LESSON 06
How Life Wen Start?
“Da fo real kine life, all come from [God].” (Songs Fo God 36:9) You believe dat o wat? Some peopo tink dat no moa one reason how come we stay hea. But if dat was true, den we ony hea cuz of one accident. But if Jehovah God wen make life, den he no would make um fo notting, aah? a Try look wat da Bible tell about how life wen start, an how come we can believe um.
1. How da universe wen start?
Da Bible tell: “Da time wen eryting wen start, God make da sky an da world.” (Da Start 1:1) Mos science guys believe dat da universe had one start. How God wen make um? God wen use his good an spesho spirit fo make eryting in da universe: da galaxies, da stars, an da planets.—Da Start 1:2.
2. How come God wen make da earth?
Jehovah “neva make [da earth] so no mo notting dea. He make um fo peopo live dea.” (Isaiah 45:18) God wen make da earth so we would have one nice place fo live, foeva. (Read um Isaiah 40:28; 42:5.) Science tell dat da earth stay spesho, cuz az da ony planet dey know of wea humans can live on top an no goin mahke.
3. How come humans an animals stay diffren?
Afta he wen make da earth, Jehovah wen make tings fo live on um. Da firs ting he wen do is fill up da earth wit plants an animals. Den, “God make da peopo, same same jalike one copy a him. He make guy kine an wahine kine.” (Read um Da Start 1:27.) So wat make humans so spesho? Cuz we jalike one copy of God, we can show love an be fair jalike him. Ony us humans can learn one odda language, an have good fun wen us look at art an lissen to good kine music. An us humans can do someting dat animals no can do: we can worship da One who wen make us.
DIG MOA DEEP
Try look how come we can believe wat da Bible tell about how life wen start from one plan. Learn how da good ways peopo tink an ack teach us about God.
4. Life wen start from one plan
Humans get da credit fo da plans dat dey wen copy from nature. So who da one should get da credit fo making um in da firs place? Play um da VIDEO, an den talk about da question afta.
-
Wat kine stuff humans wen make dat dey wen copy from nature?
Fo make one house, somebody had fo plan an build um. But who wen plan an build da tings in nature? Read um Fo Da Hebrew Peopo 3:4, an den talk about dese questions:
-
Wat kine tings in nature blow yoa mind?
-
Make sense fo believe dat da universe an eryting inside had one plan fo build um? How come?
You wen know?
You can find stuffs fo read an watch about dis on jw.org. Try look fo “Was It Designed?” an “Viewpoints on the Origin of Life.”
“Ery house, you know, get somebody dat build um. But God da One dat wen make eryting”
5. Wat da Bible tell about how life wen start make sense
In Da Start chapta 1, da Bible tell about how da earth an all da life on um wen start. Can believe dat, o az jus one story? Play um da VIDEO, an den talk about da questions afta.
-
Da Bible tell dat making da earth an eryting in um, ony took six days o wat?
-
You tink wat da Bible tell about how life wen start make sense? How come?
Read um Da Start 1:1, an den talk about dis question:
-
Science guys tell da universe had one start. How wat dey wen figga match up wit wat you jus wen read in da Bible?
Some peopo wonda if God wen use evolution fo make life. Read um Da Start 1:21, 25, 27, an den talk about dese questions:
-
Da Bible tell Jehovah wen make ony one ting den evolution wen take ova? O he wen make eryting how was suppose to be from da start? b
6. God wen make humans fo be spesho
We not like da animals dat Jehovah wen make. Read um Da Start 1:26, an den talk about dis question:
-
Cuz we jalike one copy of God, wen we show love an pity fo odda peopo, wat dat tell us about God?
WAT SOME PEOPO TELL: “Wat da Bible tell about how life wen start, dass ony one story.”
-
Wat you tink? How come?
WAT WE WEN TALK ABOUT
Jehovah wen make da universe an all da tings dat stay alive.
Wat You Wen Learn
-
Wat da Bible teach about how da universe wen start?
-
God wen let da diffren kine tings dat stay alive evolve from one ting, o he wen make all of um?
-
Wat stay spesho about humans?
LEARN SOME MOA
Try look some ideas humans wen cockaroach from nature.
“Wat Can Learn From Living Tings?” (Wake Up!, September 2006)
Try look how one faddah tell his young boy how da Bible tell eryting wen start.
Try tink if evolution match up wit wat da Bible tell.
Try look if wat da science guys wen find in da fossil record an da tests dey wen do show dat somebody wen make life o jus wen come outa no wea.
