó nyɔùn-dyù bìì kánáá pu. (Zà Àzédyà 40:28; 42:5 wuɖuún.) Dyuò-ɖɛ̀ ɓè tɛ̀mɛ̀ìn kà ɓɛ́ ɓóɖó-kpàà kò cá kɛ. Ɔ mɔ̀ dà ɖòùn ɓɛ́ nyɔ dyuò dyí, ɓɛ́ nyɔùn-dyù ɓɛ́ìn cĩ́ɛ kɛ.
3. Ðɛ́ nyu ké nyɔùn-dyù kòà ɓó nimii ɓè gbo kɛ́?
Ti Jɛhova ɖà ma ɓóɖó-kpàɔ̀ mɛɛ, ɔ mɛ ma fɔ̀ɔ̀-ɖɛ̀ ɓè ɔ kɔ̃. Kĩ́ín nyɛɛ, ɔ mɛ ma wáɖá-vàà kè nimii ɓè ɓóɖó-kpàɔ̀ kɔ̃. Púɛɛ, “Geɖepɔɔ mɛ ma nyɔùn-dyù kà ɔ mìɔùn nìà kɛ.” (Zà Jɛ́nɛ́sì 1:27 wuɖuún.) Ðɛ́ nyu ké nyɔùn-dyù kòà cá kɛ́? Sepoɛɖe Geɖepɔɔ mɛ nyɔùn-dyù kà ɔ mìɔùn nìà kɛ jèɛɛ, à ɓɛ́ìn kpeɖe ɓè nì ɔ múɛɛ ɓéɖéɛ, ɔ hwɔìn-kà ɖɛ̀ɓɛ̀ìn-ɖɛ̀ɓɛ̀ìn kè dyí-sɛ́ɖɛ́ìn-sɛ́ɖɛ́ìn. Ɔ mɛ ma à, ɓɛ́ à ké kpé ɓɛ́ìn, ɓɛ́ à ké wuɖu-dù ɓè cɛ̃́, ɔ kè ɓɛ́ à ké mɛɛ-ɖɛ̀ kè wɛ́ɖɛ́ ɓè múàùn dyi kpáìn. Ké à kò ɓó nimii ɓè gbo, sepoɛɖe à ɓɛ́ìn à Mɛ-nyɔ̀ɔ̀ ɓièɛ̀.
ÐE ÐƐ MÚIN CÁ
Dyé ɖɛ tɛ̀mɛ̀àìn kà ɓɛ́ wa poìn ma fɛ̀ɛ̀ xwaún kè kà ɖɛ Baɓoɔ cɛ̃à ɓá mɛɛ-ɖɛ̀ ɓè jè dyíɛɛ nyu fɔ̀nɔ̀-hwòɖò kɛ. Cɛ̃́ ɖɛ kpeɖe ɓè nì nyɔùn-dyù múɛɛ tɛ̀mɛ̀ìn à ɓá Geɖepɔɔ jè dyíɛ.
4. Wa poìn ma fɛ̀ɛ̀ xwaún
Nyɔùn-dyù dyé ɓàìn-ɓàìn ɓó fɔ̀nɔ̀-hwòɖò ɓè wa zà mɛɛ-ɖɛ̀ ɓè gbo ké wa nyu ɖɛ ɓè kɛɛ jè. Nìí, nyɛ́ mɛ dyé ɓàìn-ɓàìn ɓó mɛɛ-ɖɛ̀ ɓèà jè kɛ́? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
-
Ðɛ́ mɔ̀ fɔ̀nɔ̀-hwòɖò ɓè ɓɛ́ ɖɛ-nyu-nyɔ̀ ɓè ɖà mɛɛ-ɖɛ̀ ɓè gbo zà kɛ́?
Gbò séín ɓéɖé po-nyɔ̀. Kɛɛ, nyɛ́ po ɖɛ séín nyɛ́? Zà Híìbúɖúù 3:4 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Mɛɛ-ɖɛ̀ɔ̀ nyɛ́ Geɖepɔɔ mɛ ɓɛ́ ɔ nɔ̀mɔ̀ m̀ hwìɖìi cá kɛ́?
