LUFUNJISHO 06
Bintu Byaishileko Byepi?
Baibolo waamba pe Lesa amba: “Yenu mwalengele bintu byonse.” (Lumwekesho 4:11) Mwaswa bino byaamba Baibolo nyi? Bantu bamo bamba’mba kafwako walengele bantu ne, baishilekotu bene. Inge byo bamba bya kine, ko kuba’mba bumi bwetu bwa pa kakimyetu kacheche. Bino inge Yehoba ye witulengele, ko kuba’mba paji kintu kine kyo etulengejile. a Monai byaamba Baibolo byo twaishileko ne ene mambo o kyayilamo kuswa byo aamba.
1. Ñanyi walengele jiulu ne ntanda?
Baibolo waamba’mba: “Mu ntendekelo Lesa walengele jiulu ne ntanda.” (Ntendekelo 1:1) Bashayuka ba sayansi baswa kuba’mba jiulu ne ntanda paji wibilengele. Lesa walengele byepi jiulu ne ntanda? Waingijishe “ngovu ingila” nangwa’mba mupashi wanji wazhila pa kulenga bintu byonse kuvwangakotu ne myala yanshansha, tubangabanga ne bintutu bikwabo bya mwiulu ne biji pano pa ntanda.—Ntendekelo 1:2.
2. Mambo ka Lesa o alengejile ntanda?
Yehoba “kechi wiilengele [ntanda] kwikala yatutu ne, bino wiilengele’mba mukekalenga bantu.” (Isaya 45:18) Yehoba walengele ino ntanda kwikala yawama pa kuba’mba bantu bakekalangamo myaka ne myaka. (Tangai Isaya 40:28; 42:5.) Bashayuka ba sayansi bamba’mba byalengwa ntanda byapusana bingi na byalengwa bintu bikwabo biji mwiulu. Pa ntanda po ponkatu pafwainwa kwikala bantu.
3. Bantu bapusana byepi na banyama?
Yehoba byo apwishishe kulenga ntanda, walengejilepo bintu bipeema. Patanshi walengele bichi ne banyama. Kabiji “Lesa walengele muntu mu kipasha kyanji.” (Tangai Ntendekelo 1:27.) Ñanyi kintu kyalengela bantu kupusanako na banyama? Mambo atweba twalengwa mu kipasha kya Lesa, tumwesha byubilo bya Lesa nabiji butemwe ne bololoke. Kabiji Lesa witulengele na bulume bwa kufunda milaka, kutemwa bintu byalenga Lesa ne kumvwa bulongo kuteleka ku nyimbo yawama. Twapusana na banyama, mambo atweba tupopwela Lesa..
FUNJILAIPO BIKWABO
Kebai bishinka bimwesha’mba muntu bamulengele pa kuba’mba mushiinwe’mba byaamba Baibolo pa kulengwa kwa bintu kwbya kine. Monai byubilo biji na bantu byo bitufunjisha pe Lesa byo aji.
4. Bintu byalengelwe
Bantu betumbijika bingi na bintu byo balenga saka bakopela ku bintu byalenga Lesa. Ñanyi wakonsha kutambula lukumo pa bilengwa? Tambai VIDYO, ne kwisamba buno bwipuzho.
-
Ñanyi bintu bantu byo bakopela ku bintu byalenga Lesa?
Nzubo yonse paji wiinemba pa pepala byo ikekala kabiji muntu ye wiishimika. Pano ñanyi walengele bintu byonse? Tangai Bahebelu 3:4, ne kwisamba ano mepuzho:
-
Ñanyi bintu byalenga Lesa byo mwatemwa bingi?
-
Nanchi kijitu bulongo kuswa’mba bintu byonse biji mwiulu ne pano pa ntanda paji wibilengele nyi? Mambo ka o mwaswila?
Bishinka bikwabo
Mwakonsha kutaana mitwe ne mavidyo pa uno mutwe pa jw.org mu bibaaba byaamba’mba “Nanchi Kyalengelwe nyi?” ne “Byaambapo Bantu pa Kwafumine Bumi.”
“Nzubo yonse kuji wiishimika, bino walengele bintu byonse, ye Lesa”
5. Baibolo waamba kine pa bilengwa
Pa Ntendekelo kitango 1, Baibolo walumbulula byaishileko ntanda ne bintu bipeema bijipo. Nanchi mwaswa byaamba jino jishimikila nyi, inyi mulanguluka’mba jishimikilatu ja bubela? Tambai VIDYO, ne kwisamba ano mepuzho.
-
Nanchi Baibolo waamba’mba Lesa walengele ntanda ne bintu bipeema bijipo mu mobatu 6 nyi?
-
Mwalanguluka’mba byaamba Baibolo amba bintu byalengelwe bya kine nyi? Inge mwakumbula’mba ee bya kine mambo ka o mwakumbwila byobyo? Kabiji inge mwakumbula’mba bya bubela, mambo ka?
Tangai Ntendekelo 1:1, ne kwisamba buno bwipuzho:
-
Bashayuka ba sayansi bamba’mba ntanda ne jiulu paji wibilengele. Byo bamba byaesakana byepi na byo mwatanga mu Baibolo?
Bantu bamo bazhinauka bingi inge kya kuba Lesa walengele bintu kuba’mba bilengenga bine. Tangai Ntendekelo 1:21, 25, 27, ne kwisamba ano mepuzho:
-
Nanchi Baibolo witubuula’mba Lesa walengele bintu kuba’mba bikalukenga kwikala masabi, banyama ne bantu nyi? Inyi walengele bintu byonse monka mwayila “mitundu” yabyo? b
6. Bantu bo bapusanako bingi pa bintu byonse byalenga Lesa
Yehoba ye walengele bantu ne banyama. Pano bino, kuji bintu bimo bitupusanyako na banyama. Tangai Ntendekelo 1:26, ne kwisamba buno bwipuzho:
-
Byo twalengwa mu kipasha kya Lesa ne kumwesha butemwe ne kifyele, kusolola ñanyi byubilo biji ne Lesa?
BANTU BAMO BAMBA’MBA: “Byaamba Baibolo amba bintu byalengelwe bya bubelatu.”
-
Nga anweba mwayukapo’mba ka? Mambo ka o mwakumbwila byobyo?
ÑANYI BISHINKA BYO MWAFUNDA?
Yehoba ye walenge jiulu, ntanda ne bintu byonsetu bipeema ne bibula kupeema.
Mepuzho a kupitulukamo
-
Baibolo waambapo’mba ka pa walengele jiulu ne ntanda?
-
Nanchi Lesa walengele bintu byapusana pusana kuba’mba bikalukenga bine kwikala kintu kikwabo nyi, inyi aye mwine ye walengele bintu byonse?
-
Ñanyi kintu kipusanyako bantu na banyama?
KEBAI BISHINKA BIKWABO
Monai bintu bimo biji mu ntanda bimwesha’mba kuji wibilengele.
“Byalenga Lesa Bitufunjishapo Ka?” (Labainga! September 2006)
Monai nsemi wa mulume byo akonsha kulumbulwila mwananji mwanyike byaamba Baibolo pa bilengwa.
Monai byamba bantu amba bintu byaalukiletu bine inge byakwatankana na byaamba Baibolo.
a Lufunjisho 25 lukamba pa ene mambo Lesa o alengejile bantu.
b Mu Baibolo kyambo kya kuba’mba “mitundu” kilumbulula bintu bipeema byapusana pusana.
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
