THUTO 06
Bophelo bo Thomile Bjang?
Beibele e re Modimo ke yena a thomilego bophelo. (Psalme 36:9) Na o dumela seo? Batho ba bangwe ba re ga go na motho yo a thomilego bophelo. Ge e ba seo e le nnete, gona go ra gore re bile gona ka phošo. Eupša ge e ba Modimo e le yena a thomilego bophelo, gona go ra gore a ka ba a na le lebaka la gore a bo thome. a A re kweng gore Beibele e re bophelo bo thomile bjang, le gore ke ka baka la eng re swanetše go tshepa seo e se bolelago.
1. Go tlile bjang gore legodimo le lefase di be gona?
Beibele e re: “Mathomong Modimo o hlodile magodimo le lefase.” (Genesi 1:1) Borasaense ba bantši le bona ba a dumela gore go na le motho yo a bopilego legodimo le lefase. Modimo o di bopile bjang? O ile a diriša moya o mokgethwa, e lego ‘matla a gagwe ao a a šomišago.’ O ile a o diriša go bopa dilo ka moka lefaseng, go akaretša le dilo ka moka tše di lego kua godimo, e lego dinaledi, dinaledi tšeo di bago ka dihlopha, le dipolanete.—Genesi 1:2.
2. Ke ka baka la eng Modimo a bopile lefase?
Jehofa ‘ga se a no kgahlwa ke go bopa lefase, eupša o le bopetše gore le dulwe ke batho.’ (Jesaya 45:18) O ile a bopa lefase gore e be le le botsana, a dira gore le be le dilo ka moka tšeo batho ba di hlokago gore ba tle ba thabele bophelo, le go phela mo go lona go ya go ile. (Bala Jesaya 40:28 le 42:5.) Borasaense ba re ga go na polanete yeo e swanago le lefase. Ba hweditše gore ga go na polanete e nngwe yeo e nago le dilo ka moka tšeo di ka thušago motho gore a phele go yona.
3. Ke eng seo se dirago gore batho ba fapane le diphoofolo?
Ka morago ga gore Jehofa a bope lefase, o ile a bopa le dilo ka moka tšeo di phelago. Ka mohlala, o ile a bopa dimela le diphoofolo. Ke moka “a bopa motho ka seswantšho sa gagwe.” (Bala Genesi 1:27.) Ke’ng seo se dirago gore batho ba fapane le diphoofolo? Ka ge re bopilwe ka seswantšho sa Modimo, re ka kgona go bontšha dika tša go swana le lerato le toka, go no swana le yena. O re bopile re na le bokgoni bja go ithuta maleme a mangwe, go rata dilo tše dibotse, le go thabela mmino. Go fapana le diphoofolo, rena re ka kgona go ba bagwera ba Modimo.
ITHUTE KA MO GO TSENELETŠEGO
Nyaka bohlatse bjo bo bontšhago gore Modimo ke yena a thomilego bophelo, le bjo bo bontšhago gore Beibele e thekga taba yeo. Le gona, nyaka go tseba gore dika tšeo batho ba nago le tšona di re ruta eng ka Modimo.
4. Modimo ke yena a thomilego bophelo
Gantši ge batho ba hlama dilo, ba ekiša tlhago e bile ba feleletša ba retwa. Eupša ka ge ba ekišitše tlhago, bjale ke mang yo a swanetšego go retwa? Bapalang BIDIO ye, gomme le boledišaneng ka potšišo e latelago:
-
Dilo tšeo batho ba di hlamilego, di bontšha bjang gore ba ekišitše tlhago?
Ntlo e nngwe le e nngwe go ba le motho yo a e hlamago le go e aga. Eupša ke mang yo a hlamilego dilo ka moka le go di bopa? Balang Baheberu 3:4, gomme le boledišaneng ka dipotšišo tše di latelago:
-
Gare ga dilo ka moka tšeo Modimo a di bopilego, ke selo sefe seo wena se go kgahlago kudu?
