LÈSON 06
Kijan lavi fè ka ègzisté ?
Sé Bondyé « ki kréyé tout biten » (Révélasyon 4:11). Ès ou ka kwè sa ? Ni sèwten moun ki ka konprann kè lavi enn parèt konsa. Si sé sa, sa vé di kè sé lachans ki fè si nou la. Men si sé Bondyé ki kréyé lavi sé pou on bon rézon menm a. Adan lèson-lasa, nou ké vwè ka Labib ka di pou èspliké kijan lavi fè parèt. Anplisdisa, nou ké vwè poukwa nou pé ni konfyans adan sa i ka di.
1. Kimoun ki kréyé linivè ?
Mi sa Labib ka di : « Okoumansman, Bondyé kréyé lèsyèl é latè » (Jénèz 1:1). Prèskè tout sé syantifik-la dakò pou di kè linivè ni on koumansman. Kijan Bondyé kréyé-y ? I itilizé lèspri sen a-y, kivédi « fòs a-y lèwvwè i ka sèvi èvè-y » pou i té fè tousa ki adan linivè kon sé galaksi-la, sé zétwal-la é sé planèt-la (Jénèz 1:2).
2. Poukwa Bondyé kréyé latè ?
Jéova ‘pa kréyé latè pou ayen men i fè-y pou moun pé sa rété anlè-y’ (Izayi 45:18). I fè latè pou nou pé sa viv adoumanman anlè-y é pou touttan (li Izayi 40:28 é 42:5). Dapré sa lasyans ka di, pa ni pon planèt ki kon latè. Sé-y tousèl ki ni tousa ki fo pou on nonm pé sa rété vivan.
3. Ki diférans ki ni ant on nonm é on bèt ?
Lè Jéova fin kréyé latè, i mèt lavi anlè-y. I koumansé pa kréyé sé plant-la é sé zannimo-la. Aprésa, « Bondyé mété-y ka kréyé lòm pòtré a-y » (li Jénèz 1:27). Poukwa lézòm pa menm biten ki sé bèt-la ? Konm nou fèt pòtré a Bondyé, nou ka rivé imité kalité a-y kon lanmou é lajistis. Grasa-y, nou ka rivé aprann plizyè lang, nou ka pran plézi gadé bèl biten ki ka ègzisté é nou ka aprésyé bèl mizik nou ka tann. Men anplisdisa, nou ka rivé fè on biten sé zannimo-la pé pa fè : nou ka adoré Kréyatè an nou é nou pé vin bon bon zanmi èvè-y.
AN-NOU FOUYÉ PI FON
An-nou ègzaminé déotwa prèv ki ka montré kè lavi pa enki parèt konsa men kè ni on moun ki kréyé-y. An-nou vwè osi kè lè Labib ka èspliké kè sé Bondyé ki kréyé tout biten, nou pé fè-y konfyans. Anplisdisa, an-nou vwè ka sé kalité-la nou ni la ka aprann-nou asi Bondyé.
4. Sé kréyé yo kréyé lavi
Lè on moun ka imité on biten ki adan lanati pou i pé sa fabriké ondòt biten, byensouvan, yo ka pòté-y anlè. Men kimoun ki kréyé sa i kopyé la ? Ès a pa moun-lasa ki pi mérité yo pòté-y anlè ? Gadé VIDÉO-la é fè on ti kozé asi kèsyon-la ki ka vin la :
-
Lézòm kréyé sèwten biten dapré sa yo vwè adan lanati. Ès ou pé bay déotwa ègzanp ?
On kaz pé pa fèt tousèl a-y. Sé on moun ki konstwi-y. Men kimoun ki kréyé é ki konstwi sa ki adan lanati ? Li Ébré 3:4 é fè on ti kozé asi sé kèsyon-lasa :
-
Lè ou ka gadé sa ki adan lanati, ki biten ou ka touvé fò toubònman ?
