LEKSION 06
Paano Nagsugod ang Kabuhi?
“[Ang Dios] ang ginahalinan sang kabuhi.” (Salmo 36:9, Ang Pulong sang Dios, APD) Nagapati ka bala sina? Ang iban nga tawo nagapati nga wala kita gintuga. Kon matuod ina, buot silingon nagtuhaw lang kita. Pero kon gintuga ni Jehova nga Dios ang kabuhi, buot silingon may katuyuan ini, indi bala? a Binagbinaga ang rekord sang Biblia parte sa ginhalinan sang kabuhi, kag kon ngaa mapatihan ini.
1. Diin naghalin ang uniberso?
Ang Biblia nagasiling: “Sa ginsuguran gintuga sang Dios ang langit kag ang duta.” (Genesis 1:1) Kalabanan nga scientist nagapati nga may ginhalinan ang uniberso. Paano ini gintuga sang Dios? Gingamit niya ang iya “aktibo nga puersa” ukon ang iya balaan nga espiritu, para himuon ang uniberso lakip ang mga galaksiya, bituon, kag mga planeta.—Genesis 1:2.
2. Ngaa gintuga sang Dios ang duta?
Si Jehova “wala nagtuga [sang duta] sa wala sing pulos, kundi nagbuhat sini agod puy-an.” (Isaias 45:18) Ginhimo niya ang aton planeta para mangin komportable kag permanente nga ilistaran sang mga tawo. (Basaha ang Isaias 40:28 kag 42:5.) Siling sang mga scientist, ang aton duta lain gid sa iban nga planeta. Kay amo lang ini ang planeta nga mabuhi ang tawo.
3. Ngaa lain gid ang mga tawo sangsa mga sapat?
Sa tapos ginhimo ni Jehova ang duta, gintuga niya ang tanan nga buhi nga butang sa sini. Una, gintuga niya ang mga tanom kag mga sapat. Dayon, “gintuga sang Dios ang tawo suno sa larawan niya.” (Basaha ang Genesis 1:27.) Ngaa lain gid ang mga tawo? Gintuga kita sang Dios suno sa larawan niya, gani mapakita naton ang iya mga kinaiya, pareho sang gugma kag hustisya. Gintuga niya kita nga may abilidad sa pagtuon sang mga lenguahe kag manamian sa matahom nga mga butang kag musika. Kag indi pareho sa mga sapat, masimba naton ang aton Manunuga.
USISAA PA GID
Hibaluon naton ang ebidensia nga ang kabuhi gindesinyo kag kon ngaa ang rekord sang Biblia parte sa pagpanuga mapatihan gid. Tun-an naton kon ano nga mga kinaiya sang tawo ang nagatudlo sa aton parte sa Dios.
4. May nagdesinyo sang kabuhi
Ginadayaw ang mga tawo sa ila mga naimbento nga ang desinyo gin-ilog lang nila sa mga tinuga. Ti, sin-o ang dapat dayawon sa desinyo sang mga tinuga? Tan-awa ang VIDEO, dayon binagbinaga ang masunod nga pamangkot.
-
Ano ang naimbento sang mga tawo nga gin-ilog lang nila sa mga tinuga?
Ang kada balay may nagdesinyo kag may naghimo. Pero sin-o ang nagdesinyo kag naghimo sang tanan nga butang sa duta? Basaha ang Hebreo 3:4, dayon binagbinaga ini nga mga pamangkot:
-
Ano nga desinyo sa mga tinuga ang nanamian mo?
-
Makasiling ka bala nga may nagdesinyo sa uniberso kag sa tanan nga butang sa sini? Ngaa?
Tan-awa man
May mga artikulo kag video parte sa sini nga topiko sa jw.org sa serye nga “Gindesinyo Bala Ini?” kag “Pagpati Parte sa Ginhalinan sang Kabuhi.”
“Ang matuod, ang tagsa ka balay may nagtukod, apang ang nagtukod sang tanan nga butang amo ang Dios”
5. Mapatihan gid ang rekord sang Biblia parte sa pagpanuga
Sa Genesis kapitulo 1, ginasugid sang Biblia kon diin naghalin ang duta kag ang tanan nga buhi nga butang sa sini. Matuod bala ini nga rekord ukon sugidsugid lang? Tan-awa ang VIDEO, dayon binagbinaga ang masunod nga mga pamangkot.
-
Ginatudlo bala sang Biblia nga ang duta kag ang tanan nga buhi nga butang sa sini gintuga sa sulod lang sang anom ka adlaw nga tag-24 ka oras?
-
Sa banta mo ang rekord sang Biblia parte sa pagpanuga may basihan kag mapatihan gid? Ngaa?
Basaha ang Genesis 1:1, dayon binagbinaga ini nga pamangkot:
-
Siling sang mga scientist may ginsuguran ang uniberso. Pareho bala ini sa imo bag-o lang nabasa sa Biblia?
Ang iban nga tawo nagapamensar kon bala gingamit sang Dios ang ebolusyon sa pagtuga sang kabuhi. Basaha ang Genesis 1:21, 25, 27, dayon binagbinaga ini nga mga pamangkot:
-
Ginatudlo bala sang Biblia nga ang Dios naghimo lang sing simple nga buhi nga butang, dayon nangin isda, sapat, kag mga tawo ini sang ulihi? Ukon gintuga niya ang tanan nga “sahi” ukon klase sang kabuhi? b
6. Ang mga tawo lain gid sa iban nga tinuga sang Dios
Ang pagtuga ni Jehova sa aton indi pareho sa mga sapat. Basaha ang Genesis 1:26, dayon binagbinaga ini nga pamangkot:
-
Bangod gintuga kita suno sa larawan sang Dios, kag mapakita naton ang gugma kag kaluoy, ano ang ginatudlo sini parte sa iya kinaiya?
KON MAGSILING ANG IBAN: “Ang rekord sang Biblia parte sa pagpanuga indi matuod.”
-
Ano ang isabat mo? Ngaa?
SUMARYO
Si Jehova ang nagtuga sang uniberso kag sang tanan nga buhi nga butang.
Rebyu
-
Suno sa Biblia, diin naghalin ang uniberso?
-
Nagtuga bala ang Dios sang simple nga buhi nga butang dayon nangin lainlain ini nga klase sang kabuhi sang ulihi, ukon gintuga niya ini tanan?
-
Ngaa lain gid ang mga tawo sa iban nga tinuga sang Dios?
DUGANG NGA IMPORMASYON
Hibalua ang desinyo nga makita sa mga tinuga.
“Ano ang Ginatudlo sang Kinaugali?” (Magmata!, Septiembre 2006)
Tan-awa kon paano ipaathag sang amay sa iya bata ang rekord sang Biblia parte sa pagpanuga.
Usisaa kon ang ebolusyon nagasanto sa ginasiling sang Biblia.
Usisaa kon bala ang nasapwan nga mga fossil ukon mga pagtuon sa science nagapakita nga ang kabuhi gintuga ukon natabuan lang.
a Binagbinagon sa Leksion 25 ang katuyuan sang Dios para sa mga tawo.
b Ang tinaga nga “sahi” sa Biblia amo ang daku nga grupo sang buhi nga mga butang.
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
