LÉZIʼI 06
Léwô wo la zhié lékô?
«Léwô wo foo mbwo [Ssé]» (Zôbô ntsé 36:9). Ta o zuiing jou? Tso pʉa kouang ngié tsoo gning zo la té gnièté njʉo wô. A lôôn ngouo no nénʉ, mba a lôgô ngié pégé la végé végé nkuiè. Taʼ, a lôôn ngouo yié Jéova zo la gnièté choum, mba sèe choum sié a la gnièté gwiée ntong, a té pouʼou wô ka? a Tsaasé mmo yié Biible gôôn na jʉʼ yié njʉo la foo wo, mbing ngia mmo yié a gʉo ta ngouo mé zuing ngié méno mié Biible gôôn ée nénʉ.
1. Njʉo la zhié lékô?
Biible gôôn ngié: «A laa nzhiétée, Ssé gnièté léfang po tsétsaʼ» (Génèze 1:1). Lélʉo pʉa sciencé zuing ngié njʉo gwiée nzhiétée. Ssé la ping ngnièté njʉo wè lékô? A la yousé «métʉ mié a lôgô ngouôgô», azuigé ndʉalʉa, ndôg ngnièté choum ntsém tsaa njʉo. Mé gôôn choum paʼ: mégalaxie, métchʉôʼsang laa méplanèt (Génèze 1:2).
2. Nti kô Ssé la gnièté ndoumo ssé tsétsaʼ?
Jéova «la té gnièté ndoumo ssé tsétsaʼ suièe suièe wô, taʼ, a la pouoon po paʼ mé gé tsuié wo» (Ésaya 45:18). A la gnièté ndoumo ssé tsétsaʼ paʼ é gé si, éping gwiée kôôkôô yié a né nzèté mbwo pʉa mésong lé lôg ntsuié ndiè ngʉa (Toŋo Ésaya 40:28; 42:5). Sciencé gniè ngié ndoumo ssé tsétsaʼ té paʼ tso méplanèt wô. Aa ndaʼ planèt yié ngouo mé tsuié wo.
3. Gabté yié ée na pʉa mésong paa ménôôn ée yèe?
Jéova la wo ta ngnièté ndoumo ssé tsétsaʼ, ngnièté kôôkôô yié a gé tsuié wo. A la vôg ngnièté mégii laa ménôôn, mbing «ndéen nké ngnièté gning mésong paʼ a gé suié yé» (Toŋo Génèze 1:27). Akô gʉo gning mésong wo ntchouŋé ntchouŋé? Paʼ Ssé la gnièté gning mésong a suié yé la, angouo pégé fʉʼʉ méma mé paʼ nkouŋé, mboo léwô ndéng ndéng. A la ying mbouoon wégé paʼ ngouo pégé kouʼou lé ziʼi méchouŋé ta ngiôôn, nkouŋo lé lié choum sié é si, mbing nkouŋo muzik. Pégé kouʼou lé gouʼté Mbouoon wégé, a ping ngouo mmo yié ménôôn té kouʼou lé gʉo wô.
YING NKUIʼI NZIʼI
Tsaasé choum sié é gniè ngié Ssé la gnièté kôôkôô yié aa wo, mboo sié é gniè ngié méno mié Biible gôôn na paʼ Ssé la gnièté pouʼou ée nénʉ. Ying ntsaasé mmo yié méma mié pʉa mésong gwiée ziʼi wégé na Ssé.
4. Tso gning zo la gʉo ta mé wô wo
Épʉa mésong lié choum sié ée tsaa njʉo ndôg ngnièté sôb péʼé, mé na mékouʼ mbwo pôb tèʼ. Pouʼou la, mé gwiée lé na mékouʼ mbwo wôô nti sèe choum sié po né ndié ta ndôgô ngnièté sôb? Tsôʼô VIDÉO, mbing chouŋé na yôôn nzèté.
-
Pʉa mésong la fʉʼʉ sèe choum sié ée tsaa njʉo ndôg ngnièté sôb?
Yèe nda wôô gwiée gning wuié a la kouè. Awô la ping ngnièté choum ntsém sié ée tsaa njʉo? Toŋo Héber 3:4, mbing chouŋé na môôn ménzèté:
-
Aa yèe mmo yié aa tsaa njʉo yié o pou nkouŋo lé gia tèʼ?
