PFUNZIRO 06
Kodi Moyo Udayamba Tani?
“Mulungu ni mwenekaciro wa moyo.” (Salimo 36:9) Kodi imwepo mumbakhulupira bzimwebzi? Wanthu winango ambakumbuka kuti moyo udandobwerambo okha. Penu bzimwebzi mpsacadidi, ndiye kuti tikudziwa lini komwe tidacokera. Tsono penu Yahova Mulungu adalenga moyo, bzimwebzi bzikulatiza kuti bziripo bzomwe iye akhafuna na moyoyo, ndibzo lini? a Onani bzomwe Bibliya limbafotokoza bza momwe moyo udayambira ndipo thangwe ranyi bzimwebzo mpsakubveseseka.
1. Kodi bzinthu bzidayamba tani?
Bibliya limbati: “Pakuyamba Mulungu adalenga kudzulu na dziko la pantsi.” (Genesesi 1:1) Masiyentista mazinji yambabvuma kuti bzinthu bzina ciyambi. Kodi Mulungu adabzilenga tani? Pakulenga bzinthu bzentse bzomwe bziripobzi, kuphatanidzambo migwala ya nzou ayai magalaksia, nyenyezi na mapulaneta, iye adaphatisa basa mzimu wace wakucena omwe ni “mphanvu ya Mulungu.”—Genesesi 1:2.
2. Thangwe ranyi Mulungu adalenga dziko la pantsi?
Yahova “alibe kundolenga [dziko la pantsi], koma adalikonza kuti likhalidwe.” (Zaiya 45:18) Iye adalikonza bwino kwene-kwene kuti wanthu akhale na moyo wakusaya kumala. (Werengani Zaiya 40:28; 42:5.) Siyensiya imbalewa kuti dziko la pantsi ndakusiyana na mapulaneta yanango, thangwe ndiro lokha lomwe lina bzinthu bzomwe bzimbacitisa kuti wanthu akhale na moyo.
3. Kodi n’ciyani cimbacitisa wanthu kusiyana na bzirombo?
Pomwe adamala kukonza dziko la pantsi, Yahova adalenga bzinthu bzamoyo mu dzikomo. Ndipo bzinthu bzakuyamba bzomwe iye adalenga ni miti na bzirombo. Patsogolo pace, “Mulungu adalenga munthu m’cifanikiso cace.” (Werengani Genesesi 1:27.) N’ciyani cimbacitisa wanthufe kusiyana na bzirombo? Pakuti tidalengedwa m’cifanikiso ca Mulungu, ifepano timbalatizambo makhalidwe yace, yomwe ni lufoyi na cirungamo. Iye adatilengambo na luso lakupfunza bzirewedwe, kupfunza kukonza bzinthu na kuimba. Ndipo mwakusiyana na bzirombo, ifepano timbakwanisa kunamata Mulengi wathu.
FUFUDZANI BZINANGO
Onani umboni bomwe bumbalatiza kuti moyo udacita kulengedwa nakuti bzomwe Bibliya limbalewa bzakuti bzinthu bzidacita kulengedwa mpsakubveseseka. Onanimbo bzomwe tingapfunze kuna Mulungu na makhalidwe yomwe wanthufe tinayo.
4. Bzinthu bzamoyo bzidacita kulengedwa
Wanthu ambatumbizidwa bzinthu bzomwe iwo ambakonza mwakucita kuwona bzinthu bza m’cirengedwe. Tsono mbani omwe an’funika kutumbizidwa thangwe ra bzinthu bza m’cirengedwebzo? Onani VIDIYO, ndipo mukamala cezeranani mbvunzo wakutewerayu.
-
Kodi wanthu adatewezera bzinthu bziponi bza mʼcirengedwe kuti akonze bzinthu bzakusiyana-siyana?
Nyumba iri-yentse idamangidwa na munthu. Tsono mbani omwe adakonza bzinthu bza m’cirengedwe? Werengani Ahebereu 3:4, ndipo mukamala cezeranani mibvunzo ikutewerayi:
-
Kodi ni bzinthu bziponi bzomwe bzidalengedwa bzomwe bzimbakudabwisani ayai mumbakomedwa nabzo?
-
Kodi imwepo mumbakhulupira kuti bzinthu bzentse bza m’cirengedwe bzidacita kulengedwa? Thangwe ranyi?
Kodi mukhadziwa?
