ˈWƆN ˗GƆ 06
˗Tosɛta zü ˗yö ˗dɔ ˗kɔ ˗kë ꞊dhɛ?
˗Zlan ˈnën «pë suu ꞊gban ˈˈpɛpɛ ˗da.» (˗Dhɛkpaɔ dhiaˈˈ ˈsëëdhɛ 4:11) Ü ˗bha ˈgü gagade ˗mü ˗ee? Mɛn ˈbhaa ˗nu ˗bha ˈgü pë ꞊gban ˈˈpɛpɛ ˗nu ˗wo ˗nu wo ˗de ˈka, ˗an ˗damɛn ˈyaa ˈdhö. ꞊Ya kë ꞊dhɛ ˗yö ˈˈdhʋ̈ kö kwa ˗bha ˗këdhösü ˗gɛn ˈyaa ˗dhö. ˈˈKɛɛ ꞊ya kë ꞊dhɛ ˗Zlan ˈnën ˈö pë ꞊gban ˗da kö kwa ˗da ˗sü ˗gɛn ˗ya ˗gɔ. a Pë ˈö Biblö ˗ya pö ˈö ˗gban ˗tosɛta züdɔdhɛ ˗bha waa ˈpë ˗kë ˈö ˈkwa ˗dho kwa ˗zo yö ˗a ˗dhɛ, ü ˗dhö ˗a yö ˈwɔn ˗gɔ ˈö yö ˗a ˈgü.
1. ˈDe ˈˈsɛ waa dhaŋ˗ ˗an ˗da?
Biblö ˗ya ˗pö pë «˗blɛɛzë ˈö ˗Zlan ˗ya ˗kë ˈö tɔɔ ˈsɛ waa˗ dhang˗» (ˈWunzüdɔdhɛ 1:1). ꞊Klaŋ ˈˈgblʋ̈gblʋ̈ ꞊vadhɛ ˗wo ˗we ˗a ˗bha ꞊dhɛ ˈˈsɛ waa dhaŋ˗ ˗an züdɔdhɛ ˗yö ˗dhö. ˗Zlan ˗yö ˗an ˗da ˗kɔ ˗kë ꞊dhɛ? ˗Zlan ˗yö ˗bɔ ˗a ˗bha ˗zuu ˈö ˗kë ‹˗a ꞊faan› ˈka bhë ˗a ˗ta ˈö pë ꞊gban ˈˈpɛpɛ ˈwo dhaŋ˗ ˈgü ˈö ˈwo ˈˈsɛ ˗ta ˗an ˗da.—ˈWunzüdɔdhɛ 1:2.
2. ˈMën ˗kë ˈö ˗Zlan ˗yö ˈˈsɛ ˗da?
Zoova ‹yö ˈti [ˈˈsɛ] ˗da kö ˗yö ˈto ˈˈwɛɛwɛ, ˈˈkɛɛ ˗yö ˗a ˗da kö ˗wo ˗tosɛta kë ˗a ˗ta.› (Isaïe 45:18) ˗Yö ˈˈsɛ ˗da kö mɛnbhɩɩdhe ˗nu ˈkwa kë ˗a ˗ta zuʋ̈gblüdhi ˈgü ˗toëpö ˈka. (Isaïe 40:28; 42:5 ˗wo pö.) ꞊Klaŋ ˈˈgblʋ̈gblʋ̈ ˗nu ˗wa ˗zɔn ꞊dhɛ ˈˈsɛ ˗tadhɛ waa ˗dhɛ ˈˈwɛɛ ˗nu ˈwo to ˈwaa do. ˈˈSɛ ˗tadhɛ dosɛnŋ ˈnën pë ˈˈpɛpɛ ˈö mɛnbhɩɩdhe ˗bhawɔn ˈdhö ˗an ˗bha kö ˗wo ˗tosɛta kë ˈwo˗ ˗bha.
