AYÈGÈ 06
Akia afé énying é nga tari?
[Zamba] “a ne étam ya énying” (Salmen 36:9). Ye wò yebe dò? Bevòk ba tsog na énying é nga sò atemtem. Nge a ne nala, bi nga bumelen ane accident. Veda, nge Yéhova Zamba nnye a nga tié énying, tegè selen na a bele nguma nsong’en ngaa se nala? a Ayègè di, wò yi yen é dzom Bibel a nga dzo é bebege mekèè me énying ai amu dzé a ne susuo na bi yebe dò.
1. Akia afé yob ai si bi nga tari?
Bibel a dzo na: “A metari, Zamba a nga tié yob ai si” (Yénésis 1:1). Abui beyem mam be ne king na yob ai si bi nga bi metari. Akia afé Zamba a nga tié biè? A nga belen ai “ngul dzié”—Mfufub nsisim woé—asu yi na a kom é biem bise bi ne a yob ai a si, atitié ai beplanet (Yénésis 1:2).
2. Asu dzé Zamba a nga tié si?
Yéhova “a ndziki tié [si] éwowolé, a nga tié dzò asu yi na bot be tòbò éteré” (Yésaya 45:18). A nga tié si asu yi na bot be nying éteré mbeng ai a kòm ése (Lang’a Yésaya 40:28; 42:5). Beyem mam ba dzo na é ne nkomen akia étam. Ve nyiène si étam ndzò é bele é mam mese ma sili asu yi na mot a nying mbeng.
3. Nselna mbé a ne a zang bot ai betsit?
Amvus yi na a maneya kom si, Yéhova a nga tié énying. A nga kèè dzò dzali ai bilé ai betsit. Amvus ya été, “Zamba a nga tié mot a évegele dzié émen” (Lang’a Yénésis 1:27). Asu dzé mot a ne akia dié étam? Amu a nga komben évegele Zamba, nala té a tilen na a ne dzam vu mefulu moé ane éding ai susuo. Zamba a nga kom fe bia ai ngul ya yègè minkòbò ai ngul ya ding akeng mbòen mam ai mezik. Bia selen ai betsit amu bi ne dzam lugu Nkom waan.
TUENE FAG
Belen ai mendem ma lere na énying é nga tiében, éyòng té hm o ne yebe é dzam Bibel a dzo a bebege akomo yob ai si. Yègè fe akia ya mefulu me bot ma yegele bia abui mam me bebege Zamba.
4. Énying é nga tiében
Éyòng mot binam a kom é dzom zing ya fulen ai é dzom a he bebe a yob ngeki a si, mot té nnye ba ve olugu. Ve za a yeane ai olugu mbol a nga kom é dzom be he vegele? Bebege VIDÉO ai yalen a nsili hi:
-
Biem bifé bot be nga kom mbol be nga bebe bikokomega bi Zamba?
Mot zing nnye a nga vegele nda a long fe dzò. Ve za a nga vegele a long fe é biem bise bi ne a yob ai a si? Lang’a Hébréa 3:4 ai yalen minsili mi tsaa mi:
-
Ékokomega éfé ya yob ngeki a si ya bò wò na o tòbò a minkamen?
-
Ye a ne susuo ya yebe na mot zing nnye a nga tié yob ai si ai é biem bise bi ne éteré? Asu dzé?
Ye o mbe yeme dò?
O ne sòm minyegelen ai bevidéo bia kòbò dzam té a jw.org mevom me ne minlo medzo na “Évolution ou création?” ai “Points de vue sur l’origine de la vie.”
“Amu nda ése é bele mot a nga long dzò, ve nlong ya biem bise a ne Zamba”
5. Bi ne dzam yebe nlang Bibel asu akomo yob ai si
A Yénésis kaptel 1, Bibel a lèè metari me si ai énying. Ye bi ne dzam yebe nlang té, ngeki na o ne ve nkana? Bebege VIDÉO ai yalen minsili mi tsaa mi:
-
Ye Bibel a yegele na si ai énying bi nga tiében a tang melu mesamen, mmos mbòk o toa mewola 24?
-
Ye wò tsog na nlang akomo yob ai si o ne tetele akia yi na be toa wò dzam yebe ngaa? Asu dzé?
Lang’a Yénésis 1:1 ai yalen a nsili hi:
-
Beyem mam ba dzo na yob ai si bi nga bi metari. Ye ntsogen waba wa toben ai é dzom o ndem lang a Bibel?
Bot bevòk ba sili nge Zamba a nga belen ai é biem bi nga kui atemtem asu yi na a tié énying. Lang’a Yénésis 1:21, 25, 27 ai yalen minsili mi tsaa mi:
-
Ye Bibel a yegele na Zamba a nga man kom dzom ndò a nga ke a tséndé nyòl é kèè veng’en kòs, amvus é ntoa tsit, a memana é ntoa mot? Ngeki na Zamba a nga tié énying “mekia mekia”? b
6. Bot be ne bikokomega bi Zamba bi ne akia étam
Yéhova a nga kom bia nselna ai betsit. Lang’a Yénésis 1:26 ai yalen a nsili hi:
-
Bi bele ngul yi na bia lere éding dzaan ai fulu ngòl. Mbol bi ne nkomen évegele Zamba, dzé nala wa yegele bia é bebege nyè?
ABUI BOT DA DZO NA: “Nlang akomo yob ai si o ne nkana.”
-
Mfaa woé wò yen ya? Asu dzé?
OBALBAS
Yéhova a nga tié yob ai si ai kan énying ése.
Dzé bia baala
-
Dzé Bibel a yegele é bebege metari me yob ai si?
-
Ye Zamba a nga dzogè na man dzom a nang asu yi na a zu sò kom énying ai dzò, ngeki na a nga kom biem bise?
-
Asu dzé bot be ne bikokomega bi ne akia étam?
O NE FE BEBE
Memvulna ma lere na yob ai si bi bele Nkom.
Ésia a timi man mòngò woé akia ya yob ai si bi nga tiében.
Ye nyegelen wa dzo na biem bi nga kui atemtem wa toben ai é dzam Bibel a dzo?
“Dieu s’est-il servi de l’évolution pour créer les différentes formes de vie?” (Nlo adzo a jw.org)
Ye feg beyem mam ya lere na énying é nga tiében ngeki na é nga sò atemtem?
Cinq questions à se poser sur l’origine de la vie (nsò kalara)
