06 NUENƆ

Dum Bee Bɔātɛ̄ Doodoo Wa?

PLAY

“Loo [Bari] na ezi-maā dum le a.” (Le-yɔɔ 36:9) O yigage doo wo ni? Pio nɛɛ kɛɛrɛ kɔ dum bee fuua yii. Lo a le doo wo, a kura kɔ nɛɛ bugia le. Mɛ lo a le Jɛhova Bari na a dɛm dum a, dum e’ɛrɛ nu a kura, nae wo ni? a Ɛp nu alu e’ɛm a le bu Baibol akiiloo kɛ̄ dum bee bɔātɛ̄ doo, le nu anua suānu le bu lo e’ɛma.

1. Nyɔuwe bee bɔātɛ̄ doodoo wa?

Baibol kɔ: “Bu bɔātɛ̄ Bari bee dɛm bunyɔɔ le nyɔuwe.” (Jɛnɛsis 1:1) Gbɛnɛ-edo pya saɛns yiga kɔ nyɔuwe ɛrɛ bɔātɛ̄. Bari bee ye dɛm doodoo wa? A bee su ye “edɔɔ̄,” lo alu ekpo a wee siātam dɛma dɛ̄dɛɛ̄ nu a le bu nyɔuwe, gbaānage loo ziī ziī ka zina, pya lo zina a le bu eku eku, le dɛ̄dɛɛ̄ planɛt.—Jɛnɛsis 1:2.

2. E na anua Bari bee dɛm kɛnɛkɛ̄ a?

Jɛhova ‘naa bee dɛm kɛnɛkɛ̄ bu yɔrɔ, a bee ye kwa kɔ alu etɔɔ̄ ye nyɔɔ.’ (Aisaia 45:18) A bee dɛm kɛnɛkɛ̄ nua ekpeloo kɛ̄ pya nɛɛ etɔɔ̄ ina deedee. (Buū Aisaia 40:28; 42:5.) Saɛns tɔgɛ kɔ kɛnɛkɛ̄ lu kee loo pya dɔɔ̄na planɛt. Alu aba planɛt nɛɛ dap tɔɔ̄.

3. E na a doo kɔ nɛɛ alu kee loo nam a?

Sɔ̄ Jɛhova edɛma kɛnɛkɛ̄ sah, a bee dɛm pya nu a le dum a le bu. A bee dasī dɛm te le nam. Lɛɛ, “Bari . . . dɛm nɛɛ bu ye bera.” (Buū Jɛnɛsis 1:27.) E na a su nɛɛ nua kee a? Nyɔɔbee alu edɛm i bu bera Bari a, i dap tɔgɛ wereloo le kaāna biaɛ dookɛ̄ alɛ doo. A dɛmnage i sa i nɛ ekpo enɔā keekee muɛ̄ ue, tɔgɛ nia loo pya nu a kpedɛɛ̄, sa ɛrɛ ekpeloo aāloo yɔɔ. E i dap taāŋabah Nɛɛ a bee i dɛm, lo alu nu nam naa dap doo.

NƆ YERELOO

Ɛp pya nu a tɔgɛ kɔ a bee lu edɛm nɛɛ le kɔ suānu le bu nu Baibol kɔ akiiloo dɛmnu. Nɔ nu pya elap dogo a le bu nɛɛ i tɔgɛ akiiloo Bari.

4. Bee lu edɛm dum

Lu eka miɔŋɔ nɛɛ sɔ̄ ba kwa nu aāloo nu a bee lu edɛm. Nyɔɔwo, mɛɛ na i nɛ ka loo lo tuatua ba ɛp aāloo a? Bira lo VIDIO, lɛɛ o agara ebip a nyɔɔnɛ ama.

VIDIO: Yira bu Bari (2:43)

E na miɔŋɔ nɛɛ ɛp nu Bari bee dɛm kwaā a?

