ADZESUA 06
Nkwa Sii Dɛn Bae?
“[Nyankopɔn] nkyɛn na nkwa nsunyiwa wɔ.” (Ndwom 36:9) Aso egye dɛm asɛm yi dzi? Nyimpa binom susu dɛ nkwa bae ara kwa, na nnyɛ obiara na ɔbɔe. Sɛ dɛm na asɛm no tse dze a, nna ɔkyerɛ dɛ yɛtse nkwa mu ara kɛkɛ. Naaso sɛ Jehovah Nyankopɔn na ɔbɔɔ nkwa dze a, nna ɔno ɔkyerɛ dɛ siantsir bi ntsi na ɔbɔe, anaa ɔnntse dɛm? a Susu dza Bible no ka fa bea a nkwa fi bae nye siantsir a ntseasee wɔ dza Bible no ka no mu no ho hwɛ.
1. Amansan no sii dɛn bae?
Bible no ka dɛ: “Ahyɛse no Nyankopɔn bɔɔ sor nye asaase.” (Genesis 1:1) Abɔdzenyansahufo pii gye to mu dɛ amansan yi wɔ ahyɛse. Nyankopɔn sii dɛn bɔe? Ɔdze no tum a ɔdze yɛ adze no—no sunsum krɔnkrɔn no—na ɔdze yɛɛ biribiara a ɔwɔ amansan yi mu a nworabakuw, nworaba na ekyin-nworaba nyina so ka ho.—Genesis 1:2.
2. Ebɛnadze ntsi na Nyankopɔn bɔɔ asaase no?
Jehovah ‘ammbɔ asaase no pan, ɔhyehyɛe ma wɔaatsena mu.’ (Isaiah 45:18) Ɔbɔɔ hɛn asaase yi dɛ ɔnyɛ bea a ɔyɛ ahomka a nyimpa botum atsena daa. (Kenkan Isaiah 40:28; 42:5.) Abɔdzenyansahu da no edzi dɛ asaase no yɛ soronko. Ɔno nkotsee nye ekyin-woraba a woehu dɛ nkwa botum atsena do.
3. Ebɛnadze na ɔma nyimpa da nsew fi mbowa ho?
Jehovah yɛɛ asaase no wiei no, ɔbɔɔ nkwa wɔ do. Odzi kan, ɔdze nduadzewa na mbowa hyɛɛ asaase no do ma. Afei, “Nyankopn bɔɔ nyimpa wɔ nankasa no su do.” (Kenkan Genesis 1:27.) Ebɛnadze na ɔma nyimpa yɛ soronko? Osiandɛ wɔbɔɔ hɛn wɔ Nyankopɔn no su do ntsi, yetum da no suban ahorow tse dɛ ɔdɔ na atsɛntsenenee edzi. Bio so, ɔbɔɔ hɛn wɔ kwan bi do a yebotum esua kasa ahorow, ehu ndzɛmba a ɔyɛ fɛw, na yaatse ndwom ne dɛw. Mbowa runntum nnsom Nyankopɔn, naaso nyimpa dze yebotum asom no na yaafa no nyɛnko.
PƐNSAPƐNSA MU KƆ EKYIR
Ma yensusu dase ahorow a ɔkyerɛ dɛ obi na ɔbɔɔ nkwa no ho, nye siantsir a yebotum agye dza Bible no ka fa adzebɔ ho no edzi. Ma yɛnhwɛ mbrɛ suban ahorow bi a nyimpa wɔ no kyerɛ hɛn biribi fa Nyankopɔn ho.
4. Wɔbɔɔ nkwa
Sɛ nyimpa hwɛ abɔdze do yɛ biribi a, wɔgye ho enyimnyam. Ntsi woana na ɔwɔ dɛ wɔdze abɔdze no ankasa ho enyimnyamhyɛ ma no? Ma yɛnhwɛ VIDEO no, na yensusu asɛmbisa a odzi do no ho.
-
Ebɛn ndzɛmba ahorow na nyimpa ahwɛ abɔdze do ayɛ?
Fie biara obi na osi. Ntsi woana na ɔyɛɛ ndzɛmba ahorow a ɔwɔ amansan yi mu no nyinara? Ma yɛnkenkan Hebrewfo 3:4, na yensusu nsɛmbisa yi ho:
-
Ebɛn ndzɛmba ahorow na w’enyi gye ho wɔ abɔdze mu?
-
Ana nyansa wɔ mu dɛ yɛbɛgye edzi dɛ obi na ɔbɔɔ amansan yi na biribiara a ɔwɔ mu no? Ebɛnadze ntsi a?
Ana Inyim?
