ʼƗKITƗARIKA 06
¿Ketiuné tuukaari?
«ʼAheetsíe [Yuútsi] tuukaari pɨyeneika» (Salmo 36:9). ¿ʼEkɨ mɨkɨtsíe petiʼerie? Hiipatɨ teuteri mepɨteʼerie kenaame tuukaari yuxaɨtá ʼuné, xewitɨ kenaame kaʼinetɨa. Xɨka xewitɨ katatsiʼunetɨani, kamɨtsɨ́ yakɨ xeikɨ́a ʼeena tekwaneuʼuwa. Xɨka Jehová tuukaari ʼunetɨani, ʼaixɨ tiʼaneneeme taheetsíe pɨreuyehɨwá, ¿waʼatɨ? a Neuxeiya Yuútsi niukieyatsíe kemaine, tuukaari kemɨrané metá tineukaxeiya titayari mɨkɨtsíe pemɨtiʼerieka.
1. ¿Universo kerané?
Biblia paine: «Matɨari paitɨ, Yuútsi mɨyuawi metá kwie kaniutawewieni» (Génesis 1:1). Waɨkawa científicotsixi mepɨteʼerie kenaame universo ʼunetɨarie. ¿Kehepaɨ Yuútsi universo tiuwewi? Mɨkɨ pɨtiunetɨa yutɨrɨkariya mɨkayuhekɨakɨ, pɨtiutiwewi kwie metá naime mɨyuawitsíe mɨtixuawe (Génesis 1:2).
2. ¿Titayari Yuútsi kwie tiutawewi?
Jehová «makumawenikɨ mɨkaʼitawewi, mitawewi mana mɨkiepatɨnikɨ» (Isaías [Kitsariyaxi] 45:18). Mɨkɨ takwie witsiʼaneme putawewi mana temɨtitenikɨ heyeme (nakaterɨwa Isaías 40:28 metá 42:5). Científicotsixi meputiyuane Kwie xeikɨ́a witsipɨʼane. Takwietsíe xeikɨ́a naime tepɨteʼukaxexeiya tita temɨteheuyehɨwá.
3. ¿Titayari teuteri, yeutari wahepaɨ mekateheukuwewiyatɨká?
Kwierí ʼutawewieka, Jehová tuukaari punetɨa. Meri, pɨtiunetɨa ʼiteɨrite metá yeutari. ʼAriketá «Yuútsi tewi kaniutawewieni yuhepaɨ tiukaʼiyaarime» (nakaterɨwa Génesis 1:27). ¿Titayari yeutari wahepaɨ tekateʼanene? Yuútsi mɨtatsiʼutiwewikɨ hepaɨna teteuʼiyaarime, tepikuhekɨatá temɨteuyukanakiʼerietsíe metá temɨteuyukanenimayatsíe. Tsiere pɨtatsiʼutiwewi waɨkawa niuki teheutamaiwaweme, tetexeiyawaweme mɨtixuawe ʼaixɨ mɨreukuwewiyatɨká metá kwikari tatsinakeme. Taame tepɨyɨwawe Tawewiekame temayexeiyani, yeutaritá hawaikɨ.
MATSI WAƗKÁ TINETIMAʼÍ
Paatsɨ́ hiipame tepɨtexeiya tita Yuútsi naime mɨtiunetɨa, metá titakɨ yuri teteʼerieka Yuútsi niukieya kemáinekɨ mɨtiunetɨatsíe. Tita tetehetimaiwawe Yuútsi heetsíe teuteri kememɨteʼuʼiyaari.
4. Mɨtixuawe xewitɨ pɨtiutiwewi
Hiipatɨ teuteri yuheetsíe mepɨteʼuhɨpa meteʼakaʼɨketɨ mɨtiwewiyatɨká mɨtixuawetsíe. ¿Keanetá rixɨ́a pɨrekema mɨtiunetɨakɨ? VIDEO xeneuxeiya metá xeteneutixaata ʼikɨtsíe:
-
¿Tita meteʼakaʼɨke teuteri kwiepa mɨtiwewiyatɨká mɨtixuawe?
Naitɨ kí pɨtixuawe xewitɨ ʼitiwewieku. Mɨɨtá ¿keane tiuyurieku metá tiutiwewieku naitɨ pɨtixuawe ʼeena kwiepa? Xenakaterɨwa Hebreos 3:4 metá xeteneutixaata ʼikɨtsíe:
-
¿Tita matsi waɨkawa metinake Yuútsi mɨtiutiwewi?
-
¿Teteʼutiyuawe kenaame tita universotsíe mɨtixuawe xewitɨ tiutiwewi? ¿Titayari?
¿Peramaikái?
