ERISOMO 06
Engebe Yatsuka Yithi?
Nyamuhanga ni “nzuko y’engebe.” (Esyonyimbo 36:9) Wun’ikirirye ekyo? Abandi bakalengekanaya bathi engebe siyahangikawa. Ekyo kyamabya ikihikire, neryo obo ithwayibuthukira. Aliwe Yehova Nyamuhanga amabya imwahangika engebe, obo iyikendibya iyinawithe ekighendererwa, kwabithe? a Thulebaye ebye Biblia yikabugha okwa nzuko y’engebe kandi n’ekikaleka ebya yikabugha ibyabya ibihikire.
1. Nindi oyuwahangika ekyanya n’ebyosi ebirimo?
E Biblia yikabugha yithi: ‘Okw’itsuka Nyamuhanga mwahangika olhubulha n’ekihugho.’ (Enzuko 1:1) Abanya sayansi bangyi bakaligha bathi obuhangwa bwosi bunawithe enzuko. Nyamuhanga mwahangika athi ekyanya n’ebyosi ebirimo? Mwakolesya “akaghalha kiwe akakakolha”—omulimu wiwe abuyirire—erikolha obuli kindu ekiri omwa buhangwa, imwamuli esyogalakisi, esyongununu, n’esyopulaneti.—Enzuko 1:2.
2. Ni kyahi ekyaleka Nyamuhanga iniahangika ekihugho?
Yehova ‘mwathahangika ekihugho eribya mulhalha, mwabumbakyo kikalhawemo.’ (Isaya 45:18) Mwahangika ekihugho eribya bwikalho bw’abandu obuwene kandi obwa kera na kera. (Soma Isaya 40:28; 42:5.) Esayansi yikakanganaya ngoku ekihugho ni pulaneti y’embaghane. Iyo nyisa y’eyasibwe ng’eyanga sighika engebe y’abandu.
3. Ni byahi ebikaleka abandu ibabya mbaghane okwa bisoro?
Yehova abere abirihangika ekihugho, mwahirako engebe. Eritsuka, musulya okwa kihugho kw’ebirimwa n’ebisoro. Neryo, ‘Nyamuhanga mwahangika omundu omo kisosekanio kiwe.’ (Soma Enzuko 1:27.) Ni byahi ebikaleka abandu ibo ibabya b’embaghane? Kundi thuhangikirwe omwa kisosekanio kya Nyamuhanga, thwangana kangania emibere yiwe, ng’olhwanzo n’obulingirirania. Kandi mwathuhangika n’amaaka w’erigha emibughe, erisima ebindu ebyuwene, n’eritsemera omuziki. Kandi erithendibya ng’ebisoro, ithwe thwangana ramya Omuhangiki wethu.
THASYIGHA BINGYI
Lebaya ebikakanganaya ngoku engebe yahangikawa kandi ngoku omwatsi w’erihangika owali omwa Biblia ahikire. Minya emibere eyuwene eya bandu bawithe nga yikathweghesayaki oku Nyamuhanga.
4. Engebe yakolererawa
Abandu bakahalhambawa busana n’ebyo bakakolha omw’ikopa eby’obuhangwa. Neryo nindi oyutholere erihalhambwa busana n’erikolha ebikakopawa? Mubughaye EVIDIYO, mwanakania okwa kibulyo ekikakwamako.
-
Ni byahi ebyo bandu babirikolha omw’ikopa eby’obuhangwa?
Obuli nyumba yikakolhawa n’erihimbwa n’omundu. Aliwe nindi oyuwakolha ebiri omwa buhangwa? Soma Abaebrania 3:4, mwanakania okwa bibulyo bino:
-
Ni byahi ebikakutsemesaya omwa buhangwa wukabisamalira?
-
Nina ky’amenge erikirirya wuthi obuhangwa bwosi n’ebyosi ebirimo byahangikawa? Busana naki?
Wunalhue wasi?
Wangana bana emyatsi n’esyovidiyo ebihambire oko mwatsi oyu okwa jw.org omwa bikabera eryasira omwa katsweka “Mbwino Kyakolererawa?” na “Amalengekania Muthina-muthina Awahambire Okwa Nzuko y’Engebe.”
“Kusangwa obuli nyumba yikahimbawa n’omundu, nikwa Nyamuhanga ni muhimbi w’emyatsi yosi”
5. Ni nzumwa nyingyi esikaleka omwatsi we Biblia ow’erihangika iniabya iniahikire
Omwa Enzuko sura 1, e Biblia yikakanaya okwa nzuko y’ekihugho n’engebe eyiriko. Wangana yikethera omwatsi oyo, kutse ni binyambwirwa buyira? Mubughaye EVIDIYO, mwanakania okwa bibulyo ebikakwamako.
-
Mbwino e Biblia yikakangiriraya yithi ekihugho n’engebe eyiriko byahangikawa omwa biro mukagha eby’omwa yenga nguma nyisa?
-
Wukalengekanaya omwatsi we Biblia ow’erihangika anahikire? Busana naki?
Soma Enzuko 1:1, mwanakania okwa kibulyo kino:
-
Abanya sayansi bakabugha bathi olhubulha n’ekihugho binawithe enzuko. Ebyo bakabugha ebyo bikahambana bithi n’ebya wamasoma omwa Biblia?
Abandi bakanabulha Nyamuhanga nga syangabya imwakolesya eriyibuthukira ly’ebindu ng’enzira y’erihangika engebe. Soma Enzuko 1:21, 25, 27, mwanakania okwa bibulyo bino:
-
E Biblia yikanakangiriraya yithi Nyamuhanga mwakolha akandu kalebe akawithe engebe eyithahwererere neryo amaleka ikaghenda kakalhuamo esiswe, ebisoro, n’abandu? Kutse mwahangika “emisindo” yosi y’engebe?
6. Abandu ni bihangikwa bya Nyamuhanga eby’embaghane
Thuli mbaghane okwa bisoro ebyo Nyamuhanga ahangika. Soma Enzuko 1:26, mwanakania okwa kibulyo kino:
-
Kundi thuhangikirwe omwa kisosekanio kya Nyamuhanga, amaaka wethu w’erikangania olhwanzo n’erikwira abandi b’obulighe akathweghesayaki okwa mibere ya Nyamuhanga?
ABANDI BAKABUGHA BATHI: “Omwatsi we Biblia ow’erihangika ni binyambwirwa.”
-
Iwe wukabugha wuthiki? Busana naki?
OMWA BIKUHI
Yehova mwahangika ekyanya n’ebyosi ebirimo n’engebe yosi.
Eriyibukya
-
E Biblia yikabugha yithiki okwa nzuko y’obuhangwa bwosi?
-
Mbwino Nyamuhanga mwakolesya eriyibuthukira ly’ebindu ng’enzira y’erihiraho esyongebe musindo-musindo, kutse mwahangika “emisindo” yosi y’engebe?
-
Ni byahi ebikaleka abandu ibabya ini b’embaghane?
MINYA BINGYI
Lebaya ebihangikwa ebikakanganaya ku hane Omuhangiki.
Lhangira ngoku thatha akasoborera mughalha wiwe omwatsi we Biblia ow’erihangika.
Lebaya omwatsi w’ebindu eriyibuthukira ng’akanahambana n’ebya Biblia yikabugha.
Lebaya amakuha wakera awakabanawa n’eby’esayansi nga bikanakanganaya bithi engebe yahangikawa kutse nga yayibuthukira.
a Erisomo 25 likendisya kania okwa kighendererwa kya Nyamuhanga busana n’abandu.