Ibotum enya dza yerususu ho yi ho nsɛm na video ahorow wɔ jw.org do wɔ ɔfa a wɔato dzin “Aso Wɔbɔe?” nye “Nsɛm A Nkorɔfo Ka Fa Beebi A Nkwa Fi Bae Ho.”
“Na ofi biara obi na osi; na nyia osii adze nyina nye Nyankopɔn.”
5. Yebotum agye dza Bible no ka fa adzebɔ ho no edzi
Wɔ Genesis tsir 1 no, Bible no kyerɛ mbrɛ ɔyɛe a asaase no nye nkwa a ɔwɔ do no bae. Aso ibotum agye dɛm asɛm no edzi, anaa ɔyɛ anansesɛm bi kɛkɛ? Ma yɛnhwɛ VIDEO no, na yensusu nsɛmbisa a odzidzi do no ho.
-
Aso Bible no kyerɛkyerɛ dɛ wɔdze nda esia a no mu biara yɛ ndɔnhwer 24 na wɔdze bɔɔ asaase yi nye abɔdze a nkwa wɔ mu a ɔwɔ do no nyinara?
-
Dza Bible no ka fa adzebɔ ho no, ehwɛ a ntseasee wɔ mu, na yebotum agye edzi? Ebɛnadze ntsi na ereka dɛm?
Ma yɛnkenkan Genesis 1:1, na yensusu asɛmbisa yi ho:
-
Abɔdzenyansahufo ka dɛ hɛn amansan yi wɔ ahyɛse. Sɛ edze dza wɔka no toto dza yɛakenkan wɔ Bible mu seseiara no ho a, ihu no dɛn?
Nyimpa binom adwen yɛ hɔn dɛ gyama Nyankopɔn nam adandandzi do na ɔbɔɔ nkwa. Ma yɛnkenkan Genesis 1:21, 25, 27, na yensusu nsɛmbisa yi ho:
-
Ana Bible no kyerɛkyerɛ dɛ Nyankopɔn bɔɔ nkwabowa kor bi na ekyir yi ɔdandanee bɛyɛɛ mbowa na nyimpa? Anaa ɔbɔɔ abɔdze ahorow a nkwa wɔ mu no nyinara dɛ mbrɛ hɔn “su” tsetsee? b
6. Nyimpa yɛ Nyankopɔn n’abɔdze a ɔyɛ soronko
Yɛnntse dɛ mbowa a Jehovah bɔɔ hɔn no. Ma yɛnkenkan Genesis 1:26, na yensusu asɛmbisa yi ho:
-
Osiandɛ wɔbɔɔ hɛn wɔ Nyankopɔn no su do ntsi, yetum da ɔdɔ na ayamuhyehye edzi. Iyi ma yehu dɛ Nyankopɔn so wɔ ebɛn suban?
BINOM KA DƐ: “Dza Bible no ka fa adzebɔ ho no yɛ anansesɛm.”
-
Edwen ho dɛn? Ebɛnadze ntsi a?
DZA ESUA
Jehovah na ɔbɔɔ amansan yi na biribiara a nkwa wɔ mu no.
Mbobɔdo
-
Ebɛnadze na Bible no kyerɛkyerɛ fa mbrɛ hɛn amansan yi sii bae no ho?
-
Aso Nyankopɔn bɔɔ nkwabowa kor bi na ekyir yi ɔdandanee bɛyɛɛ abɔdze ahorow a nkwa wɔ mu nyinara, anaadɛ ɔbɔɔ abɔdze ahorow a nkwa wɔ mu no nyina?
-
Ebɛnadze na ɔma nyimpa yɛ soronko?
HWEHWƐ PII KA HO
Hwɛ abɔdze ahorow a ɔma yehu dɛ Ɔbɔadze bi wɔ hɔ.
Hwɛ mbrɛ egya bi botum akyerɛkyerɛ dza Bible no ka fa adzebɔ ho mu no akyerɛ ne ba banyimba.
Hwɛ dɛ adandandzi nye Bible no hyia anaa.
“Aso Nyankopɔn Nam Adandandzi Do Na Ɔbɔɔ Ndzɛmba A Nkwa Wɔ Mu No Nyina?” (Asɛm bi a ɔwɔ wɛbsaet do)
Hwɛ dɛ dza abɔdzenyansahufo nhwehwɛmu da no edzi no ma yehu dɛ wɔbɔɔ nkwa anaadɛ ɔbae ara kwa.
a Adzesua 25 no bɛka siantsir a Nyankopɔn bɔɔ adasamba no ho asɛm.
b Wɔ Bible mu no, kasafua “su” kyerɛ abɔdze a nkwa wɔ mu ahorow pii.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
