LEKSIYON 06
Sa Unsang Paagi Nagsugod ang Kinabuhi?
“[Ang Diyos] ang tuboran sa kinabuhi.” (Salmo 36:9) Motuo ba ka ana? Ang ubang tawo moingon nga walay naglalang sa kinabuhi. Kon tinuod na, nataymingan lang diay nga nabuhi ta sa kalibotan. Pero kon gilalang ni Jehova nga Diyos ang kinabuhi, naa ni katuyoan, dili ba? a Matikdi kon unsay giingon sa Bibliya bahin sa sinugdanan sa kinabuhi ug kon nganong katuohan ni.
1. Unsay sinugdanan sa uniberso?
Ang Bibliya nag-ingon: “Sa sinugdan gibuhat sa Diyos ang langit ug ang yuta.” (Genesis 1:1) Kadaghanan sa mga siyentista mouyon nga ang uniberso naay sinugdanan. Giunsa ni paglalang sa Diyos? Iyang gigamit ang iyang “aktibong puwersa”—ang iyang balaang espiritu—sa paghimo sa tanan diha sa uniberso, apil ang mga galaksiya, bituon, ug planeta.—Genesis 1:2.
2. Nganong gilalang sa Diyos ang yuta?
Si Jehova “wala maglalang [sa yuta] sa wala lamay kapuslanan, apan nag-umol niini aron puy-an.” (Isaias 45:18) Iyang gihimo ang atong planeta nga nindot puy-an ug naa ang tanang gikinahanglan aron ang tawo mabuhi hangtod sa hangtod. (Basaha ang Isaias 40:28; 42:5.) Gipakita sa siyensiya nga ang yuta lahi kaayo sa ubang planeta. Walay laing planeta nga nadiskobrehan nga naa ang tanang gikinahanglan aron mabuhi ang tawo.
3. Nganong ang mga tawo lahi sa mga hayop?
Human himoa ni Jehova ang yuta, naglalang siyag kinabuhi diha niini. Una, ang yuta iyang gipuno ug mga tanom ug hayop. Dayon, “gibuhat sa Diyos ang tawo sumala sa iyang larawan.” (Basaha ang Genesis 1:27.) Nganong ang mga tawo lahi sa mga hayop? Gibuhat ta sumala sa larawan sa Diyos mao nga mapakita nato ang iyang mga hiyas, parehas sa gugma ug hustisya. Gihatagan pod ta niyag katakos nga makakat-on ug mga pinulongan, makaapresyar sa nindot nga mga butang, ug mag-enjoy sa musika. Ug lahi sab ta sa mga hayop kay makasimba ta sa atong Maglalalang.
TUN-IG DUGANG
Sayra ang ebidensiya nga ang kinabuhi gidisenyo ug nga katuohan ang estorya sa Bibliya bahin sa paglalang. Sayra pod kon unsay atong makat-onan bahin sa Diyos base sa mga hiyas sa tawo.
4. Ang kinabuhi gidisenyo
Ang mga tawo dayegon tungod sa mga disenyo nga ilang gikopya sa kinaiyahan (nature). Busa kinsa may angayng dayegon sa mga disenyo diha sa kinaiyahan? I-play ang VIDEO, ug dayon hisgoti ang mosunod nga pangutana:
-
Unsay gikopya sa mga tawo gikan sa kinaiyahan?
Ang matag balay naay nagdisenyo ug naghimo. Pero kinsay nagdisenyo ug naghimo sa mga butang sa kinaiyahan? Basaha ang Hebreohanon 3:4, ug dayon hisgoti kini nga mga pangutana:
-
Unsang mga disenyo sa kinaiyahan nga bilib kaayo ka?
-
Katuohan ba nga ang uniberso ug ang tanan diha niini gidisenyo? Nganong kanay imong tubag?
Nahibalo ba ka?
Makakita kag mga artikulo ug video bahin niini nga topiko diha sa jw.org sa serye nga “Gidisenyo ba Kini?” ug “Ang Giingon sa Uban Bahin sa Sinugdanan sa Kinabuhi.”
“Siyempre, ang matag balay dunay nagtukod, apan ang nagtukod sa tanang butang mao ang Diyos”
5. Ang giingon sa Bibliya bahin sa paglalang katuohan
Sa Genesis kapitulo 1, gihisgotan sa Bibliya ang sinugdanan sa yuta ug sa kinabuhi diha niini. Tinuod ba na nga estorya o bakak? I-play ang VIDEO, ug dayon hisgoti ang mosunod nga mga pangutana:
-
Ang Bibliya ba nagtudlo nga ang yuta ug ang kinabuhi diha niini gilalang sulod sa unom ka 24 oras nga adlaw?
-
Para nimo, katuohan ba ang giingon sa Bibliya bahin sa paglalang? Nganong kanay imong tubag?
Basaha ang Genesis 1:1, ug dayon hisgoti kini nga pangutana:
-
Ang mga siyentista nag-ingon nga ang uniberso naay sinugdanan. Unsay imong ikasulti sa ilang giingon kon ikomparar sa teksto sa Bibliya nga imong gibasa?
Ang uban naghunahuna kon ebolusyon ba ang gigamit sa Diyos sa pagpatunghag kinabuhi. Basaha ang Genesis 1:21, 25, 27, ug dayon hisgoti kini nga mga pangutana:
-
Ang Bibliya ba nagtudlo nga ang Diyos naghimog simpleng selula ug dayon nahimo ning mga hayop ug mga tawo? O gilalang niya ang lainlaing “matang” sa kinabuhi? b
6. Ang mga tawo lahi sa ubang linalang sa Diyos
Lahi ta sa mga hayop nga gilalang ni Jehova. Basaha ang Genesis 1:26, ug dayon hisgoti kini nga pangutana:
-
Kay gilalang ta sa larawan sa Diyos, ang atong katakos sa pagpakitag gugma ug kaluoy nagpakita sa unsang personalidad sa Diyos?
ANG UBAN MOINGON: “Ang giingon sa Bibliya bahin sa paglalang dili tinuod.”
-
Unsay imong hunahuna? Nganong kanay imong tubag?
SUMARYO
Gilalang ni Jehova ang uniberso ug ang tanang kinabuhi.
Review
-
Sumala sa Bibliya, unsay sinugdanan sa uniberso?
-
Ang Diyos ba naghimog simpleng selula unya nahimong lainlaing matang sa kinabuhi, o iyang gilalang ang tanan?
-
Nganong ang mga tawo lahi sa mga hayop?
SUSIHA
Sayra ang mga disenyo nga makita diha sa kinaiyahan.
Sayra kon giunsa pagpasabot sa usa ka amahan ngadto sa iyang anak ang giingon sa Bibliya bahin sa paglalang.
Sayra kon ang ebolusyon nahiuyon ba sa Bibliya.
“Gigamit ba sa Diyos ang Ebolusyon sa Pagpatungha sa Lainlaing Matang sa Kinabuhi?” (Web article)
Susiha kon ang fossil record o mga eksperimento sa siyensiya nagpakita ba nga ang kinabuhi gilalang o basta na lang kining mitungha.
a Hisgotan sa Leksiyon 25 kon unsay katuyoan sa Diyos para sa mga tawo.
b Sa Bibliya, ang pulong nga “matang” nagtumong sa dakong grupo sa buhing mga butang.
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