-
Ta ngouo mé kouaʼ nzuing ngié tsoo gning zo la gnièté njʉo né choum sié ée tsolo? Mélaʼa kô?
Oo péʼé nzsé?
Aa tsaa jw.org ngouo o gia métwo léziʼi, ka mévidéo wô mié é gôôn no na sôôn léziʼi, ana jʉʼ yié a gôôn ngié « Hasard ou conception ? » po « Points de vue sur lʼorigine de la vie ».
«Yèe nda wô zôôn ngwiée gning wuié a la kouè, ta gning wuié a la gʉo choum ntsém aa Ssé.»
5. Ammo yié Biible gôôn na nti yié mé la lôg ngnièté njʉo aa nénʉ
Aa tsèe Génèze kém 1, Biible gôôn jʉʼ yié tsétsaʼ la foo wo laa choum ntsém sié é tsuié ndoumo. Ta ngouo o zab ntʉm na mmo yié Biible gôôn? Ka o kouang ngié a wo po méno mépouʼkouôb? Tsôʼô VIDÉO, mbing chouŋé na môôn ménzèté.
-
Biible péʼé ngniè ngié mé la lôg mélièʼ 6 mié é gwiée méhawa 24 ngnièté tsétsaʼ paa choum ntsém sié é tsuié ndoumo kée?
-
O kouang jou ngié mmo yié Biible gôôn na choum sié Ssé la gnièté aa nénʉ? O kouang pouʼou nti kô?
Toŋo Génèze 1:1 mbing chouŋé na yôôn nzèté:
-
Ngang sciencé gôôn ngié njʉo la gwiée nzhiétée. Ta mmo yié po gôôn péʼé ntsuiéʼé na mmo yié o toŋoo tsèe Biible?
Tso pʉa zèté ngié Ssé la péʼé ndôgô évolution ngnièté choum kékôô? Toŋo Génèze 1:21, 25, 27, mbing chouŋé na môôn ménzèté:
-
Ta Biible péʼé ngôôn ngié Ssé la gnièté tso mmo, yèe mmo pou chʉa nna mésso, nna ménôôn laa pʉa mésong kée? Ka Ssé la gnièté kôôkôô pé na «yé nti»? b
6. Pʉa mésong pou ngouo ntchouŋé ntchouŋé na choum sié Ssé la gnièté
Pégé té paʼ ménôôn mié Jéova la gnièté wô. Toŋo Génèze 1:26, mbing chouŋé na yôôn nzaté:
-
Pégé kouʼou lé gniè nkouoŋé pé tsôôn méziŋé. Léwo yié Ssé la pouoon wégé pégé suié yé, gniè ngié aa lékô?
TSO PɄA GÔÔN NGIÉ: «No yié Biible gôôn na choum sié Ssé la gnièté wo po méno mépouʼkouôb.»
-
O kouang jou ngié kô? Nti kô?
STA O ZIʼII KÔ?
Jéova la gnièté njʉo laa choum ntsém sié ée wo.
Ta o né nkimté?
-
Biible péʼé nziʼi kô na jʉʼ yié njʉo la foo wo?
-
Ssé la péʼé mbii tso mmo mmaʼ, a chʉa nna choum ntsém sié ée wo kée? Ka a la pou mbouoon kôôkôô pouoon?
-
Akô gʉo gning mésong wo ntchouŋé ntchouŋé?
KUIʼI FAʼ
Lié choum sié ée tsèe njʉo ngniè ngié Mbouʼngouong aa wo.
« Quʼenseigne la nature ? » (Réveillez-vous ! septembre 2006)
Gia paʼ taʼ ta né nkièʼté choum sié ée tsaa Biible na nti yié Ssé la lôg ngnièté njʉo pouʼou échouŋo ming wé.
Tsaasé ka évolution pé Biible jouʼé wôô.
« Dieu sʼest-il servi de lʼévolution pour créer les différentes formes de vie ? » (article jw.org)
Tsaasé ka choum sié mé la toung ssé ngiè, laa méfaʼ pagʉo sciencé pou ngniè ngié mé la gnièté choum sié ée tsèe njʉo ngnièté wôô, ka é gôôn pé ngié é la végé végé nkuiè wôô.
Cinq questions à se poser sur lʼorigine de la vie (brochure)
