سبق نمبر 06
زندگی دی شروعات کیویں ہوئی؟
بائبل چ دَسیا گیا اے کہ زندگی خدا وَلّوں اِک نعمت اے۔ اوہنے ای زندگی نُوں شروع کیتا۔ (زبور 36:9) کیہہ تُسی ایس گل تے ایمان رکھدے او؟ کجھ لوکاں دا خیال اے کہ زندگی بس کسے حادثے دی وجہ توں اپنے آپ ای شروع ہو گئی۔ پر جے زندگی دی شروعات یہوواہ خدا نے کیتی اے تے فیر ایہدا کوئی نہ کوئی مقصد وی ہوئے گا۔ a آؤ ویکھئے کہ بائبل چ زندگی دی شروعات بارے کیہہ دَسیا گیا اے تے اَسی ایہدے تے یقین کیوں کر سکنے آں۔
1. زمین تے اسمان کیویں بنے؟
بائبل چ دَسیا گیا اے کہ خدا نے شروع چ زمین تے اسمان نُوں بنایا۔ (پیدایش 1:1) بوہت سارے سائنسدان وی ایہہ من دے نیں کہ کائنات دی شروعات ہوئی سی۔ پر خدا نے زمین، اسمان تے باقی چیزاں نُوں کیویں بنایا؟ اوہنے کائنات دی ہر چیز یعنی زمین، ستارے تے سیارے وغیرہ اپنی ”روح“ یعنی طاقت نال بنائے۔—پیدایش 1:2۔
2. خدا نے زمین نُوں کیوں بنایا؟
خدا نے زمین نُوں فضول پیدا نئیں کیتا سگوں ایہنوں انساناں دے رہن لئی تیار کیتا۔ (یسعیاہ 45:18) اوہنے زمین نُوں ایس طرحاں بنایا اے کہ انسان ایہدے تے ہمیشاں تک آرام تے سکون نال رہ سکن۔ (یسعیاہ 40:28؛ 42:5 نُوں پڑھو۔) سائنسدان کہندے نیں کہ زمین باقی سیاریاں نالوں بوہت فرق اے۔ پوری کائنات چ صرف زمین ای اوہ سیارہ اے جدے تے انسان زندہ رہ سکدے نیں۔
3. انسان جانوراں نالوں کیویں فرق نیں؟
زمین بنان دے بعد خدا نے طرحاں طرحاں دے جاندار بنائے۔ پہلے اوہنے پُھلبوٹے تے جانور بنائے۔ فیر اوہنے انسان نُوں اپنی صورت تے پیدا کیتا۔ (پیدایش 1:27 نُوں پڑھو۔) پر انسان کیس لحاظ نال جانوراں توں فرق نیں؟ خدا نے سانوں اپنی صورت تے پیدا کیتا اے۔ ایس لئی اَسی اوہدے ورگیاں خوبیاں ظاہر کر سکنے آں جیویں کہ اَسی دُوجیاں لئی محبت وکھا سکنے آں تے انصاف توں کم لے سکنے آں۔ اوہنے سانوں فرق فرق زباناں سکھن، سوہنیاں تے دلکش چیزاں توں خوش ہون تے گان وجان دی صلاحیت وی دِتی اے۔ نالے سب توں وڈی گل ایہہ وے کہ اَسی اپنے خالق دی عبادت کر سکنے آں تے ایہہ اوہ کم اے جیہڑا جانور نئیں کر سکدے۔
ہور سوچوچار لئی
ایس گل دے ثبوتاں تے غور کرو کہ سارے جانداراں نُوں خدا نے بنایا اے تے بائبل چ زندگی دی شروعات بارے جو کجھ وی دَسیا گیا اے، اوہ بالکل صحی اے۔ ایس گل تے وی غور کرو کہ انساناں دِیاں خوبیاں توں اَسی خدا بارے کیہہ سکھنے آں۔
4. خدا ہر جاندار شے دا خالق اے
جدوں انسان قدرتی شیواں دی نقل کر کے نوِیاں نوِیاں چیزاں ایجاد کردے نیں تے اوہناں دی بڑی تعریف کیتی جاندی اے۔ پر قدرتی شیواں لئی سانوں کدی تعریف کرنی چاہی دی اے؟ ویڈیو چلاؤ تے فیر ایس سوال تے گل بات کرو:
-
انساناں نے قدرتی شیواں دی نقل کر کے کیہڑیاں چیزاں بنائیاں نیں؟
ہر گھر نُوں بنان والا کوئی نہ کوئی ہوندا اے پر کائنات چ موجود چیزاں نُوں کنہے بنایا اے؟ عبرانیوں 3:4 نُوں پڑھو تے فیر ایہناں سوالاں تے گل بات کرو:
-
کائنات چ موجود کیہڑی چیز نُوں ویکھ کے تواڈا دل خوش ہو جاندا اے؟
-
کیہہ ایس گل تے ایمان رکھنا صحی اے کہ کائنات دی ہر شے نُوں خدا نے بنایا اے؟ تُسی اِنج کیوں کہندے او؟
کیہہ توانوں پتہ اے؟
ایس موضوع بارے ساڈی ویبسائٹ jw.org تے فرق فرق ویڈیوز تے مضمون مِل سکدے نیں۔ ایہدے لئی حصہ کیا یہ خالق کی کاریگری ہے؟ تے حصہ زندگی دی شروعات بارے نظریے نُوں ویکھو۔
