KAMBʼAL 06
Leʼek Bʼiki ti Kaji a Kuxtala
«Dios u betaj a yocʼolcab etel tulacal a cʼuʼ a yan ichili.» (Hechos 17:24) Walak wa tzʼokʼsik abʼeeʼ? Yan mak walak u yadʼik ti maʼ jaj yan u yaj bʼetajil a kuxtala. Wa jaj abʼeʼe, chen yanajoʼon ti bʼoobʼeʼ. Pero wa Dʼios Jehovah u bʼetaj ti kuxtal, ti bʼoobʼeʼe yan u nuʼkul a kuxtala. a Kiʼ tzʼaj ti kuenta bʼiki ku yadʼaj Bʼibʼle bʼiki ti kaji a kuxtala y kʼuʼkaʼa jedʼeʼek ti tzʼokʼsik.
1. Bʼiki ti yanaji a yokʼolkabʼ etelooʼ a xulabʼa?
A Bʼibʼle u yadʼaj: «Ichil u kajeebʼala, a Dʼioso u bʼetaj a kaʼan y a yokʼolkabʼa.» (Genesis 1:1) Yaabʼ adʼoʼooʼ a walak u kambʼaltik u pach a ciencia (science) u kʼämooltajooʼ ti yan u kajeebʼal a kaʼan y yokʼolkabʼ. Bʼiki kaʼ u bʼetaj Dʼios abʼeʼe? U usaartaj «a mukʼ» a yan tiʼi—leʼek u santo esperito—tiʼi kaʼ u bʼeteʼ tulakal a bʼaʼal a yan ti kaʼan jabʼixooʼ a xulabʼa.—Genesis 1:2.
2. Kʼuʼkaʼa u bʼetik a yokʼolkabʼ a Dʼioso?
A Jehovah «maʼ u bʼetaj [a yokʼolkabʼ] ti maʼax kʼuʼ a bʼeeli pero u bʼetaj tiʼi kaʼ yanak a kuxtal tuwich.» (Isaias 45:18) U bʼetaj a yokʼolkabʼ ti kiʼ. Yan tulakal kʼuʼ a kʼabʼeet tiʼi kaʼ kuxakoʼon tuwich ti bʼebʼeel. (Xoko a Isaias 40:28; 42:5.) Leʼekooʼ a científico (scientist) bʼinooʼ u yilaʼ ti leʼek a yokʼolkabʼa mil u jumpaayil tuwich ulaakʼooʼ a planeta (planet) a yana. Chen tuwich yokʼolkabʼ yan a kuxtala.
3. Kʼuʼ u jumpaayil a kristiyaano tuwich a bʼaʼalcheʼ?
Leʼek ti jobʼi u bʼetik a yokʼolkabʼ a Jehovah, u bʼetaj a bʼaʼal a jedʼeʼek u kuxtal tuwichi. Primero, u bʼetaj a jujumpaay ti päkʼaal y jujumpaay bʼaʼalcheʼ. Kaʼtun «a Dʼioso u bʼetaj a winiki jabʼix alaji.» (Xoko a Genesis 1:27.) Kʼuʼ u jumpaayil a kristiyaano? Umen u bʼetajoʼon Dʼios jabʼix alaji, jedʼeʼek ti yeʼik a modʼo a yan tiʼiji, jabʼix a yakunaja y ti maʼ ti maltrataartik ti wetʼok. U bʼetajoʼon ti jedʼeʼek ti känik ulaakʼ a tʼana, kiʼak tikiwich a bʼaʼal a kichʼpana y kiʼak tikiwich a uyaj kʼaya. Inoʼono jedʼeʼek ti tzʼeek u yanil ti waj Bʼetajil maʼ jabʼixooʼ a bʼaʼalcheʼ.
MAS KAMBʼALTETO
Tzʼaj ti kuenta kʼuʼ tan u yeʼik ti bʼetabʼi a kuxtala y ti jedʼeʼek ti tzʼokʼsik ti jaj kʼuʼ a tan u yadʼik a Bʼibʼle yokʼol abʼeʼe. Kambʼalte kʼuʼ a jedʼeʼek ti känik tupektzil a Dʼioso etel a modʼo a yan tiʼijooʼ a kristiyaano.
4. Yan mak u bʼetaj a kuxtala
A kristiyaano walakooʼ u adʼabʼäl u patalil etel a bʼaʼal a walakooʼ u bʼetiki, pero teʼ walakooʼ u chʼaʼik u tukul etel a bʼaʼal a ak bʼetajaʼana. Mak tun, a kaʼ adʼabʼäk u patalil yokʼlal a bʼaʼal a ak bʼetajaʼana? Chaʼanteʼex a VIDʼEO, kaʼtun tzikbʼalteʼex a kʼaatchiʼ adʼaʼa.
-
Kʼuʼ a paatajooʼ u bʼeteʼ a kristiyaano tanil u yilikooʼ a bʼaʼal a ak bʼetajaʼan?
Leʼek a kadʼa naja yan mak u bʼetaj. Pero mak u tuklaj u pach bʼiki kaʼ u bʼeteʼ tulakal a bʼaʼal a yan tikixoyo, jabʼixooʼ a bʼaʼalcheʼ y päkʼaal? Xokeʼex a Hebreos 3:4, kaʼtun tzikbʼalteʼex a kʼaatchiʼooʼ adʼaʼa:
-
Etel a bʼaʼal yan tikixoyo bʼikiʼil a mas kiʼ tawichi? Kʼuʼkaʼa?
-
Jedʼeʼek wa a tzʼokʼsik ti yan mak u bʼetaj tulakal a bʼaʼal kʼuʼ a yan tikixoyo? Kʼuʼkaʼa?
