EISHOMO 06
Ebiine Amagara Bikabaho Bita?
Ruhanga niwe “enshuro y’amagara.” (Zaaburi 36:9) Ekyo nokiikiriza? Abamwe nibagira ngu ebiine amagara bikabaho bubaho bitahangirwe. Ekyo ku kiraabe kihikire, nikimanyisa ngu tukabaho ahabwa butandu. Kwonka Yehova Ruhanga ku araabe yaahangire ebiine amagara, nikimanyisa ngu okubaho kwine ekigyendererwa. a Yetegyereze ebi Baibuli erikugamba aha bukomooko bw’amagara n’enshonga ahabw’enki n’eky’oburyo kwikiriza ngu bihikire.
1. Ebiri omu nsi n’ahaiguru omu kaabunga bikabaho bita?
Baibuli neegira eti: “Omu kutandika Ruhanga akahanga eiguru n’ensi.” (Okutandika 1:1) Abanyasaayansi baingi nibaikiriza ngu ebiri omu nsi n’omu kaabunga biine entandikiro. Ruhanga akabihanga ata? Akakoresa amaani ge nari omwoyo gwe gurikwera kukora buri kimwe ekiri omu nsi n’omu mwanya, otwariiremu enyonyoozi, n’ebizinga.—Okutandika 1:2.
2. Ahabw’enki Ruhanga yaahangire ensi?
Yehova ‘tarahangiire [busha ensi], kureka akagihanga kutuurwamu.’ (Isaaya 45:18) Akahanga ensi yaitu eri omu buteeka kandi eri ey’okugumaho ebiro byona erikutuurwamu abantu. (Shoma Isaaya 40:28; 42:5.) Aba saayansi nibagira ngu ensi n’ey’omutaano. Nikyo kizinga kyonka ekirikubaasisa ebiine amagara kuguma bihuriire.
3. Niki ekirikutaanisa abantu aha nyamaishwa?
Yehova bwanyima y’okuhanga ensi, akahanga ebiine amagara kugituuraho. Ahansi akabanza kutaho ebimera n’enyamaishwa. Bwanyima, ‘Ruhanga akahanga omuntu omu kishushani kye.’ (Shoma Okutandika 1:27.) Niki ekirikureetera abantu kuba ab’omutaano? Obu tuhangirwe omu kishushani kya Ruhanga, twine emitwarize nk’eye, nka rukundo n’oburingaaniza. Kandi akatuhanga turikubaasa kwega endimi, kukunda ebintu ebikozirwe gye, n’okushemezibwa ebyeshongoro. Kandi okutaana n’enyamaishwa, nitubaasa kuramya Omuhangi waitu.
SHWIJUMA GYE
Shwijuma obuhame oburikworeka ngu ebiine amagara bikahangwa, kandi ngu ebi Baibuli erikugamba aha kuhanga bihikire. Yetegyereze oku emitwarize y’abantu erikutuhwera kwega ahari Ruhanga.
4. Ebiine amagara bikahangwa
Abantu nibasiimwa ahabw’okukora ebintu barikwihirira aha bihangirwe. Mbwenu shi n’oha oshemeire kuhimbisibwa ahabw’ebihangirwe ebi barikutooreza? Zaana VIDIYO, kubaasa kugarukamu ekibuuzo ekirikukurataho.
-
Abantu bakozire bintu ki barikwihirira aha byahangirwe?
Buri nju yoona neepimwa kandi eyombekwa omuntu. Kwonka shi n’oha owaateireho ebintu ebi turikureeba? Shoma Abaheburaayo 3:4, kubaasa kugarukamu ebibuuzo ebi:
-
Ni byahangirwe ki ebirikukushemeza oku bikozirwe?
-
Ahabw’enki n’eky’oburyo kwikiriza ngu ensi n’akaabunga na byona ebirimu bikahangwa?
Eki waaba nookimanya?