-
Ɔ nyu fɔ̀nɔ̀-hwòɖò ɓɛ́ nyɔ kéɛ jàà po kà ɓɛ́ nyɔ ɖò mɔ̀ nyɔ mɛ ma dyɔɔ̀ kè ɓóɖó-kpàɔ̀ kè ɖɛ séín nì kɛɛ̀? Xwíníínɔ̀ nyɛ́ kɔ̃̀ jèɛ́?
M̀ dyuòɛ̀ ma dyíì,
kà m̀ ɓɛ́ìn céè-ɖɛ̀ ɓè kè víɖò ɓè ɓá cɛ̃́ɛ́-ɖɛ̀ nìà kɛ dyíɛɛ jw.org kɔ̃ dyéɛ ɖé wáká ɓè mɔ̀à “Wa Mɛɛ Ma Níì?” kè “Fɔ̀nɔ̀-Hwòɖò Ɓè Ɓá Fɛ̀ɛ̀ Gbɔ-Dè Jè Dyíɛ” kɛɛ kɔ̃ɛɛ̀?
“Sepoɛɖe gbò séín nì kɛɛ nyɔ ɖò ɓéɖé ɔ ké ɔ po. Kɛɛ Geɖepɔɔ mɔ̀ nyɔ po ɖɛ séín”
5. Ðɛ Baɓoɔ cɛ̃ ɓá mɛɛ-ɖɛ̀ ɓè jè dyíɛɛ nyu fɔ̀nɔ̀-hwòɖò
Ðé Jɛ́nɛ́sì wuɖu-kpà 1 múɛɛ, Baɓoɔ zaìn dɛ̀ ɓóɖó-kpàɔ̀ kè fɔ̀ɔ̀-ɖɛ̀ ɓè nì ɔ kɔ̃ɛ sɔ̀ìn nyɛɛ jè kɔ̃in. M̀ ɓɛ́ìn ɖɛ ɓèa jè jàà poɛɛ̀ mɔɔ wa mɔ̀ se-nɔ̀ɔ̀ puù? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
-
Nì hwòɖò ɖá Baɓoɔ tɛ̀mɛ̀ìn kà ɓɛ́ Geɖepɔɔ mɛ ma ɓóɖó-kpàɔ̀ kè ɖɛ ɓè nì ɔ kɔ̃ɛɛ ɓó dyóɖóún kè máaún wè mɛ̀nɛ̀ìn-ɖò xwíníín nyɛɛ̀?
-
Nì hwòɖò ɖá ɖɛ Baɓoɔ cɛ̃ ɓá mɛɛ-ɖɛ̀ ɓè jè dyíɛɛ nyu fɔ̀nɔ̀-hwòɖò cáà? Xwíníínɔ̀ nyɛ́ kɔ̃̀ jè ɔ nìà ná mɔɔ ɔ seà ná nì kɛ́?
Zà Jɛ́nɛ́sì 1:1 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Ðɛ-dyuò-nyɔ̀ ɓè ɖá dyɔɔ̀ kè ɓóɖó-kpàà ɓéɖé gbɔ-dè-dè. Xwɛ̀ ɖɛ wa cɛ̃à kè ɖɛ m̀ zàà wuɖuún kàùn ɖé Baɓoɔ múɛɛ nyu hwɔìn nyɛ́?
