LESONI 06
E Tekivu Vakacava na Bula?
“E tu [vua na Kalou] na ivurevure ni bula.” (Same 36:9) O vakabauta qori? Eso era nanuma ni sega ni dua na Dauveibuli. Ke dina qori, kena ibalebale nida basika ga mai vakasauri. Ia ke vakarautaka na bula na Kalou o Jiova, kena ibalebale ni na vakainaki, se vacava? a Vakasamataka mada na ka e kaya na iVolatabu me baleta na itekitekivu ni bula kei na vuna meda vakabauta kina.
1. E tekivu vakacava na lomalagi kei na vuravura?
E kaya na iVolatabu: “Ena ivakatekivu, e bulia na lomalagi kei na vuravura na Kalou.” (Vakatekivu 1:1) Era duavata e levu na saenitisi ni tiko na itekitekivu ni lomalagi kei na vuravura. E bulia vakacava na Kalou? E vakayagataka nona “igu kaukaua,” oya nona yalo tabu me bulia na ka kece e tu kina, me vaka na isoso kalokalo kei na vuravura tale eso.—Vakatekivu 1:2.
2. Na cava e bulia kina na Kalou na vuravura?
O Jiova “e sega ni bulia me lala [na vuravura], e bulia ga me tawa.” (Aisea 45:18) E bulia na vuravura me noda itikotiko tudei, meda qai bula vakacegu kina. (Wilika Aisea 40:28; 42:5.) E vakaraitaka na veika vakasaenisi ni vakatubuqoroqoro na noda vuravura. Qo na vuravura duadua ga e rawa ni bula kina na tamata.
3. Na cava eda duatani kina vei ira na manumanu?
Ni bulia oti o Jiova na vuravura, e bulia sara na veika bula. E bulia e liu na kau kei na manumanu. Oti “e qai bulia na tamata na Kalou me rau veiucui.” (Wilika Vakatekivu 1:27.) Na cava eda duatani kina na tamata? Nida buli meda ucuya na Kalou, eda rawa ni vakatotomuria na nona itovo me vaka na loloma kei na lewadodonu. E buli keda tale ga meda rawa ni vulica eso tale na vosa, qoroya na veika totoka da qai marautaka na ivakatagi. Kena ikuri, eda rawa ni sokaloutaka na Dauveibuli, na ka e sega ni cakava rawa na manumanu.
VAKEKELI
Raica na ivakadinadina ni buli na veika bula qai donu vinaka na itukutuku ni iVolatabu me baleta na bulibuli. Na itovo cava ni tamata e vakaraitaka na itovo ni Kalou?
4. Buli na veika bula
Era vakacerecerei na kenadau nira vakatotomuria na ibulibuli ni veika bula. Ia o cei dina me vakacerecerei? Sarava na VIDIO, qai veivosakitaka na taro tarava.
-
Na cava era vakatotomuria na kenadau ena veika bula?
Na vale kece e tiko na kena peleni kei koya e tara. Ia o cei e vakasamataka qai bulia na veika bula? Wilika Iperiu 3:4 qai veivosakitaka na taro qo:
-
Na cava o qoroya me baleta na ibulibuli ni veika bula?
-
Vakacava e ka vakayalomatua mo vakabauta ni buli na ka kece ena lomalagi kei na vuravura? Na vuna?
O bau kila?
O rawa ni raica na ulutaga kei na vidio ena usutu qo ena jw.org ena iwasewase “Bula Vakaidewadewa se Buli?” kei na “Rai Me Baleta na iTekitekivu ni Bula.”
“E macala gona ni tiko o koya e tara na vale yadua, ia o koya e tara na ka kece ga na Kalou”
5. E tiko na yavu vinaka meda vakabauta kina na itukutuku ni bulibuli
Ena Vakatekivu wase 1, e vakamacalataka na iVolatabu na itekitekivu ni vuravura kei na veika bula era tu kina. O vakabauta na itukutuku qori se o nanuma ni italanoa lasu ga? Sarava na VIDIO, qai veivosakitaka na taro tarava.
-
Vakacava e kaya na iVolatabu ni a buli na lomalagi kei na vuravura kei na veika e tu kina ena ono ga na siga e 24 na kena aua?
-
O nanuma ni rawarawa qai matata na ka e kaya na iVolatabu me baleta na bulibuli? Na vuna?
Wilika Vakatekivu 1:1, qai veivosakitaka na taro qo:
-
Era kaya na saenitisi ni tiko na itekitekivu ni lomalagi kei na vuravura. E veisemati vacava qo kei na ka o wilika ena iVolatabu?
Eso era nanuma ni vakayagataka na Kalou na bula vakaidewadewa me buli kina na veika bula. Wilika Vakatekivu 1:21, 25, 27, qai veivosakitaka na taro qo:
-
Vakacava e kaya na iVolatabu ni bulia na Kalou na sela somidi lailai qai vakalaiva me dewa me ika, manumanu kei na tamata? Se a bulia na veika bula kece me vaka na kedra “mataqali”? b
6. Duatani duadua na tamata ena ibulibuli ni Kalou
Eda sega ni vaka na manumanu e bulia o Jiova. Wilika Vakatekivu 1:26, qai veivosakitaka na taro qo:
-
Nida buli meda ucuya na Kalou, na cava eda vulica me baleta nona itovo nida vakaraitaka na loloma kei na veinanumi?
KA ERA KAYA ESO: “E italanoa ga na itukutuku ni iVolatabu me baleta na bulibuli.”
-
Na cava o nanuma? Na vuna?
KA O VULICA
E bulia o Jiova na lomalagi kei na vuravura kei na ka bula kece.
Railesuvi
-
Na cava e kaya na iVolatabu me baleta na itekitekivu ni lomalagi kei na vuravura?
-
E vakalaiva na Kalou me dewa na veika bula mai na sela somidi, se a bulia kece?
-
Na cava eda duatani kina na tamata?
IKURI
Raica ena veika bula ni tiko na Dauveibuli
“Na Veika Bula—Cava Eda Vulica Kina?” (Yadra!, Seviteba 2006)
Raica nona vakamacalataka e dua na tama na itukutuku ni ibulibuli vua na luvena.
Dikeva mada ke rau donu ruarua na bula vakaidewadewa kei na iVolatabu.
Dikeva ke bula vakaidewadewa se buli na veika era kunea na saenitisi.
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
