ບົດທີ 06
ສິ່ງມີຊີວິດເກີດຂຶ້ນມາໄດ້ແນວໃດ?
ພະເຈົ້າ “ເປັນບໍ່ເກີດຂອງຊີວິດ.” (ຄຳເພງ 36:9, ລ.ມ.) ເຈົ້າເຊື່ອແບບນັ້ນບໍ? ບາງຄົນຄິດວ່າຄົນ ສັດ ແລະຕົ້ນໄມ້ໃບຫຍ້າເກີດຂຶ້ນມາເອງໂດຍບໍ່ມີໃຜສ້າງ. ຖ້າເປັນແນວນັ້ນ ຊີວິດຂອງເຮົາກໍຄືຊິບໍ່ມີຈຸດມຸ່ງໝາຍ. ແຕ່ຖ້າພະເຢໂຫວາພະເຈົ້າຕັ້ງໃຈສ້າງເຮົາຂຶ້ນມາ ຊີວິດຂອງເຮົາກໍຄືຊິມີຈຸດມຸ່ງໝາຍ ແມ່ນບໍ? a ໃຫ້ເຮົາມາເບິ່ງວ່າ ຄຳພີໄບເບິນບອກວ່າສິ່ງມີຊີວິດເກີດຂຶ້ນມາໄດ້ແນວໃດແລະເປັນຫຍັງເຮົາຈຶ່ງເຊື່ອເລື່ອງທີ່ຄຳພີໄບເບິນບອກໄດ້.
1. ເອກະພົບເກີດຂຶ້ນມາໄດ້ແນວໃດ?
ຄຳພີໄບເບິນບອກວ່າ: “ໃນຕອນເລີ່ມຕົ້ນ ພະເຈົ້າສ້າງຟ້າແລະໂລກ.” (ຕົ້ນເດີມ 1:1, ລ.ມ.) ນັກວິທະຍາສາດສ່ວນຫຼາຍເຫັນດີນຳວ່າເອກະພົບຕ້ອງມີຈຸດເລີ່ມຕົ້ນ. ພະເຈົ້າສ້າງເອກະພົບແນວໃດ? ເພິ່ນໃຊ້ພະລັງບໍລິສຸດເຊິ່ງເປັນ “ພະລັງ” ຂອງເພິ່ນສ້າງທຸກສິ່ງໃນເອກະພົບ ເຊັ່ນກາເລັກຊີ ດວງດາວ ແລະດາວເຄາະຕ່າງໆ.—ຕົ້ນເດີມ 1:2
2. ພະເຈົ້າສ້າງໂລກມາເພື່ອຫຍັງ?
ພະເຢໂຫວາ “ບໍ່ໄດ້ສ້າງໂລກໄວ້ລ້າໆໂດຍບໍ່ມີຈຸດປະສົງຫຍັງ ແຕ່ເພິ່ນສ້າງໄວ້ເພື່ອໃຫ້ຄົນຢູ່ອາໄສ.” (ເອຊາອີ 45:18, ລ.ມ.) ເພິ່ນສ້າງໂລກໃຫ້ເປັນຄືກັບເຮືອນທີ່ເປັນຕາຢູ່ແລະມີທຸກຢ່າງພ້ອມເພື່ອມະນຸດຈະມີຊີວິດຢູ່ໄດ້ຕະຫຼອດໄປ. (ອ່ານເອຊາອີ 40:28; 42:5) ນັກວິທະຍາສາດບອກວ່າໂລກຂອງເຮົາພິເສດຫຼາຍແລະບໍ່ຄືກັບດາວດວງອື່ນໆ. ມີແຕ່ໂລກເທົ່ານັ້ນທີ່ມີທຸກຢ່າງທີ່ຈຳເປັນເພື່ອມະນຸດຈະມີຊີວິດຢູ່ໄດ້.
3. ເປັນຫຍັງມະນຸດຈຶ່ງບໍ່ຄືສັດ?
ຫຼັງຈາກທີ່ພະເຢໂຫວາສ້າງໂລກແລ້ວໆ ເພິ່ນກໍສ້າງສິ່ງມີຊີວິດ. ທຳອິດ ເພິ່ນສ້າງພືດແລະສັດກ່ອນ. ແລ້ວຫຼັງຈາກນັ້ນ “ພະເຈົ້າຈຶ່ງສ້າງມະນຸດ ຕາມແບບເພິ່ນ.” (ອ່ານຕົ້ນເດີມ 1:27, ລ.ມ.) ເປັນຫຍັງມະນຸດຈຶ່ງບໍ່ຄືສັດ? ຍ້ອນວ່າພະເຈົ້າສ້າງເຮົາຕາມແບບເພິ່ນ ເຮົາຈຶ່ງມີຄຸນລັກສະນະທີ່ເພິ່ນມີ ເຊັ່ນຄວາມຮັກແລະຄວາມຍຸຕິທຳ. ເພິ່ນຍັງສ້າງເຮົາໃຫ້ມີຄວາມສາມາດທີ່ຈະຮຽນພາສາຕ່າງໆໄດ້ ມີຄວາມສຸກທີ່ໄດ້ເຫັນສິ່ງທີ່ສວຍງາມ ແລະມີຄວາມສຸກທີ່ໄດ້ຟັງເພງທີ່ມັກ. ແລະອີກຢ່າງໜຶ່ງທີ່ເຮົາບໍ່ຄືສັດກໍຄື ເຮົາສາມາດນະມັດສະການພະເຈົ້າໄດ້.