Jw.org pepɨtikaxeiya xapate metá video ʼikɨtsíe tikuxatame. Keneutiwawá mainetsíe «¿Xewitɨ mɨkɨ tiunetɨa?» metá «Hiipatɨ kememutiyuane tuukaari kemɨtiuyutsutɨatsíe».
«Pɨtiyuri, kí pɨxuawe xewitɨ ʼitiwewieku, keanetá naime mɨtiutiwewi Yuútsi pɨhɨɨkɨ».
5. Biblia kemaine mɨtiwewiyatɨkatsíe pɨyɨwe yuri temɨteʼerieka
Bibliatsíe mayemié, Génesis ʼamɨpá 1 pɨraxaxaata kemɨtiuwewiya Kwie metá tuukaari mana mɨtixuawe. ¿Tiyuri mɨkɨtsíe temɨteʼerieka, nutsɨ xeikɨ́a teuteri kememutiyuane? VIDEO xeneuxeiya metá xeteneutixaata ʼikɨtsíe:
-
¿Biblia tikuʼɨkita kenaame Kwie metá heetsiena mɨtixuawe, ʼutawewiya 6 tuukaari nutsɨ 144 horas?
-
¿Bibliatsíe ketemɨteʼuterɨwaxɨ mɨtiwewiyatɨkatsíe reyutiʼenierietɨyeika? ¿Títakɨ?
Xenakaterɨwa Génesis 1:1 metá xeteneutixaata ʼikɨtsíe:
-
Científicotsixi meputiyuane universo puyutsutɨa. ¿Científicotsixi kememutiyuane Biblia mɨpaɨ raine pemɨrakaterɨwaxɨtsíe hepaɨ?
Waɨkawa teuteri mepɨteyukuʼiwawiya xɨka Yuútsi evoluciontsíe tiuyurieni tuukaari mɨnetɨanikɨ. Xenakaterɨwa Génesis 1:21, 25, 27 metá xeteneutixaata ʼikɨtsíe:
-
¿Biblia tikuʼɨkita kenaame Yuútsi evoluciónkɨ warutiwewi ketsɨte, yeutari metá teuteri? ¿Nutsɨ pɨtiutiwewi yɨɨkɨ meteʼaneneeme?
6. Yuútsi yeme yɨɨkɨ pɨtatiuwewi
Yeutari wahepaɨ Jehová pɨkatatiuwewi. Xenakaterɨwa Génesis 1:26 metá xeteneutixaata ʼikɨtsíe:
-
Teuteri tepuhekɨatawe nakiʼeriya metá hiipame tepɨwaretiʼenietɨkɨniwe, yatepɨtekuyuruwa Yuútsi yuhepaɨ mɨtatiuwewikɨ. ¿ʼIkɨ Jehová heetsíe kemetikuʼɨkitɨwa?
HIIPATƗ KEMEMUTIYUANE: «Biblia kemayetaine mɨtiwewiyatɨkatsíe yuri tepɨkateʼiʼeririeka».
-
¿ʼEkɨ kepehaine? ¿Titayari?
TITA PEMƗRETIMÁ
Jehová pɨtiuneetɨa mɨyuawitsíe mɨtixuawe metá naime kwiepatsíe mɨrayeneniere.
Mɨrayeʼerieni
-
¿Biblia ketikuʼɨkita universo kemɨtiunetsíe?
-
¿Yuútsi tuukaari tiunetɨa evoluciónkɨ nutsɨ mɨkɨ naime pɨtiutiwewi?
-
¿Títakɨ yeme Yuútsi yɨɨkɨ tatiuwewi?
MATSI WAƗKÁ TINEUKAXEIYA
Tineuxeiya hiipame mɨtiwewiyatɨká mɨtikuhekɨkɨata kenaame xewitɨ tiutiwewi.
«¿Ketatikuʼɨkitɨwa mɨtiwewiyatɨká?» (¡Despertad!, septiembre de 2006)
Tineuxeiya xewitɨ yuniwé kemɨtikuʼɨkitɨwa Yuútsi niukieyakɨ mɨtiwewiyatɨkatsíe.
Tinetimaʼí xɨka evolución kemɨtikuʼɨkita Biblia mɨpaɨ haineni.
«¿Yuútsi evolucionkɨ yɨɨkɨ memɨteʼanene memɨteʼayeneniere tiwarutiwewi?» (Artículo de jw.org)
Tinetimaʼí xɨka ʼuumetetsíe memɨteyuʼɨkitɨa metá científicotsixi metekuhekɨkɨatani kenaame tuukaari xeikɨ́a ʼuné nutsɨ xewitɨ ʼinetɨa.
Tuukaari kemɨtiuné. ʼAixɨ pɨʼane tiʼauxuwime ʼiwaurikatetsíe temɨteʼakumaiká (Folleto)
a ʼƗkitɨarika 25tsíe pɨraxaxaata Yuútsi kemɨtiyurieni teuteri waheetsíe mieme.
