LESEN 06
Ifa Usun Manaw A Fisitá?
“[Kot] en ewe lepopun manau.” (Kölfel 36:9) Ka lúkú ena? Ekkóch ra ekieki pwe ese wor a poputááni manaw. Ika a pwúng ena, iwe usun itá nge sia chék pwisin fisitá, nge ese wor popun. Nge ika Jiowa Kot a efisatá manaw, iwe epwe wor popun. a Sipwe káé met ewe Paipel a erá usun poputáán manaw, me ppii ika pwata a pwúng ach sipwe tongeni lúkú pwe mi enlet ena.
1. Ié a fératá láng me fénúfan?
Iei met Paipel a erá: “Lepopun Kot a föri läng me fanüfan.” (Keneses 1:1) Lape ngeni scientist ra tipeeú ngeni pwe láng me fénúfan a wor poputáár. Ifa usun Kot a fératá láng me fénúfan? A áeá an we manaman are ‘ngünün’ we, weween ina an we ngún mi fel le fératá mettóch meinisin lón láng me fénúfan, kapachelong ekkewe mwicheichen fúú are galaxy, me planet.—Keneses 1:2.
2. Pwata Kot a fératá fénúfan?
Jiowa ese “föri [fanüfan] pwe epwe kotongau, nge a föri pwe lenien aramas.” (Aisea 45:18) A féri ei fénúfan pwe epwe eú leeni mi kinamwe me epwe ina leenien aramas tori feilfeiló. (Álleani Aisea 40:28; 42:5.) Scientist ra erá pwe ei fénúfan a sókkóló pwe iei chék ewe leeni a wor met mi lamot ngeni aramas ar repwe tongeni manaw me ie.
3. Met a asókkalóói aramas seni ekkewe man?
Mwirin án Jiowa fératá fénúfan, a fératá ménúmanaw wóón. Akkomw, a amasoua ei fénúfan ren irá me man. Mwirin, “Kot a föri aramas lon püsin lapalapan.” (Álleani Keneses 1:27.) Pwata aramas ra sókkóló? Pokiten Kot a férikichetá lón napanapan, iwe sia tongeni pwári napanapan kewe, áwewe chék ren tong me pwúngiéch. A pwal férikich pwe sipwe tufichin káé sókkun fós, mwaar ren ekkewe mettóch mi lingéch, me sani kél me nikáttik. Kich aramas, sia tongeni fel ngeni ewe Chón Férikichetá, nge ekkewe man rese tongeni fel ngeni.
KÚTTAFICHI
Káé ekkewe pisekin ánnet mi pwári pwe a fen kkótóló napanapen fférún manaw, me mi pwári pwe a pwúng minne Paipel a erá usun fisitáán manaw. Ppii met sia káé usun Kot seni ekkewe napanap aramas ra napanapeniir.
4. A fen kkótóló napanapen fférún manaw
Sia kan ingeiti aramas ren ekkewe mettóch ra nikáppirú seni napanapen ekkewe man me ekkewe irá. Iwe itá ié sipwe mwareiti ren napanapen fférún ekkewe man me ekkewe irá? Fichi ei VIDEO, me mwirin pwóróusfengen wóón ei kapas eis.
-
Ikkefa ekkóch mettóch aramas ra fératá nge ra léllé ngeni ekkewe mettóch Kot a fératá?
A kan wor ié a wisen anapanapa me aúetá eú me eú imw. Nge ié a wisen anapanapa me fératá masouen fán láng me fénúfan? Álleani Ipru 3:4, me mwirin pwóróusfengen wóón ekkeei kapas eis:
-
Menni lein ekkewe mettóch fán láng me wóón fénúfan ka ingeiti napanapen fférún?
-
Mi tufich ach sipwe lúkú pwe a wor emén a fen anapanapa meinisin masouen láng me fénúfan? Pwata ka erá ena?
En mi silei?
Ka tongeni kúna ekkewe lesen me video usun ena pwóróus wóón jw.org fán ekkeei itelap “Was It Designed?” me “Viewpoints on the Origin of Life.”
“Ewer, iteiten imw aramas ra aüetä, nge Kot ewe mi aüetä mettoch meinisin”
5. A pwúng minne Paipel a erá usun fisitáán manaw
Ewe Paipel a áweweei lón Keneses sópwun 1 usun fférútáán fénúfan me ménúmanaw wóón. Ka tongeni lúkú ena pwóróus, are ina chék eú túttúlap? Fichi ei VIDEO, me mwirin pwóróusfengen wóón ekkeei kapas eis.
-
Mi pwúng pwe ewe Paipel a erá pwe ei fénúfan me ménúmanaw wóón ra fférútá lón chék úkúkún wonu rán?
-
Óm lúkú pwe minne Paipel a erá usun fisitáán manaw, a weweéch me pwúng? Pwata a ina usun meefiom?
Álleani Keneses 1:1, me mwirin pwóróusfengen wóón ei kapas eis:
-
Scientist ra erá pwe láng me fénúfan a wor poputáár. Ifa usun minne ra apwúngaló a léllé ngeni met ewe ka kerán chék álleani seni Paipel?
Ekkóch ra ekieki ika Kot a áeá evolution le efisatá manaw wóón fénúfan. Álleani Keneses 1:21, 25, 27, me mwirin pwóróusfengen wóón ei kapas eis:
-
Itá ewe Paipel a apasa pwe Kot a áeá evolution le efisatá manaw ren choweán iik, man, me aramas, are a fériiretá meinisin lón en me “sokun”?
6. Aramas iir férien Kot mi kkóló aúchear
Kich sise usun ekkewe man Jiowa a fériiretá. Álleani Keneses 1:26, me mwirin pwóróusfengen wóón ei kapas eis:
-
Pokiten Kot a férikichetá lón napanapan, iwe met ach tufichin tongei aramas me kirekiréch ngeniir a áiti ngenikich usun Kot?
EKKÓCH RA ERÁ: “Minne Paipel a apasa usun fisitáán manaw, ina chék eú túttúlap.”
-
Met óm ekiek? Pwata ka erá ena?
MENLAPAN
Jiowa a fératá láng me fénúfan me meinisin ménúmanaw.
Enniwili
-
Met ewe Paipel a áiti ngenikich usun fisitáán láng me fénúfan?
-
Itá Kot a áeá evolution le efisatá sókkopaten ménúmanaw, are a pwisin fériiretá meinisin?
-
Pwata a kkóló aúchean aramas?
PWAL EKKÓCH PWÓRÓUS
Álleani ifa usun napanapen fférún ekkóch man a pwári pwe a wor emén chón anapanaper.
Katol ifa usun emén sam a áwewe ngeni néún ei kúkkún át minne Paipel a apasa usun fisitáán manaw.
Álleani ika evolution me ewe Paipel ra tipeeúfengen.
“Did God Use Evolution to Create the Different Types of Life?” (Web article)
Ppii ika ifa usun ekkewe chúún man are ekkewe irá minen lóóm, me án scientist asóssót wóón mettóch ra pwári pwe a wor emén chón fératá ménúmanaw, are ika ra chék pwisin fisitá.