A weel wa?
Jedʼeʼek a käxtik a juʼum waxan a vidʼeo tupektzil adʼaʼa ich jw.org ichil a parte «Yan wa Mak u Bʼetaj?» y ichil a parte «Bʼiki ti Walak u Tuklikooʼ mak Bʼiki ti Kaji a Kuxtal.»
«Tulacal a naja, yan ilic mac u betaj. Cu betici a Dioso, u betaj tulacal a cʼuʼ a yana»
5. Jedʼeʼek ti tzʼokʼsik ti jaj kʼuʼ u yadʼaj a Bʼibʼle tupektzil bʼiki ti yanaji tulakal kʼuʼ u yana
Ichil a Genesis kapitolo 1, a Bʼibʼle u yadʼaj bʼiki ti yanaji a yokʼolkabʼ y a kuxtala. Jedʼeʼek wa a tzʼokʼsik abʼeeʼ jabʼix maʼ? Chaʼanteʼex a VIDʼEO, kaʼtun tzikbʼalteʼex a kʼaatchiʼooʼ adʼaʼa:
-
Tan wa u yadʼik Bʼibʼle ti seis dʼialik u chʼaʼa a Dʼios kaʼ u bʼetaj a yokʼolkabʼa y a kuxtal a yan tuwichi?
-
Jedʼeʼek wa a tzʼokʼsik ti jaj kʼuʼ u yadʼaj a Bʼibʼle tupektzil ti bʼetbʼi tulakal a bʼaʼala? Kʼuʼkaʼa, waxan kʼuʼkaʼa maʼ?
Xokeʼex a Genesis 1:1, kaʼtun tzikbʼalteʼex a kʼaatchiʼ adʼaʼa:
-
A científico (scientist) walakooʼ u yadʼik ti yan u kajeebʼal tulakal kʼuʼ a yana. Leʼek kʼuʼ u yadʼajooʼo, bʼiki ti ket etel kʼuʼ a xoka ich Bʼibʼle?
Yan mak walak u tuklik ti a Dʼioso, chen u tzʼaj kaʼ u bʼeteʼ u bʼajil a kuxtal ti yanaji. Xokeʼex a Genesis 1:21, 25, 27, kaʼtun tzikbʼalteʼex a kʼaatchiʼ adʼaʼa:
-
Tan wa u kaʼansik Bʼibʼle ti chen u tzʼaj Dʼios kaʼ u bʼeteʼ u bʼajil a kuxtal ti yanaji tun a bʼaʼalcheʼ, a käyä y a kristiyaano? Waxan leʼek u bʼetaj tulakal «tuwich tuwich» a kuxtal a yana? b
6. Jumpaay a kristiyaano tuwich tulakal kʼuʼ a bʼetajaʼan umen a Dʼioso
Jumpaay kaʼ u bʼetajoʼon Jehovah tuwich bʼaʼalcheʼ. Xokeʼex a Genesis 1:26, kaʼtun tzikbʼalteʼex a kʼaatchiʼ adʼaʼa:
-
Umen bʼetajaʼanoʼon ti jedʼeʼek ti yeʼik u modʼo a Dʼioso, jabʼix a yeʼ yakunaj y chʼaʼotzilil. Kʼuʼ a tan u yadʼiktoʼon tupektzil a Dʼioso?
YAN MAK WALAK U YADʼIK: «Maʼ jaj a walak u yadʼik a Bʼibʼle tupektzil bʼiki ti yanaji a yokʼolkabʼ y kaʼana.»
-
Kʼuʼ a tukul? Kʼuʼkaʼa?
KʼUʼ A KÄNAJA
Jehovah u bʼetaj a kuxtala y tulakal kʼuʼ a yan yokʼolkabʼ y ti kaʼan.
Tzikbʼalbʼäl kʼuʼ ti känaja
-
Kʼuʼ a tan u kaʼansik tiʼitoʼon a Bʼibʼle etel bʼiki ti yanaji tulakal a bʼaʼala?
-
Chen wa u chaʼaj Dʼios kaʼ yanak tubʼajil a jujumpaay kuxtal, jabʼix leʼek u bʼetaj tulakal a kuxtala?
-
Kʼuʼ u jumpaayil a kristiyaano ti bʼetbʼooʼ?
MAS ILATOJ
Tzʼaj ti kuenta bʼiki ti bʼetajaʼan a bʼaʼal u bʼetaj a Dʼioso.
«Kʼuʼ a Jedʼeʼek ti Känik Etel a Bʼaʼal a Bʼetajaʼan?» (Awake!, September 2006)
Ila bʼiki ti jedʼeʼek u kaʼansik juntuul tattzil tiʼi u mejen kʼuʼ u yadʼaj a Bʼibʼle tupektzil bʼiki ti yanaji tulakal a bʼaʼala.
Ila wa jumbʼel kʼuʼ a walak u yadʼik a Bʼibʼle etel a kaʼansaj ti chen u bʼetaj u bʼajil a kuxtala.
«Chen wa u Chaʼaj Dʼios kaʼ u Yankuntej u Bʼajil Tubʼajil a Jujunpaay Kuxtala?» (Web article)
Kambʼalte u pektzil kʼuʼ a bʼinooʼ u käxtej a científico (scientist) etel a bʼak a walakooʼ u käxtiki waxan a bʼaʼal a walakooʼ u bʼetiki, tiʼi kaʼ u yillooʼ wa chen kuxaji a kuxtal tubʼajil waxan yan mak u bʼetaj.
Bʼiki ti Yanaji a Kuxtal—Cinco Pʼeel ti Kʼaatchiʼ a Bʼoch Walak u Kʼaatbʼäl (brochure)