Ɛrɛgeba tɔ ɛrɛ nɛɛ a ye wu. Mɛ mɛɛ na a dɛm pya nu a le nyɔɔ kɛnɛkɛ̄ a? Buū Pya Hibru 3:4, lɛɛ o agara pya ebip ama:

Amunu nu alu edɛm a le bu nyɔuwe na a a nia a?
Suānu lege bu lo eyiga kɔ a bee lu edɛm dɛ̄dɛɛ̄ nu a le bu nyɔuwe ni? E na anua a?

O suāge ni?

O dap muɛ̄ pya ekobee ue le pya vidio a kɔ nu akiiloo ue ama kɛɛ̄ “Bee Luge Edɛm Ni?” a le nyɔɔ jw.org.

“Nyɔnɛbee ɛrɛgeba tɔ ɛrɛ nɛɛ a ye wu, mɛ nɛɛ a wu dɛ̄dɛɛ̄ nu na Bari”

5. Suānu le bu nu Baibol kɔ akiiloo dɛmnu

Bu kpa Jɛnɛsis 1 ekobee, Baibol baatɛ̄ kɛ̄ kɛnɛkɛ̄ le dum bee bɔātɛ̄ doo. O dapge dɛrɛ nyiɛ nyɔɔ e’ɛma ama, sɛh alu kunɛ loo ni? Bira lo VIDIO, lɛɛ o agara pya ebip a nyɔɔnɛ ama.

VIDIO: Bee Luge Edɛm Nyɔuwe Ni?—Sigaloo (3:51)

Baibol tɔgɛge kɔ a bee lu edɛm kɛnɛkɛ̄ le dum bu ini’ī biradee a ɛrɛ 24 awa ni?
O kɛɛrɛge kɔ suānu le bu ue Baibol kɔ akiiloo dɛmnu ni? E na anua o kɛɛrɛ doo wo a?

Buū Jɛnɛsis 1:1, lɛɛ o agara ebip ama:

Pya saɛns kɔ nyɔuwe ama ɛrɛ bɔātɛ̄. Bu mɛ sīdee na ue ba kɔ ama gbaaloo nu o buū bu Baibol ama a?

Pio nɛɛ bura sɛh Bari bee dɛm nwīgbagbara nu lɛɛ pya lo nu nyaa lu nu a le dum. Buū Jɛnɛsis 1:21, 25, 27, lɛɛ o agara pya ebip ama:

Baibol tɔgɛge kɔ Bari bee dɛm ziī nwīgbagbara nu dum le bu lo a sikɛ̄ nyaa lu bari, nam, le nɛɛ ni? Sɛh a bee dɛm dɛ̄dɛɛ̄ nu a tɔɔ̄dum dookɛ̄ wa “bera” le doo ni? b

6. Nɛɛ lu keebee yɛɛ pya nu Bari dɛm

I lu kee loo nam. Buū Jɛnɛsis 1:26, lɛɛ o agara ebip ama:

Nyɔɔbee alu edɛm i bu bera Bari a, kɔ i dap tɔgɛ wereloo le fɛgɛ dogo tɔgɛ i e akiiloo dua nɛɛ Bari lu?

PIO NƐƐ KƆ: “Nu Baibol kɔ akiiloo dɛmnu lu esah.”

E na o kɛɛrɛ a? E na anua o kɛɛrɛ doo wo a?

TƐƐ̄NYƆƆ

Jɛhova dɛm nyɔuwe le dɛ̄dɛɛ̄ nu a tɔɔ̄dum.

Ebip Tɛ̄ma Nyɔɔ

E na Baibol tɔgɛ akiiloo kɛ̄ nyɔuwe bee bɔātɛ̄ doo a?
Bari bee dooge kɔ keekee nu dum le bu a sikɛ̄ nyaa lu lo dɔɔ̄na, sɛh a bee dɛm dɛ̄dɛɛ̄ nu ni?
E na a su nɛɛ nua kee loo pya dɔɔ̄na nu a?

Dee m nɔ ekobee ue ama lɛɛ:

Nu Edoo

Buū ziī ekobee ue ale o ɛp ziī vidio kɛɛ̄ “ Bee Luge Edɛm Ni?” a le nyɔɔ jw.org.

Lo Dɔɔ̄na:

Your other goal