ຮຽນຮູ້ຫຼາຍຂຶ້ນ
ມາເບິ່ງເຫດຜົນທີ່ເຮັດໃຫ້ໝັ້ນໃຈວ່າສິ່ງມີຊີວິດຕ້ອງມີຜູ້ອອກແບບແລະເລື່ອງການສ້າງທີ່ບອກໄວ້ໃນຄຳພີໄບເບິນເຊື່ອຖືໄດ້. ເຮົາຈະມາເບິ່ງອີກວ່າຄຸນລັກສະນະທີ່ມະນຸດມີບອກໃຫ້ຮູ້ຫຍັງກ່ຽວກັບພະເຈົ້າ.
4. ສິ່ງມີຊີວິດຕ້ອງມີຜູ້ອອກແບບ
ບາງຄົນໄດ້ຮັບການຍ້ອງຍໍຍ້ອນວ່າລາວອອກແບບສິ່ງຂອງບາງຢ່າງ ແຕ່ສິ່ງທີ່ລາວອອກແບບກໍຮຽນແບບມາຈາກສິ່ງທີ່ມີຢູ່ແລ້ວໃນທຳມະຊາດ. ຖ້າເປັນແບບນັ້ນໃຜຄວນຈະໄດ້ຮັບການຍ້ອງຍໍ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ມະນຸດອອກແບບຫຍັງແດ່ທີ່ຮຽນແບບມາຈາກທຳມະຊາດ?
ເຮືອນທຸກຫຼັງຕ້ອງມີຄົນອອກແບບແລະສ້າງຂຶ້ນມາ. ແລ້ວທຸກສິ່ງໃນທຳມະຊາດເດ ໃຜເປັນຜູ້ອອກແບບແລະສ້າງຂຶ້ນມາ? ອ່ານເຮັບເຣີ 3:4 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ມີຫຍັງແດ່ໃນທຳມະຊາດທີ່ເຈົ້າຮູ້ສຶກມັກເປັນພິເສດ?
-
ເຈົ້າຄິດວ່າຕ້ອງມີຜູ້ອອກແບບແລະສ້າງທຸກສິ່ງບໍ? ເປັນຫຍັງເຈົ້າຈຶ່ງຄິດແບບນັ້ນ?
ເຈົ້າຮູ້ບໍ?
ເຈົ້າສາມາດອ່ານບົດຄວາມແລະເບິ່ງວິດີໂອກ່ຽວກັບເລື່ອງນີ້ໄດ້ໃນເວັບໄຊ jw.org/lo ໃນຫົວຂໍ້ “ມີຜູ້ອອກແບບບໍ?” ແລະ “ມຸມມອງເລື່ອງຕົ້ນກຳເນີດຂອງຊີວິດ.”
“ເຮືອນທຸກຫຼັງຕ້ອງມີຄົນສ້າງ ແຕ່ຜູ້ທີ່ສ້າງທຸກສິ່ງແມ່ນພະເຈົ້າ”
5. ເລື່ອງການສ້າງທີ່ບອກໄວ້ໃນຄຳພີໄບເບິນເຊື່ອຖືໄດ້
ໃນຄຳພີໄບເບິນໃນປຶ້ມຕົ້ນເດີມບົດທີ 1 ບອກເລື່ອງການສ້າງໂລກແລະສິ່ງມີຊີວິດ. ເຈົ້າຄິດວ່ານີ້ເປັນເລື່ອງຈິງບໍ ຫຼືວ່າມັນເປັນພຽງເລື່ອງເລົ່າ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຄຳພີໄບເບິນສອນວ່າຫົກມື້ທີ່ພະເຈົ້າໃຊ້ສ້າງໂລກແລະສິ່ງມີຊີວິດໝາຍເຖິງມື້ທີ່ມີ 24 ຊົ່ວໂມງບໍ?
-
ເຈົ້າຄິດວ່າເລື່ອງການສ້າງທີ່ບອກໄວ້ໃນຄຳພີໄບເບິນເປັນເລື່ອງແທ້ບໍ? ເປັນຫຍັງເຈົ້າຈຶ່ງຄິດແບບນັ້ນ?
ອ່ານຕົ້ນເດີມ 1:1 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ນັກວິທະຍາສາດບອກວ່າເອກະພົບຕ້ອງມີຈຸດເລີ່ມຕົ້ນ. ຂໍ້ຄຳພີທີ່ຫາກໍອ່ານໄປກົງກັບສິ່ງທີ່ນັກວິທະຍາສາດບອກແນວໃດ?
