06-ҶЫ УРОК
Чуртас хайдаң сыххан?
Чуртас Худайдаң сыххан (Псалом 36:9). Сірер анзына киртінчезер бе? Піреелері чуртас позы ла пол парған, чайалбаан тіп санапчалар. Анзы андағ полза, пістің чуртазыбыс позы ла пол парған полча. Че чуртасты Иегова чайаан полза, аның хайдағ-да кӧстии пар a. Андағ нимес пе? Чуртас хайдаң сыхханнаңар Библия ниме чоохтапчатханын кӧр кӧреелер паза ноға ол чоох киртінерге турыстығ піліп алаалар.
1. Хайди Тилекей пол парған?
Библияда чоохталча: «Пастап Худай тигірні паза чирні чайап салған» (Бытие 1:1). Учёнайларның кӧбізі Тилекей хаҷан-да пасталғанына киртінче. Хайди Худай аны чайаан? Худай ызых худынаң, сыбыра тоғынчатхан кӱзінең, Тилекейде прай нимені — галактикаларны, чылтыстарны паза планеталарны — чайап салған (Бытие 1:2).
2. Ноо нимее Худай чирні чайап салған?
Иегова Чирні «тик ле чайабаан, ол аны анда чуртазыннар тіп чайап салған» (Исайя 45:18). Худай кізілер Чирде истіг чуртазыннар паза Чир сыбыра оларның ибі ползын тіп хынған. (Исайя 40:28; 42:5 хығырыбызыңар.) Учёнайлар Чир пасха планеталарға тӧӧй нимес тіпчелер. Чирде ле кізілерге чуртирға оңдай пар.
3. Кізілер аң-хустардаң нименең пасхалар?
Иегова Чирні паза андағы чуртасты чайап салған. Пастап ол ӧзімнерні паза аң-хустарны, анаң кізіні позының омазына тӧӧй иде чайап салған. (Бытие 1:27 хығырыбызыңар.) Кізі аң-хустарға нименең тӧӧй нимес? Піс Худайға тӧӧй иде чайалғабыс, аннаңар пісте аның осхас качестволар пар. Кӧзідімге, хыныс паза сын тудыныс. Ідӧк Иегова пісті тіллер ӱгрен полар, сіліг нимее ӧкерсін полар паза, кӧгні истіп, ӧрін полар иде чайап салған. Кізілер позының Чайаачызына хынызын паза улуғлазын кӧзіт полчалар, аң-хустар, тізең, анзын ит полбинчалар.
ТИРЕҢ АРАХ ХАС КӦРІҢЕР
Чуртас чайалғанына киречілестерні кӧр кӧріңер. Библияда чайалыстаңар чоохталчатханына ноға киртінерге чарир піліп алыңар. Кізілернің качестволары Худайдаңар ниме чоохтапчатханын піліп алыңар.
4. Чуртас чайалған
Кізілер, чир-чайаанда пар нимені кӧріп, ниме-де идіп алып, постарын саблапчалар. Че оларны кем пурун иткен? ВИДЕОРОЛИКТІ кӧріп алып, ӱзӱрібізіңер:
-
Хайдағ изобретениелерні чир-чайааннаң хобырғаннар?
Полған на тураны кем-де, проектировать полып, пӱдір салча. Че чир-чайаандағы нимелерні кем пӱдір салған? Еврейлерге 3:4 хығырып алып, пу сурығларны ӱзӱрібізіңер:
-
Чир-чайаанда хайдағ чайаахтар сірерні хайхатчалар?
-
Тилекейде прай нимені кем-де пӱдір салғанына ноға киртінерге чарир? Чарыда чоохтап пиріңер.
Пілчезер бе?
Пу темаа кӧп арах статьялар паза видеороликтер jw.org тіп сайтта «Позы ла пол парған алай чайалған?» паза «Чуртас хайдаң килгеніне кӧріс» тіп рубрикаларда таап аларға чарир.