Noobaasa kutunga vidiyo n’ebicweka ebirikukwata aha nshonga egi aha jw.org ahansi y’omutwe “Kikahangwa?” na “Emiteekateekyere aha Bukomooko bw’Amagara.”
‘Ahakuba enju yoona neeyombekwa omuntu nanka, kwonka Omwombeki w’ebintu byona ni Ruhanga’
5. Ebi Baibuli erikugamba aha kuhanga bihikire
Omu Okutandika eshuura 1, Baibuli neeshoboorora aha bukomooko bw’ensi na byona ebigirimu. Mbwenu shi noobaasa kubyesiga, nari n’ebitebyo ebitahikire? Zaana VIDIYO, kubaasa kugarukamu ebibuuzo ebirikukurataho.
-
Baibuli shi neeyegyesa ngu ensi n’ebigirimu bikahangwa omu biro mukaaga eby’eshaaha 24?
-
Ahabw’enki nooteekateeka ngu ebi Baibuli erikugamba aha kuhanga bihikire nari tibihikire?
Shoma Okutandika 1:1, kubaasa kugarukamu ekibuuzo eki:
-
Aba saayansi nibagira ngu ebiri omu nsi n’ahaiguru omu kaabunga biine obutandikiro. Noobaasa kugyeragyeranisa ota emiteekateekyere yaabo n’ebi waaheza kushoma omu Baibuli?
Abamwe nibateekateeka ngu Ruhanga akahanga ebintu birikubaasa kuhinduka bikarugamu ebindi. Shoma Okutandika 1:21, 25, 27, kubaasa kugarukamu ebibuuzo ebi:
-
Mbwenu shi Baibuli neeyegyesa ngu Ruhanga akakora akantu kakye akaine amagara reero kaahinduka kaarugamu eby’enyanja, enyamaishwa mpango, n’abantu? Nari akahanga ebintu byona ebiine amagara omu “miringo” yaabyo? b
6. Abantu nibo bihangirwe bya Ruhanga eby’omutaano
Nitutaanira kimwe aha nyamaishwa ezi Yehova yaahangire. Shoma Okutandika 1:26, kubaasa kugarukamu ekibuuzo eki:
-
Ahabw’okugira ngu tukozirwe omu kishushani kya Ruhanga, okubaasa kwaitu okw’okukunda n’okugirira abandi embabazi nikworeka ki aha mitwarize ya Ruhanga?
ABAMWE NIBAGIRA NGU: “Ebi Baibuli erikugamba aha kuhanga n’ebitebyo ebitahikire.”
-
Iwe nooteekateeka ki, kandi ahabw’enki?
OMU BUGUFU
Yehova akahanga ensi n’akaabunga n’ebiine amagara byona.
Okweijutsya
-
Baibuli neeyegyesa ki aha bukomooko bw’ebiri omu nsi n’ahaiguru?
-
Ruhanga shi akakora akantu kakye reero kaahindukamu ebiine amagara eby’emiringo yoona, nari akabihanga byona?
-
Abantu n’ab’omutaano bata?
JUMBURA EBINDI
Shwijuma bimwe aha by’okureeberaho ebirikworeka ngu hariho Omuhangi.
Reeba oku omuzaire arikubaasa kukoresa Baibuli kushoboororera omutabani aha kuhanga.
Reeba yaaba okugira ngu ebintu bikabaho bubaho nikiikirizana na Baibuli.
“Ruhanga shi Akahanga Ebiine Amagara Kuruga omu Bindi?” (Eky’aha mukura)
Yetegyereze yaaba okucondooza kwa saayansi nari ebizoirwe omu itaka nibyoreka ngu ebiine amagara bikahangwa nari bikabaho bubaho.
Obukomooko bw’Amagara—Ebibuuzo Bitaano Ebihikire Kubuuzibwa (akatabo)
a Eishomo 25 nirigamba aha kigyendererwa eki Ruhanga ainiire abantu.
b Omu Baibuli, ekigambo “emiringo” nikikwata aha biine amagara ebitari bimwe na bimwe.
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