3. ˗Mën ˈö mɛnbhɩɩdhe ˗nu bho wü ˗nu ˈˈpiʋ̈?
ˈDhɛ Zoova ˗yö ˈˈsɛ ˗yökë ˈyö pë ˗nu ˗da ˗a ˗ta. ˗Ya zü ˗sü ˈˈdhü ˗nu waa wü ˗nu ˗an ˗ta. ˗Dhɛ ˈö go mü «ˈyö mɛnbhɩɩdhe ˗kë ö ˈˈbin ˈka». (ˈWunzüdɔdhɛ 1:27, NWT ˗wo pö.) ˗Mën ˈö ˗kë ˈö mɛnbhɩɩdhe ˗nu waa wü ˗nu ˈwaa do? ˗A ˗gɛn ˗mü ꞊dhɛ ˗Zlan ˗yö kwa ˗pëkë ö ˈˈbin ˗bha. ꞊Waa˗ pö ˈˈdhʋ̈ ˗a ˗gɛn ˈnën ˗tɔ ˗a ˗bha ˈˈklʋʋsë ˗nu bhë ˗yö ˗an ˗ya kwa ˈgü. ˗A ˈˈklʋʋsë ˈbhaa ˗nu ˈnën ˈwo ˗tɔ, ˗dhɔ waa ˗kë kpɛnŋdhösü. ˗Ya ˗kë ˈö ˈkwa ˗wo ˗nu ꞊draan, ˈö pë ˗së ˗nu waa ˈˈtan ˗nu ˗dhɔ ˗yö kwa ˗kë. ˈKwaa ꞊dhɛ wü ˗nu ˈdhö, kwa ꞊mɔɔn˗ ˗bha ˈö ˈkwa kwa ˗Damɛn ˗dhɔkë.
˗KAA ˈˈPIƲ̈ ˈPƆN
Pë ˗nu ˈwo˗ ˗zɔn ꞊dhɛ ˗Zlan ˈnën pë ꞊gban ˈˈpɛpɛ ˗da, ˈwo˗ ˗zɔn ˈzü ꞊dhɛ pë ˈö Biblö ˗ya pö ˈö ˗gban pë ˗da ˗sü ˗bha ˗yö gagade ˈka bhë, ˗kwaa ˗ga. ˈˈklʋʋsë ˗nu ˈwo mɛnbhɩɩdhe ˗nu kwa ˈgü, pë ˈwo˗ ˗zɔn kwa ˗dhɛ ˈö ˗gban ˗Zlan ˗bha ˗a dɔ ˈpö.
4. ˗Zlan ˈnën ˈö pë ˗nu ˗da.
Pë ˗nu ˈwo ˈˈkpɔnŋ ꞊taa, mɛn ꞊yaa˗ ˗ga ˗ya ö ˗bha ˈˈbin ˗yökë ˈyö ˈwo˗ ˈtɔ bhɔ. ˈˈKɛɛ ˗a ꞊dede bhë ˈde˗ dua ˈdhö ˗mü kö ˗a ˈtɔ ˗yö bhɔ ˗a ˗wɔn ˈgü? ˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
-
˗Mën ˗nu ˈö mɛn ˗nu ˗wa ˗ga ˈˈkpɔnŋ ꞊taa ˈö ˈwo wo ˗bha ˗yökë?
Mɛn ˈnën ˈö ˈkɔ dɔ, ˈˈkɛɛ pë ˈˈpɛpɛ ˈö ˈkwa ˗an yö ˈˈkpɔnŋ ꞊taa, ˈde ˗an ˗da? ˗Ka Eblö 3:4 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
˗Mën ˗nu ˈwo ü ˗dhɛ ˈˈmliisü ˈˈkpɔnŋ ꞊taa?
-
Ü ˗bha ˈgü pë ˗nu ˈwo ˈˈkpɔnŋ ꞊taa ˈö ˈwo dhaŋ˗ ˈgü, mɛn ˈbha ˈnën ˈö ˗an ˗da ˗ee? ˈMën ˗kë ˈü˗ pö ˈˈdhʋ̈?