ہر گھر نُوں بنان والا کوئی نہ کوئی ہوندا اے پر جنہے ساریاں چیزاں بنائیاں نیں، اوہ خدا اے۔
5. بائبل چ زندگی دی شروعات بارے جو کجھ وی دَسیا گیا اے، اوہ بالکل صحی اے
بائبل چ پیدایش دی کتاب دے پہلے باب چ دَسیا گیا اے کہ سارے جانداراں تے زمین نُوں کیویں بنایا گیا۔ تواڈے خیال چ ایس باب چ لکھیاں گلاں سچیاں نیں یاں فیر فرضی؟ ویڈیو چلاؤ تے فیر ایہناں سوالاں تے گل بات کرو:
-
خدا نے جیہڑے چھ دِناں چ زمین تے باقی سارے جانداراں نُوں بنایا، کیہہ بائبل دے مطابق اوہناں چوں ہر دن چووی چووی گھنٹے دا سی؟
-
زندگی دی شروعات بارے بائبل چ جو کجھ لکھیا اے، کیہہ اوہ صحی اے؟ جے ہاں تے کیوں؟ جے نئیں تے کیوں نئیں؟
پیدایش 1:1 نُوں پڑھو تے فیر ایس سوال تے گل بات کرو:
-
بوہت سارے سائنسدان من دے نیں کہ کائنات دی شروعات ہوئی سی۔ کیہہ اوہناں دی سوچ ایس گل نال میل کھاندی اے جیہڑی تُسی ہُن بائبل چوں پڑھی اے؟
کجھ لوک سوچدے نیں کہ خدا نے اِرتقا دے ذریعے سب کجھ بنایا سی۔ پیدایش 1:21، 25، 27 نُوں پڑھو تے فیر ایہناں سوالاں تے گل بات کرو:
-
کیہہ بائبل ایہہ تلیم دیندی اے کہ خدا نے اِک چھوٹا تے سادہ جیہا جاندار بنایا سی تے فیر اوہدے توں دُوجے جاندار تے انسان اپنے آپ بن گئے؟ یاں فیر کیہہ بائبل چ ایہہ دَسیا گیا اے کہ خدا نے ہر قسم دے جانداراں نُوں آپ بنایا سی؟
6. انسان دُوجے جانداراں نالوں فرق تے خاص نیں
انسان تے جانور دونویں خدا دی مخلوق نیں۔ پر انسان جانوراں نالوں بالکل فرق نیں۔ پیدایش 1:26 نُوں پڑھو تے فیر ایس سوال تے گل بات کرو:
-
اَسی خدا دی صورت تے بنے ہوئے آں ایس لئی اَسی محبت تے ہمدردی ورگیاں خوبیاں ظاہر کرنے آں۔ ایس گل توں خدا بارے کیہہ پتہ چلدا اے؟
کجھ لوکاں دی رائے: ”بائبل چ زندگی دی شروعات بارے جو کجھ دَسیا گیا اے، اوہ بس اِک فرضی کہانی اے۔“
-
تواڈا کیہہ خیال اے؟ تے تُسی اِنج کیوں سوچدے او؟
خلاصہ
یہوواہ خدا نے زمین، اسمان تے سارے جانداراں نُوں پیدا کیتا۔
دہرائی
-
بائبل دے مطابق زمین تے اسمان کیویں بنے؟
-
کیہہ خدا نے اِک چھوٹا تے سادہ جیہا جاندار بنایا جدے توں دُوجے جاندار اپنے آپ بن گئے یاں فیر کیہہ خدا نے ہر قسم دے جانداراں نُوں آپ بنایا سی؟
-
انسان جانوراں نالوں فرق تے خاص کیوں نیں؟
ہور جانن لئی
ایس مضمون چ تُسی کجھ ایہو جہے جانداراں بارے پڑھو گے جنہاں دی بناوٹ توں پتہ چلدا اے کہ کوئی خالق ضرور ہے وے۔
انسان کائنات میں موجود چیزوں سے کیا سیکھ سکتے ہیں؟ (جاگو! دا مضمون)
ایس ویڈیو چ ویکھو کہ اِک پیو اپنے پُتر نُوں ایہہ کیویں سمجھا رہیا اے کہ سب کجھ خدا نے بنایا اے۔
کجھ لوک من دے نیں کہ خدا نے اِرتقا دے ذریعے ساریاں چیزاں بنائیاں۔ ایس مضمون چ پڑھو کہ کیہہ ایہہ گل صحی اے۔
کیہہ خدا نے فرق فرق قسماں دے جانداراں نُوں اِرتقا دے ذریعے بنایا اے؟ (ویبسائٹ تے مضمون)
a سبق نمبر 25 چ اَسی سکھاں گے کہ انساناں لئی خدا دا مقصد کیہہ اے۔
ایہہ وی ویکھو
اوہ سوال جیہڑے لوک اکثر ساڈے بارے پچھدے نیں
یہوواہ دے گواہ بائبل کورس کیویں کراندے نیں؟
یہوواہ دے گواہواں نال بائبل کورس کردے ویلے تُسی جیہڑا وی بائبل ترجمہ چاہوو استمال کر سکدے او۔ نالے تُسی اپنے سارے گھر والیاں یاں اپنے دوستاں نُوں وی ایہدے چ شامل ہون لئی کہہ سکدے او۔