Mungagumane nkhani na mavidiyo yakulewa bza nkhani imweyi pa jw.org pomwe padanemba kuti “Kodi Zinangochitika Zokha?” na ““Zokhudza Mmene Moyo Unayambira?.”
“Kulewa cadidi, nyumba iri-yentse alipo munthu omwe adaimanga, tsono omwe adakonza bzinthu bzentse ni Mulungu”
5. Bzomwe Bibliya limbafotokoza mpsakubveseseka
Pa Genesesi kapitulo 1, Bibliya limbafotokoza momwe moyo na dziko la pantsi bzidayambira. Kodi imwepo mumbakhulupira bzimwebzi ayai ne? Onani VIDIYO, ndipo mukamala cezeranani mibvunzo ikutewerayi.
-
Kodi Bibliya limbapfunzisa kuti dziko la pantsi na bzinthu bzamoyo bzidalengedwa mu ntsiku zitanthatu za maora 24?
-
Kodi imwepo mumbakumbuka kuti bzomwe Bibliya limbalewa bzakuti bzinthu bzidacita kulengedwa mpsacadidi ndipo mpsakubveseseka? Penu munti inde thangwe ranyi, ndipo penu munti ne thangwe ranyi?
Werengani Ciyambo 1:1, ndipo mukamala cezeranani mbvunzo wakutewerayu:
-
Masiyentista yambalewa kuti bzinthu bzina ciyambi. Kodi bzomwe iwo ambalewabzo bzikubverana tani na bzomwe mwawerenga m’Bibliya?
Wanthu winango ambakumbuka kuti Mulungu adalenga bzinthu bzamoyo mwakucita kubzisandusa.Werengani Genesesi 1:21, 25, 27, ndipo mukamala cezeranani mibvunzo ikutewerayi:
-
Kodi Bibliya limbapfunzisa kuti Mulungu adalenga cinthu cinango camoyo ndipo patsogolo pace ciciyamba kusanduka ntsomba, bzirombo na wanthu? Ayai adalenga camoyo ciri-centse mwakubverana na “mtundu” wace? b
6. Munthu ni cirengedwe ca kupambulika ca Mulungu
Ifepano ndife wakusiyana na bzirombo bzomwe Yahova adabzilenga. Werengani Genesesi 1:26, ndipo mukamala cezeranani mbvunzo wakutewerayu:
-
Pakuti tidalengedwa m’cifanikiso ca Mulungu, kodi kulatiza lufoyi na ntsisi kumbatithandiza tani kulatiza unthu bwa Mulunguyo?
WANTHU WINANGO AMBALEWA KUTI: “Bzomwe Bibliya limbalewa kuti bzinthu bzidacita kulengedwa mpsakunama.”
-
Imwepo munti tani? Ndipo thangwe ranyi?
KODI MWAPFUNZA CIYANI?
Yahova adalenga bzinthu bzentse na moyo.
Mibvunzo yakubwerezera
-
Kodi Bibliya limbapfunzisa kuti bzinthu bza m’cirengedwe bzidayamba tani?
-
Kodi Mulungu adaphatisa basa cinthu cinango camoyo patsogolo pace ciciyamba kusandukambo mitundu inango ya bzinthu bzamoyo, ayai iye adalenga bzinthu bzentse bzomwe bzina moyo?
-
N’ciyani comwe cimbasiyanisa wanthufe na bzirombo?
ONANI POMWE IBZI
Onani momwe bzinthu bza m’cirengedwe bziriri.
“Kodi Cirengedwe Cimbatipfunzisa Ciyani?” (Mukani!, Setembro 2006)
Onani momwe pai angafotokozere mwana wace bzomwe Bibliya limbafotokoza pa nkhani ya cirengedwe.
Onani penu cipfunziso cakuti bzinthu bzidacita kusanduka cimbabverana na Bibliya.
Onani bzinthu bzomwe bzidanembedwa kale-kale ayai bzomwe masiyentista yafufudza penu bzimbalatiza kuti bzinthu bzamoyo bzidacita kulengedwa ayai bzidandocitikambo bzokha.
Momwe Moyo Udayambira—Mibvunzo Mixanu Yakufunika Kwene-kwene (broxura)
a Pfunziro 25 lin’dzafotokoza bzomwe Mulungu ambafuna kuna wanthu.
b M’Bibliya fala lakuti “mtundu” limbakhala likulewa bza mtundu ukulu wa bzinthu bzamoyo.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