Ü˗ ˈwɔn ˗dɔ ˗ee?
Kö ˈü ˈdho jw.org ˗ta ü ˗dho ˗kpan ˈsëëdhɛ waa video ˗nu ˈwo ˗gban ˈwɔn ˗gɔ ˈö yö ˗a ˗bha ˗an ˗bha ˗a ˈˈpian ˈwo˗ «˗A ˗damɛn ˗yö ˗dhö ˗ee?» waa «ˈPë mɛn ˗nu ˗wa pö ˈö ˗gban ˗tosɛta ˈgodhɛ ˗bha» ˗kë bhë ˗an ˗ta.
‹ˈKɔ ˈˈpɛpɛ kö ˈdhö, mɛn ꞊në˗ ꞊gban dɔ, ˈsa ˗Zlan ꞊në pë ꞊gban ˈˈpɛpɛ ˗da.›
5. Pë ˈö Biblö ˗ya pö ˈö ˗gban pë ˗da ˗sü ˗bha ˗yö ˈˈpuu.
˗Kɔ ˈö ˈˈsɛ waa ˗tosɛta zü ˗yö dɔ ˗a ˗bha, ˈWunzüdɔdhɛ ˈˈɲan ˈˈgblʋ̈gblʋ̈ 1 ˗ya ˗wɔn ˗blɛɛ. Kwa ꞊mɔɔn˗ ˗bha ˈkwa kwa ˗zo yö ˗a ˗dhɛ ˗ee ɛɛnˈˈ ꞊sua ˗kwɛzlan ˗mü ˗ee? ˗Kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
-
Biblö ˗ya ˗pö ˗Zlan ˗yö ˈˈsɛ waa pë ˈsaadhö ˈwo˗ ˗ta ˗an ˗da ˗dhɛkpaɔyi ꞊dede ˈˈsɔɔdo ˈka ˗ee?
-
Ü ˗bha ˈgü pë ˈö Biblö ˗ya pö ˈö ˗gban pë ˗da ˗sü ˗bha ˗yö gagade ˈka ˈö ˈˈpuu ˗ee? ˈMën ˗kë ˈü˗ pö ˈˈdhʋ̈?
˗Ka ˈWunzüdɔdhɛ 1:1 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
꞊Klaŋ ˈˈgblʋ̈gblʋ̈ ˗nu ˗wa ˗pö ˈˈsɛ waa dhaŋ˗ ˗an züdɔdhɛ ˗yö ˗dhö. Pë ˈwo˗ pö waa Biblö ˈˈɲan ˈü˗ pö bhë ˗wo ˗bɛ ˈkwëë˗ ˗ee?
Mɛn ˈbha ˗nu wo ˗de dhɛɛˈˈ ˗kpɔ ꞊dhɛ ˗Zlan yö ˈti bɔ pë ˗bha ˗gla ö ˗de ˈka ˗sü ˗ta ˈö pë ˗nu ˗da ˗ee? ˗Ka ˈWunzüdɔdhɛ 1:21, 25, 27, NWT ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
Biblö ˗ya ˗pö pë ˗bhaasü do ˈnën ˗Zlan ˗ya ˗da ˈö ˗gla ˈö ˗kë ˈyuö˗, wü ɛɛnˈˈ mɛnbhɩɩdhe ˈka ˗ee? Ɛɛnˈˈ ˗ya ˗pö ˗yö pë «suu» ꞊gban ˈˈpɛpɛ ˗da ˗ee?
6. ˗Kɔ ˈö ˗Zlan ˗yö mɛnbhɩɩdhe ˗da ˗a ˈka ˗a ꞊zuan ˈyaa ˗dhö.