-
Ke ka baka la’ng o dumela gore go na le motho yo a hlamilego legodimo le lefase?
Na o be o tseba?
O ka hwetša dihlogo le dibidio go jw.org/nso, karolong yeo e rego, “Na di Hlamilwe?” le yeo e rego, “Seo ba Bangwe ba Bego ba se Nagana ka Gore Bophelo bo Thomile Bjang.”
“Ke therešo gore ntlo e nngwe le e nngwe e agwa ke motho, eupša yo a agilego dilo ka moka ke Modimo”
5. Go na le mabaka a go kwagala a go dumela gore Modimo o bopile dilo ka moka
Go Genesi kgaolo 1, Beibele e hlalosa gore bophelo bo thomile bjang mo lefaseng. Na o ka tshepa seo Beibele e se bolelago, goba o nagana gore e no ba nonwane? Bapalang BIDIO ye, gomme le boledišaneng ka dipotšišo tše di latelago:
-
Na Beibele e ruta gore Modimo o bopile lefase, le go dira gore go be le bophelo mo go lona ka matšatši ao re a tlwaetšego a diiri tše 24?
-
Na o nagana gore seo Beibele e se rutago ka tlholo se a kwagala? Ke ka baka la’ng o re’alo?
Balang Genesi 1:1, gomme le boledišaneng ka potšišo e latelago:
-
Borasaense ba a dumela gore go na le motho yo a bopilego legodimo le lefase. Seo ba se dumelago se tswalana bjang le seo wena o sa tšwago go se kwa ka mo Beibeleng?
Batho ba bangwe ba ipotšiša ge e ba Modimo a dirile sele e tee, gomme yona ya tšweletša diphedi tše dingwe. Balang Genesi 1:21, 25, 27, gomme le boledišaneng ka dipotšišo tše di latelago:
-
Na Beibele e ruta gore Modimo o ile a dira sele e tee, yeo e ilego ya tšweletša diphoofolo le batho? Goba na o bopile “mehuta” ka moka ya dilo tšeo di phelago? b
6. Batho ba fapane kudu le dilo tše dingwe tšeo Modimo a di bopilego
Rena ga re swane le diphoofolo. Balang Genesi 1:26, gomme le boledišaneng ka potšišo e latelago:
-
Ka ge Modimo a re file bokgoni bja go bontšha lerato le kwelobohloko, se se bontšha gore ke Modimo wa mohuta mang?
BATHO BA BANGWE BA RE: “Seo Beibele e se bolelago ka dilo tšeo Modimo a di bopilego ke nonwane.”
-
Wena o nagana’ng? Ke ka baka la’ng o re’alo?
O ITHUTILE ENG?
Jehofa o bopile legodimo le lefase, e bile ke yena a thomilego bophelo.
Dipotšišo
-
Beibele e re go tlile bjang gore legodimo le lefase di be gona?
-
Na Modimo o dirile gore dilo di itire, goba ke yena a di bopilego?
-
Ke selo sefe seo se kgahlišago ka batho seo se dirago gore ba fapane le diphoofolo?
ITHUTE KA MO GO OKETŠEGILEGO
Bona mehlala yeo e bontšhago gore dilo ka moka tšeo di lego gona di na le motho yo a di bopilego.
Bona kamoo tate a hlalosetšago ngwana wa gagwe gore Beibele e ruta eng ka tlhago.
Ekwa ge e ba thuto ya gore dilo di itirile e dumelelana le Beibele.
“Na Modimo o Dirile Gore Dilo di Itire?” (Sehlogo seo se lego wepesaeteng)
Ekwa ge e ba mašaledi a marapo a kgale le seo borasaense ba se nyakišišitšego, di bontšha ge e ba go na le motho yo a thomilego bophelo goba bo no itlela.
Bophelo bo Thomile Bjang? Ekwa Dikarabo tša Dipotšišo tše Hlano (poroutšha)
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