-
Si on moun ka kwè kè yo kréyé linivè é tousa ki adan-y, ès ou ka di sa lojik ? Poukwa ou ka di sa ?
Ès ou té sav sa ?
Asi jw.org, ou pé touvé déotwa awtik é déotwa vidéo ki ka palé dè sijé-lasa adan « Évolution ou conception ? » é « Points de vue sur l’origine de la vie ».
« Pas tout kaz ni on moun ki fè-y, men moun-la ki kréyé tout biten sé Bondyé. »
5. Lè Labib ka èspliké kijan Bondyé kréyé tout biten, ou pé kwè-y
An Jénèz chapit 1, Labib ka èspliké-nou kijan Bondyé kréyé latè é kijan i kréyé lavi. Ès nou pé kwè adan sa Labib ka di oben ès sé pawòl ankouyonnad i ka rakonté ? Gadé VIDÉO-la é fè on ti kozé asi sé kèsyon-la ki ka vin la :
-
Ès Labib ka di kè Bondyé kréyé latè é lavi an sis jou a 24 è ?
-
Lè ou ka li sa Labib ka di pou èspliké kijan Bondyé kréyé tout biten, ès ou ka touvé sa lojik é ès ou pé kwè sa ? Poukwa ou ka di sa ?
Li Jénèz 1:1 é fè on ti kozé asi kèsyon-lasa :
-
Sé syantifik-la ka di kè linivè ni on koumansman. Ès sa yo ka di la annakò èvè sa ou sòti li an Bib-la ?
Ni sèwten moun ki ka mandé-yo si a pa èvè lévolisyon Bondyé sèvi pou i té pé sa kréyé lavi. Li Jénèz 1:21, 25, 27 é fè on ti kozé asi sé kèsyon-lasa :
-
Ès Labib ka di kè Bondyé sèvi èvè lévolisyon pou i té pé sa fè-nou, pou i té fè sé pwason-la é sélézòt zannimo-la ? Oben ès Labib ka anségné kè Bondyé kréyé tout sé gran « èspès-la » dirèktèman ?
6. Lòm sé on kréyati ki èstraòwdinè. Pa ni 2 kon-y
Jéova pa kréyé-nou menmjan ki sé zannimo-la. Li Jénèz 1:26 é fè on ti kozé asi kèsyon-lasa :
-
Nou ka rivé montré moun ki alantou an nou kè nou enmé-yo é kè nou ni konpasyon pou yo. É kon nou ni lokazyon vwè, nou fèt pòtré a Bondyé, alò ka sa ka aprann-nou asi Bondyé ?
MI SA MOUN KA DI : « Lè Labib ka palé dè lakréyasyon sé tim-tim-bwasèk i ka rakonté. »
-
Ka ou ka pansé dè sa ? Poukwa ou ka di sa ?
ON TI RÉZIMÉ
Sé Jéova ki kréyé linivè é tout biten ki vivan.
Ka ou woutyenn
-
Ka Labib ka di pou èspliké kijan linivè fè parèt ?
-
Ès sé kréyé Bondyé kréyé-nou oben ès i sèvi èvè lévolisyon pou i té fè-nou, pou i té fè sé pwason-la é sélézòt zannimo-la ?
-
Poukwa lòm sé on kréyati ki èstraòwdinè toubònman ?
AY GADÉ SA OSI
Mi déotwa ègzanp ki ka montré kè ni on moun ki kréyé lanati.
« Qu’enseigne la nature ? » (Réveillez-vous ! a sèptanm 2006)
An-nou vwè kijan on papa ka èspliké tigason a-y sa Labib ka di anrapò èvè lakréyasyon.
Ès lévolisyon annakò èvè sa Labib ka di ?
Gadé si sé èskèlèt-la sé awkéològ-la touvé la oben si sé èkspéryans-la sé syantifik-la ka fè la ka montré kè sé kréyé yo kréyé lavi oben kè i enn parèt konsa.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
