FAKAAKOAGA 06
Kamata Fēfē e Moui?
“Ha ko e mena ha ha [he Atua] e puna he moui.” (Salamo 36:9) Talitonu nakai a koe ke he mena ia? Manatu e falu ko e mena nakai tufugatia e moui. Ka mooli e mena ia, ti kua tupu mai noa kia a tautolu? Kaeke kua tufuga e Iehova ko e Atua e moui, to fai kakano mooli nakai? a Manamanatu ke he tala he Tohi Tapu ke he puna maiaga he moui mo e tau kakano kua mooli e tala ia.
1. Kamata fēfē e lagi mo e lalolagi katoatoa?
Pehē e Tohi Tapu: “Ne eke he Atua e lagi mo e lalolagi ke he kamataaga.” (Kenese 1:1) Laulahi he tau saienetisi ne talia na fai kamataaga e lagi mo e lalolagi katoatoa. Tufugatia fēfē ai he Atua? Fakaaoga e ia e malolō gahuahua, ko e agaaga tapu ke tufugatia e tau mena oti he lagi mo e lalolagi katoatoa, putoia e putuputuaga fetū, tau fetū, mo e tau palaneta.—Kenese 1:2.
2. Ko e ha ne tufugatia he Atua e lalolagi?
Ko Iehova ne “nakai eke noa ai e ia [e lalolagi], ne eke e ia ke nonofo ai e tau tagata.” (Isaia 45:18) Tufugatia e ia e palaneta ke eke mo kaina mitaki ke nonofo tukulagi ai e tau tagata. (Totou Isaia 40:28; 42:5.) Fakakite he tau saienetisi kua ofoofogia e fua lalolagi. Ko e fua lalolagi ni kua maeke e tau tagata ke momoui ai.
3. Ko e heigoa ne kehe e tau tagata mai he tau manu?
He oti e tufuga e Iehova e fua lalolagi, ti tufugatia e ia e tau mena momoui i ai. Fakamua, ko e tau akau mo e tau manu kua momoui i ai. Ti “eke ai he Atua e tagata ke he hana fakatai.” (Totou Kenese 1:27.) Ko e ha kua uho lahi e tau tagata? Ha kua eke a tautolu ke he fakatai he Atua, ati maeke a tautolu ke fakakite e tau mahani haana, tuga e fakaalofa mo e fakafili tonu. Tufugatia foki e ia a tautolu mo e lotomatala ke fakaako e tau vagahau kehekehe, nava ke he tau mena fulufuluola, mo e fiafia ke he tau leo kofe. Maeke a tautolu ke tapuaki ke he Tufuga, nakai tuga e tau manu.
KUMIKUMI FAKAHOKULO
Manamanatu ke he tau mena ne kitia na tufugatia e moui, ti ko e tala ke he tufugatia i loto he Tohi Tapu kua mooli. He iloa e tau mahani he tau tagata kua fakaako ki a tautolu hagaao ke he Atua.
4. Na tufuga e moui
Fakaheke e tau tagata he talaga e lautolu e tau mena he fifitaki ke he tau tufugatia. Ko hai kua lata ke fakaheke ha ko e tau mena ne tufugatia he kamataaga? Tā e VITIŌ, ti tutala ke he hūhū nā.
-
Ko e heigoa e tau mena ne talaga he tagata he fifitaki ke he tau tufugatia?
Igatia e fale mo e palana ti fai tagata ne talaga ai. Ka ko hai ne palana mo e tufugatia e tau mena momoui oti? Totou Heperu 3:4, ti tutala ke he tau hūhū nei:
-
Ko e heigoa e tau tufugatia ne fiafia a koe ki ai?
-
Lata kia ke talitonu ko e lagi mo e lalolagi katoatoa mo e tau mena oti kana i ai kua tufugatia? Ko e ha?
Iloa nakai e koe?
Moua e koe e tau vala tala mo e tau vitiō ke he matakupu nei he jw.org he tau fufuta “Kua Talaga Kia?” mo e “Onoonoaga ke he Kamataaga he Moui.”
“Ha kua takitaha e fale mo e tufugatia ai e taha, ka ko ia ne tufugatia ai e tau mena oti kana, ko e Atua haia”
5. Mooli e tala he Tohi Tapu ke he tufugatia
Ia Kenese veveheaga 1, fakamaama he Tohi Tapu e punaaga he lalolagi mo e tau mena momoui i ai. Falanaki nakai a koe ke he tala ia, po ke ko e tala fakatai? Tā e VITIŌ, ti tutala ke he tau hūhū nā.
-
Fakaako kia he Tohi Tapu ko e lalolagi mo e tau mena momoui i ai na tufugatia he ono e aho ne 24 e tulā?
-
Manatu nakai a koe kua hako mo e mooli e tala he Tohi Tapu hagaao ke he tufugatia? Ko e ha ne manatu pihia a koe, po ke ko e ha ne nakai manatu pihia a koe?
Totou Kenese 1:1, ti tutala ke he hūhū nei:6
-
Talahau he tau saienetisi na fai kamataaga e lagi mo e lalolagi katoatoa. Fakatatai fēfē e talahauaga ha lautolu mo e tau mena ne totou laia e koe he Tohi Tapu?
Manatu falu tagata na fakaaoga he Atua e tupumainoa ke tufugatia aki e moui. Totou Kenese 1:21, 25, 27, ti tutala ke he tau hūhū nei:
-
Fakaako kia he Tohi Tapu na fakaaoga he Atua e tau mena momoui mukamuka ti maeke ke hiki ke he tau ika, tau manu, mo e tau tagata? Po ke tufugatia e ia e “tau vahega” po ke, “tau kakano” he tau mena momoui oti kana? b
6. Ko e tau tagata ko e tau tufugatia uho lahi he Atua
Nakai tatai a tautolu mo e tau manu ne tufugatia e Iehova. Totou Kenese 1:26, ti tutala ke he hūhū nei:
-
Ha kua tufugatia a tautolu ke he fakatai he Atua, iloa fēfē e tautolu ke fakakite e fakaalofa mo e fakaalofa hofihofi noa hagaao ke he mahani he Atua?
PEHĒ FALU TAGATA: “Ko e tala he Tohi Tapu ke he tau mena ne tufugatia ko e tala fakatai.”
-
Fēfē e manatu haau? Ko e ha?
MANATU KATOA
Tufuga e Iehova e lagi mo e lalolagi katoatoa mo e tau mena momoui oti kana.
Liu Fakamanatu
-
Ko e heigoa ne fakaako he Tohi Tapu hagaao ke he punaaga he lagi mo e lalolagi katoatoa?
-
Fakaaoga kia he Atua e tau mena momoui mukamuka ke hiki ke he taha moui kehe, po ke tufugatia e ia e tau mena momoui oti kana?
-
Ko e ha ne uho lahi e tau tagata?
KUMI FOKI
Kitekite ke he tufugatia he tau mena momoui.
“Ko e Heigoa ne Fakaako he Tau Tufugatia?” (Ala!, Sepetema 2006)
Onoono ke he matua taane ne fakamaama e tala he Tohi Tapu ke he tufugatia ke he tama taane haana.
Manamanatu kua tatai nakai e tupumainoa mo e Tohi Tapu.
“Fakaaoga Kia he Atua e Evolusene ke Tufuga e Tau Mena Momoui Kehekehe?” (Vala tala he kupega hila)
a To fakatutala e Fakaakoaga 25 ke he finagalo he Atua ma e tau tagata.
b Hagaao e kupu “kakano” he Tohi Tapu ke he matakau lahi he tau mena momoui.
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