Nyɔ ɖíɛ́ ɓè poɛ̀n hwìɖìi kɛbì Geɖepɔɔ mɔ̀ nyɔ nyuɛ ɓɛ́ ɖɛ ɓè ké nì wa mìɔùn sɔ̃ kɔ̃ ní. Zà Jɛ́nɛ́sì 1:21, 25, 27 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Nì hwòɖò ɖá Baɓoɔ tɛ̀mɛ̀ìn kà ɓɛ́ Geɖepɔɔ mɛ ma fɔ̀ɔ̀-ɖɛ̀ tííwè dyúáɖò, ké ɔ táà dyi ké ɔ zɛ̃̀ìn zimii ɓè kè nimii ɓè ɔ kè nyɔùn-dyù múɛɛ̀? Mɔɔ ɔ mɛ ma fɔ̀ɔ̀-ɖɛ̀ dú kò-kò séínǹ? b
6. Nyɔùn-dyù mɔ̀ Geɖepɔɔ mɛɛ-ɖɛ̀ ɖò ɓɛ́ wa kò cá kɛ
À kò ɓó nimii ɓè ɓɛ́ Jɛhova mɛ ma kɛɛ gbo. Zà Jɛ́nɛ́sì 1:26 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Sepoɛɖe Geɖepɔɔ mɛ nyɔùn-dyù kà ɔ mìɔùn nìà kɛ jèɛɛ, ɖɛ́ à ɖɛ̀ɓɛ̀ìn-ɖɛ̀ɓɛ̀ìn kè wìì ɓéɖé-ɓéɖé tɛ̀mɛ̀ìn ɓá ɔ kpeɖe ɓèɔ̀ jè dyíɛ́?
NYƆ ÐÍƐ́ ƁÈ ÐÁ: “Ðɛ Baɓoɔ cɛ̃ ɓá mɛɛ-ɖɛ̀ ɓè jè dyíɛɛ mɔ̀ se.”
-
Xwɛ̀ mɔ̀ùn ɖáá? Xwíníínɔ̀ nyɛ́ kɔ̃̀ jèɛ́?
SṸÌN-XWÍNÍÍN
Jɛhova mɛ ma dyɔɔ̀ kè ɓóɖó-kpàà kè fɔ̀ɔ̀-ɖɛ̀ séín.
Ðɛ-kɔ̃in-kpa-kpa
-
Ðɛ́ Baɓoɔ tɛ̀mɛ̀ìn ɓá dɛ̀ dyɔɔ̀ kè ɓóɖó-kpàà sɔ̀ìn nyɛɛ jè dyíɛ́?
-
Geɖepɔɔ táà ma dyi, ɓɛ́ fɔ̀ɔ̀-ɖɛ̀ dú kò-kò ɓè ké fɔ̀ɔ̀-ɖɛ̀ tííwè ɖò mú sɔ̀ìnǹ mɔɔ ɔ mɛ ma wa séínǹ?
-
Xwɛ̀ nyɔùn-dyù nyu kòɛ̀ cá kɛ́?
CƐ̃́ ÐƐ PÀÐÀ
Dyé kà mɛɛ-ɖɛ̀ ɓè tɛ̀mɛ̀ìn kà Ðɛ-mɛ-nyɔ̀ ɖò nì kɛ.
Dyé kà ɓà ɖò ɓɛ́ìn ɖɛ Baɓoɔ cɛ̃ ɓá mɛɛ-ɖɛ̀ ɓè jè dyíɛɛ ɔ dyú-gàà gbo kɔ̃in zaìn nyɛ.
Dyéɛ kɛbì ɖɛ séín wa mìɔùn sɔ̃ kɔ̃ dyi-dyi kè Baɓoɔ muìn gbo ní.
Dyéɛ kɛbì kpá sùà ɓè kè ɖɛ-dyuò-nyɔ̀ ɓè ɖɛín-dɔ̃̀-dɔ̃̀ tɛ̀mɛ̀ìn kà nyɔ ɖò mɛ ma fɛ̀ɛ̀ mɔɔ ɔ dyi ma ɔ mìɔùn sɔ̃ kɔ̃ ní.
Dɛ̀ Fɛ̀ɛ̀ Sɔ̀ìn Nyɛ—Dyi-Diè-Ðɛ̀ Hm̀m̀ Ɓè Ɓɛ́ Nyɔ Ɓéɖé Nyɔ Ké Dyi Diè Kɛ (bòɖòsóò)
a Cɛ̃́ɛ́-ɖɛ̀ 25 mu ɖɛ mɔ̀ Geɖepɔɔ hwòɖòɛ̀-gbɔ-po-ɖɛ̀ ɓó nyɔùn bììɛɛ jè kɔ̃in zaìn.
b Ðé Baɓoɔ múɛɛ, wuɖu mɔ̀à “dú kò-kò” kɛɛ xwíníín mɔ̀, fɔ̀ɔ̀-ɖɛ̀ kò-kò poìn dyí ɓè.