ບາງຄົນຄິດວ່າພະເຈົ້າສ້າງສິ່ງມີຊີວິດແບບງ່າຍໆຂຶ້ນມາແລ້ວປ່ອຍໃຫ້ມັນຄ່ອຍໆພັດທະນາກາຍເປັນສິ່ງມີຊີວິດຫຼາຍຊະນິດ. ອ່ານຕົ້ນເດີມ 1:21, 25, 27 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຄຳພີໄບເບິນບອກບໍວ່າພະເຈົ້າສ້າງສິ່ງມີຊີວິດຊະນິດດຽວແລ້ວປ່ອຍໃຫ້ມັນຄ່ອຍໆພັດທະນາ ກາຍເປັນສັດຊະນິດຕ່າງໆແລະມະນຸດ? ຫຼືເພິ່ນສ້າງ ສິ່ງມີຊີວິດແຕ່ລະ “ຊະນິດ” ຂຶ້ນມາຕັ້ງແຕ່ທຳອິດ?
6. ມະນຸດບໍ່ຄືກັບສິ່ງມີຊີວິດຊະນິດອື່ນ
ພະເຢໂຫວາສ້າງເຮົາໃຫ້ແຕກຕ່າງຈາກສັດ. ອ່ານຕົ້ນເດີມ 1:26 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຍ້ອນເຮົາຖືກສ້າງຕາມແບບພະເຈົ້າ ທີ່ເຮົາຮັກແລະເຫັນອົກເຫັນໃຈຄົນອື່ນໄດ້ ກໍສະແດງວ່າພະເຈົ້າຕ້ອງມີຄວາມຮູ້ສຶກແນວໃດຄືກັນ?
ບາງຄົນເວົ້າວ່າ: “ເລື່ອງການສ້າງທີ່ບອກໄວ້ໃນຄຳພີໄບເບິນເປັນພຽງເລື່ອງເລົ່າ.”
-
ເຈົ້າຄິດແນວໃດ? ເປັນຫຍັງເຈົ້າຈຶ່ງຄິດແບບນັ້ນ?
ສະຫຼຸບ
ພະເຢໂຫວາສ້າງເອກະພົບແລະສິ່ງມີຊີວິດທຸກຊະນິດ.
ຄຳຖາມທົບທວນ
-
ຄຳພີໄບເບິນບອກວ່າເອກະພົບເກີດຂຶ້ນມາໄດ້ແນວໃດ?
-
ພະເຈົ້າສ້າງສິ່ງມີຊີວິດຊະນິດດຽວແລ້ວປ່ອຍໃຫ້ມັນຄ່ອຍໆພັດທະນາ ກາຍເປັນສິ່ງມີຊີວິດຊະນິດຕ່າງໆບໍ ຫຼືພະເຈົ້າສ້າງ ສິ່ງມີຊີວິດແຕ່ລະຊະນິດຂຶ້ນມາຕັ້ງແຕ່ທຳອິດ?
-
ເປັນຫຍັງມະນຸດຈຶ່ງບໍ່ຄືສິ່ງມີຊີວິດຊະນິດອື່ນ?
ເບິ່ງເພີ່ມເຕີມ
ມາເບິ່ງບາງຢ່າງໃນທຳມະຊາດທີ່ເຮັດໃຫ້ຮູ້ວ່າຕ້ອງມີຜູ້ອອກແບບ.
ພໍ່ຈະອະທິບາຍໃຫ້ລູກຊາຍຟັງເລື່ອງການສ້າງທີ່ບອກໄວ້ໃນຄຳພີໄບເບິນແນວໃດ.
ວິວັດທະນາການສອດຄ່ອງກັບຄຳພີໄບເບິນຫຼືບໍ່.
“ພະເຈົ້າໃຊ້ວິວັດທະນາການໃນການສ້າງສິ່ງມີຊີວິດຊະນິດຕ່າງໆບໍ?” (ບົດຄວາມໃນເວັບໄຊ)
ສິ່ງມີຊີວິດເກີດຂຶ້ນມາໂດຍບັງເອີນບໍຫຼືຖືກສ້າງຂຶ້ນມາ ຫຼັກຖານຈາກຟອດຊິນແລະຫຼັກຖານທາງວິທະຍາສາດບອກຫຍັງກັບເຮົາ.
ຕົ້ນກຳເນີດຊີວິດ—ຫ້າຄຳຖາມທີ່ໜ້າຄິດ (ຈຸນລະສານ. ບໍ່ມີໃນພາສາລາວ)
ເລື່ອງທີ່ເຈົ້າອາດຈະມັກ
ຄຳຖາມທີ່ພົບເລື້ອຍໆ
ເລື່ອງທີ່ໜ້າຮູ້ກ່ຽວກັບການຮຽນຄຳພີໄບເບິນກັບພະຍານພະເຢໂຫວາ
ເມື່ອຮຽນຄຳພີໄບເບິນກັບພະຍານພະເຢໂຫວາ ເຈົ້າຢາກໃຊ້ຄຳພີໄບເບິນສະບັບໃດກໍໄດ້. ເຈົ້າຢາກຊວນຄອບຄົວຫຼືໝູ່ມາຮຽນນຳກໍໄດ້.