˗Kɔ ˈö Zoova kwa ˗da ˗a ˈka, ˈyaa ꞊dhɛ wü ˗nu ˈdhö. ˗Ka ˈWunzüdɔdhɛ 1:26, NWT ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
ˈDhɛ ˗kë ꞊dhɛ ˗Zlan ˗yö kwa ˗da ö ˗bhɔ ˗bha ˈka, ˈö kwa ˈko ˗nu ˗dhɔ ˗yö kwa ˈko ˗kë, ˈö mɛn ˈˈwɛɛ ˗nu ˗wëë ˗yö kwa ˗kë bhë, ˗mën ˈö˗ ˗zɔn kwa ˗dhɛ ˈö ˗gban ˗Zlan ˗bha?
MƐN ˈBHAA ˗NU ˗WA ˗PÖ: «˗Kwɛzlan ˗nu ˈwo Biblö ˈgü ˈwo ˗gban pë ˗da ˗sü ˗bha bhë ꞊sua ˗mü.»
-
Ü ü ˗bha ˗pö ˗a ˈgü ꞊dhɛ? ˈYö ˗mën ˈö ˗kë?
˗A ˈDHƐ TO KWA ˈˈƝAAN
Zoova ˈnën ˈö ˈˈsɛ waa dhaŋ˗ waa ˈˈtëpë ˈˈpɛpɛ ˈwo˗ ˗ta ˗an ˗da.
˗Zobuödhe
-
˗Mën ˈö Biblö ˗ya pö ˈö ˗gban ˈˈsɛ waa dhaŋ˗ ˗an züdɔdhɛ ˗bha?
-
Pë ˗bhaasü do ˈnën ˈö ˗Zlan ˗ya ˗da ˈö ˗gla ˈö ˗kë pë ˈˈpɛpɛ ˈka ˗ee ɛɛnˈˈ ˗yö pë ꞊gban ˗da ˗ee?
-
ˈMën ˗kë ˈö mɛnbhɩɩdhe ˗nu ˈkwa ˗Zlan ˗dapë ˈkpii˗ ꞊bhlëësü do ˈka?
˗AN ˗GA ˈPÖ
ˈWɔnzuan ˗nu ˈwo˗ ˗zɔn ꞊dhɛ pë ˈˈpɛpɛ ˗damɛn ˗yö ˗dhö bhë ˗an ˗ga.
«Mɛn ˈbha ˈnën ˈˈkpɔnŋtaadhɛ ˗da ˗ee ?» (˗Kwɛ 2006 Sɛtanblö ˗bha ˗Ka ˗ya ka ˈˈɲaan!)
Pë ˈö Biblö ˗ya pö ˈö ˗gban pë ˗da ˗sü ˗bha, ˗kɔ ˈö ˈnëndë do ˗ya ˈgü ˗pʋ ˗a ˈka ö ˗bha ˈnën ˗dhɛ ˗a ˗ga.
Pë ˗bha ˗gla ö ˗de ˈka ˗sü waa pë ˈö Biblö ˗ya pö ˗wo do ˗ee?
Wü ga zii ˗nu waa pë ˈö ꞊klaŋ ˈˈgblʋ̈gblʋ̈ ˗wa ꞊draan, ˗wa ˗zɔn ꞊dhɛ pë ˗nu ˗wo ˗nu wo ˗de ˈka ˗ee, ɛɛnˈˈ ˗Zlan ˈnën ˗an ˗da ˗ee? ˗Bhö ˗a ˗yɔ ˗ga.
Dhɛɛˈˈ ˈˈgblʋ̈gblʋ̈ ˈˈsoodhu ˈö ˈwo ˗gban ˗tosɛta ˗gɔgodhɛ ˗bha (ˈSëëdhɛ ˗be ˈnën)
a ˈPë ˗Zlan ˗zo ˈˈpiʋ̈ mɛnbhɩɩdhe ˗nu ˗bha ˈka, ˈwɔn ˗gɔ 25 ˗ya ˈgü ˗pʋ ˗së ˈka.