«Ноо даа тураны кем-де пӱдір салған. Худай, тізең, прай нимені пӱдір салған»
5. Библияда прай ниме чайалған тіп чоохталчатханына киртінерге чарир
Библияда, Бытиенің пастағы пастаанда, Чир паза андағы чуртас хайди чайалғаннаңар пазылча. Пу искіріге киртінерге чарир ба алай чох па? ВИДЕОРОЛИК кӧріп алып, пу сурығларны ӱзӱрібізіңер:
-
Библия Чир паза андағы чуртас алты кӱнге чайалған тіп ӱгретче бе?
-
Хайди сағынчазар, Библияда прай ниме чайалған тіп чоохталчатханы орта ба? Чарыда чоохтап пиріңер.
Бытие 1:1 хығырып алып, ӱзӱрібізіңер:
-
Учёнайлар Тилекей хаҷан-да пасталған тіпчелер. Пу кӧріс сірер Библияда хығырған нимее килісче бе? Чарыда чоохтап пиріңер.
Піреелері Худай чуртастың аймах-пасха формаларын эволюция пастыра чайаан тіп сағынчалар. Бытие 1:21, 25, 27 хығырып алып, пу сурығларны ӱзӱрібізіңер:
-
Чуртастың Худай чайаан олаңай формалары палыхтарға, аңнарға паза кізілерге эволюционировать полғаннар тіп Библия ӱгретче бе? Алай Худай тіріг нимелернің ӧӧн «родтарын» чайап салған ма? b
6. Кізі Худайның хайхастығ чайаағы
Худай кізіні аңнарға тӧӧй чайабаан. Бытие 1:26 хығырып алып, ӱзӱрібізіңер:
-
Худай пісті позының омазына тӧӧй иде чайап салғанда, пістің хынып паза айап оңнапчатханыбыс Худайдаңар ниме чоохтапча?
КЕМ-ДЕ ПІДИ ТІПЧЕ: «Библияда прай ниме чайааннаңар искіріг кип-чоох ла».
-
Сірер аннаңар ниме сағынчазар? Чарыда чоохтап пиріңер.
ӦӦН САҒЫС
Иегова Тилекейні паза Чирдегі чуртасты чайап салған.
Сағысха хатап кир кӧреелер
-
Тилекей хайдаң сыхханнаңар Библияда ниме чоохталча?
-
Худай чуртастың аймах-пасха формаларын эволюция пастыра чайап салған ма?
-
Кізі пасха чайаахтарға нименең тӧӧй нимес?
ХОЗА ІСТЕЗІҢЕР
Чайаачы парын чир-чайаан хайди киречілепчеткенін піліп алыңар.
«Чир-чайаан пісті нимее ӱгретче?» («Усхуныңар!», ӱртӱн айы, 2006 чыл)
Библиядағы чайалыстаңар чоохты хайди палаа чарыда чоохтап пирерге піліп алыңар.
Піліп алыңар: эволюциянаң Библия килісчелер бе?
«Худай аймах-пасха тіріг нимелерні эволюция пастыра чайаан ма?» (веб-статья)
Палеонтологическай летопись паза научнай эксперименттер ниме кӧзітчелер: чуртас чайалғанын алай ол позы ла пол парғанын?
«Чуртастың пасталғаны. Нандырығ киректепчеткен пис сурығ» (брошюра)
a 25-ҷі уроктаң ноға Худай кізілерні чайап салғанын піліп аларзар.
b Библиядағы «род» тіп сӧс учёнайлар тузаланчатхан «род» тіп сӧстің хыринда хай-хай алғым сӧс.
Сірерге хынығ полар, арса
УДАА ТУРҒЫЗЫЛЧАТХАН СУРЫҒЛАР
Иегованың киречілері иртірчеткен библейскай курс нимедір ол?
Иегованың киречілерінің Библия нимее ӱгретчеткенін піліп аларға полысчатхан курс пар. Ӱгренчетсер, постарыңның Библияңарнаң тузаланарға паза ӱгредіге сӧбіреңерні паза нанҷыларыңны хығырарға чарир.
