LONGESO 06
Kuchi Mwono Waputukile?
Kuli Zambi “kwatwama lie fuji lia mwono.” (Samu 36:9) Shina wakutayiza nyonga ali? Atu amwe keshi kutayiza ngwo Zambi mwe watangile mwono. Nyi chino chamwenemwene, chinalumbunuka ngwo, mwono walitangile wene hanji ngwetu wejile susumuku. Mba nyi Zambi mwe watangile mwono, chino chinalumbunuka ngwo kuli chikuma chize autangilile. a Mutumona yize Mbimbiliya yakwamba ha chize mwono waputukile. Mutumona nawa mumu liaka twatamba kufuliela ha yuma yacho.
1. Iya watangile malilu ni hashi?
Mbimbiliya yinambe ngwo: “Ha uputukilo Zambi watangile malilu ni hashi.” (Uputukilo 1:1) Akwa-ciência kakutayiza ngwo malilu ni hashi yapwile ni uputukilo. Mba iya watangile malilu ni hashi? Zambi kazachishile tachi jenyi, hanji ngwetu spiritu yenyi yisandu mba atange malilu ni hashi, galáxia, tutongonoshi ni yuma yikwo nawa.—Uputukilo 1:2.
2. Mumu liaka Zambi atangile hashi?
Yehova kakatangile hashi hapwe ‘hahululu, alioze watangileho hanga atu akatwameho.’ (Izaia 45:18) Kuli chikuma chize Yehova atangilile hashi: Iye kazangile hanga hashi hapwe hapema haze atu te mahasa kutwama kanawa ku miaka yeswe. (Tanga Izaia 40:28; 42:5.) Akwa-ciência kakutayiza ngwo hashi hapwa hapema chinji, halisa chinji ni planeta jikwo. O kahashile kuwana planeta yikwo yize yili ni yuma yeswe twakufupiwa mba tupwe ni mwono.
3. Mumu liaka atu alisa ni tushitu?
Muze Yehova ahwishile kutanga hashi, yatanga mitondo ni tushitu. Hanyima, “Zambi yatanga mutu mu chano chenyi.” (Tanga Uputukilo 1:27.) Mumu liaka atu alisa ni tushitu? Mumu atu kaatangile mu chano cha Zambi. Chino chinalumbunuka ngwo, o mahasa kwimbulula yitanga yenyi ngwe zango ni ululi. Chikwo nawa, Yehova katutangile ni uhashi wa kulilongesa malimi eka ni kuzanga miaso ni yuma yikwo. Kulisa ni tushitu, etu mutuhasa kuwayila Sakatanga wetu.
NYINGIKA NAWA
Mutumona yuma yize yakusolola ngwo mwono kautangile, chize ulumbunwiso wa Mbimbiliya hakutwala ku yitangiwa wapwa walita, ni yize mutuhasa kulilongesa hali Zambi kupalikila mu yitanga ya atu.
4. Mwono kautangile
Atu kakwachichimieka muze akwimbulula yuma yize Zambi atangile hanga alinge yuma yo. Kuchi wanyonga, shina yoze watangile yuma yeswe katelele uchichimieko unji nyi? Tala CHINEMA, mba nushimutwine chihula chino.
-
Yuma yika atu embulula ku yitangiwa?
Zuwo lieswe lili ni yoze walitungile. Mba iya watungile hanji watangile yuma yeswe? Tanga A-Hepreu 3:4, mba nushimutwine yihula yino:
-
Hano hashi hanazala too ni yitangiwa yipema. Chuma chika chize chakukukomwesa?
-
Shina chili chashi kuli yena kutayiza ngwe kuli umwe yoze watangile malilu ni hashi? Mumu liaka?
Unachinyingika nyi?
Muhasa kuwana yikuma yikwo ni yinema hakutwala ku chikuma chino ha site jw.org, ha chikuma “Teve um Projeto?” ni “A Origem da Vida: Teorias e Fatos.”
“Mumu zuwo lieswe lili ni yoze walitungile; alioze yoze watungile yuma yeswe iye Zambi”
5. Yuma yize Mbimbiliya yakwamba yili yamwenemwene
Mukanda wa Uputukilo kapitulu 1 unahanjika ha chize atangile malilu ni hashi. Shina twatamba lume kufuliela ha sango jacho nyi ka? Tala CHINEMA, mba nushimutwine yihula yino:
-
Shina Mbimbiliya yakulongesa ngwo, hashi katangileho ha matangwa asambano a maola 24?
-
Shina ulumbunwiso wa Mbimbiliya hakutwala ku yitangiwa unalite? Mumu liaka wamba ngwe ewa, hanji ngwe ka?
Tanga Uputukilo 1:1, mba nushimutwine chihula chino:
-
Akwa-ciência kakutayiza ngwo malilu ni hashi yapwile ni uputukilo. Kuchi yino yinalite ni yize watanga mu Mbimbiliya?
Atu amwe kakunyonga ngwe Zambi kazachishile evolução mba atange mwono. Tanga Uputukilo 1:21, 25, 27, mba nushimutwine yihula yino:
-
Shina Mbimbiliya yakulongesa ngwo Zambi kazachishile evolução mba atange yishi, tushitu ni atu? Nyi shina katangile yuma yeswe yikwete mwono kulita ni “mavungu” jo? b
6. Atu kali yitangiwa yalipwila ya Zambi
Etu twalisa chinji ni tushitu waze Zambi atangile. Tanga Uputukilo 1:26, mba nushimutwine yihula yino:
-
Atu kakuhasa kusolola zango ni keke. Mumu liaka? Mumu katutangile mu chano cha Zambi. Yika chino chinatulongesa hakutwala ku utu wa Yehova?
ATU AMWE KAKWAMBA NGWO: “Sango ja mu Mbimbiliya hakutwala ku yitangiwa japwa ja mahuza.”
-
Mba ena kuchi wakunyonga? Mumu liaka?
YIZE WALILONGESA
Yehova mwe watangile malilu ni hashi ni yitangiwa yeswe yize yikwete mwono.
Kuhitulula
-
Yika Mbimbiliya yakulongesa hakutwala ku chize malilu ni hashi yaputukile?
-
Shina Zambi kazachishile evolução mba atange yuma? Nyi Zambi mwene mwe watangile yuma yeswe?
-
Mumu liaka atu alisa ni tushitu?
HENGWOLA NAWA
Tala yilweza ya yitangiwa yize yakusolola ngwo kwatwama umwe Sakatanga.
Tala chize yisemi mahasa kulumbunwina ana jo yize Mbimbiliya yakulongesa hakutwala ku yitangiwa.
Tala nyi evolução yinalite ni malongeso a mu Mbimbiliya.
“Shina Zambi Kazachishile Evolução mba Atange Yitangiwa ya Mwono?” (Lusango wa ha internet)
Atu amwe kakwamba ngwo, yuma yikulu (registro fóssil) ni malongeso a ciência kakuhakwila evolução. Shina chamwenemwene lume?
A origem da vida—Cinco perguntas que merecem resposta (Kamukanda)
a Ha longeso 25, mutukalilongesa upale wa Zambi hali atu.
b Mu Mbimbiliya liji ‘vungu’ linatale ha chizavu chinene cha yitangiwa ya mwono.
