LECCIÓN 06
Causaica ¿imashinata tiai callarirca?
Bibliapica Taita Diosmi ‘tucuita rurashca’ ninmi (Apocalipsis 4:11). ¿Quiquinga chaita cripanguichu? Huaquingunaca causaica yangamandami tiai callarishca ninmi. Shina cashpaca ñucanchi causaica yangallatami canman. Pero Jehová Dios causaita callarichishca cashpaca, ñucanchicunataca imagutapash rurachunmi rurashcanga. a Cunanga causai imashina tiai callarishcata, imamanda chaita crina ali cashcatapash Bibliapimi ricugripanchi.
1. Cai alpapash, estrellacunapash ¿imashinata tiai callarirca?
Bibliapica ninmi: “Callaripica, Taita Diosmi jahua pachatapash, cai pachatapash rurarca” (Génesis 1:1). Ashtaca cientificocunaca cai alpata, caipi tucui ima tiashcatapash pipash rurajpillatami tiai callarishcanga ninmi. Shinaca cai alpata, caipi tucui ima tiashcatapash ¿imashinashi Jehová Diosca rurarca? Jehová Diosca paipa fuerzata o poderta utilizashpami cai alpata, galaxiacunata, estrellacunatapash rurarca (Génesis 1:2).
2. Taita Diosca ¿imapashi cai alpataca rurarca?
Jehová Diosca cai alpataca “na yanga tiachunga rurarcachu, ashtahuangarin chaipi causanajuchunmi rurarca” (Isaías 45:18). Taita Diosca gentecuna cushilla, tranquilo, para siempre causachunmi cai alpagutaca juyaillaguta rurarca (Isaías 40:28; 42:5, liipangui). Cientificocunaca shuj planetacunahuan ricujpica cai alpapillami causaica tiai ushan ninmi.
3. Gentecunaca ¿imapita animalcunamandaca diferente can?
Cai alpata rurashca jipaca Jehová Diosca plantagucunata, animalgucunatapashmi rurarca. Jipamanmi gentecunataca rurarca. “Taita Diosca, gentetaca paishnalla rijchajtami rurarca” (Génesis 1:27, liipangui). Gentecunaca ¿imapita animalcunamandaca diferentepacha canchi? Taita Diosman rijchajta rurashcacuna caimandami ñucanchicunaca juyaita, alita rurana munaitapash ricuchi ushapanchi. Shinallata Taita Diosca shuj shuj idiomacunata yachajui ushachun, cai alpapi tiashcacunata ricui ushachun, musicatapash uyai ushachunmi ñucanchicunataca rurashca. Y animalcunahuan ricujpica ñucanchicunallami Jehová Diostaca alabai ushanchi.
ASHTAHUAN YACHAJUPASHUNCHI
Bibliapica Taita Diosmi tucui tucuita rurashca ninmi. Cunanga imamanda chaipi crina cashcatami ricugripanchi. Shinallata gentecunapa ali cualidadcunata ricushpa Jehová Diosmanda imata yachajui ushashcatapashmi yachajugripanchi.
4. Causaica na yangamanda tiai callarircachu
Gentecunaca animalgucunata o plantagucunata ricushpami imacunatapash rurashca. Chaicunata rurashcamandaca paicunamanga premiocunatami cun. Pero ¿tucui tucuita Jehová Dios rurashcamadaca pipash pagui ninllu? VIDEOTA ricushpa, cai tapuita contestapangui:
-
Plantagucunata, animalcunata ricushpaca ¿imacunatallata gentecunaca rurashca?
Pipash rurajpillatami huasicunaca tian. Pero cai alpapi tucui ima tiashcataca ¿pita rurarca? Hebreos 3:4ta liishpa, cai tapuicunata contestapangui:
-
Cai alpapi tiashcacuna aligutapacha rurashca cashcata ricushpaca ¿maijandata ashtahuan gushtapangui?
-
¿Cai alpapi tiashcacunata, estrellacunatapash pipash rurajpi tiashcataca crinachu canchi? ¿Imatata nipanguiman?
Caipashmi ayudanga
Cai temamanda ashtahuan yachajungapaca jw.org paginapi: “¿Pipashcha rurarca?” y “Imashina causai tiai callarishcamanda parlashca yuyaicuna” nishca partepipashmi ashtahuan informacionda, videocunatapash tari ushapangui.
“Huasicunaca pipash rurajpimi tian. Y Taita Diosmi tucui cosascunataca rurashca.”
5. Bibliapica Taita Diospa rurashcacunamandaca cabaltami yachachin
Génesis capítulo 1pica cai alpata, cai alpapi tucui ima tiashcacunatapash Jehová Dios rurashcatami ricuchin. ¿Chaica ciertochu can o yanga parlocunallachu can? VIDEOTA ricushpa, cai tapuicunata contestapangui:
-
¿Bibliapica cai alpata, cai alpapi tucui tiashcacunatapash 6 punllacunapilla rurashcatachu ricuchin?
-
¿Bibliapi Taita Diospa rurashcacunamanda parlashpaca cabaltachu yachachin? ¿Imamandata shina nipangui?
Génesis 1:1ta liishpa, cai tapuita contestapangui:
-
Cientificocunapashmi cai alpaca na yangamanda tiai callarishcangachu ninmi. Cai textopi liishcashnaca ¿paicunapa nishcacunaca cabalchu can?
Evolucionbi crij gentecunaca Taita Diosca shuj uchilla celulagumanda ashtaca cosascuna tiachun saquishcanga nishpami pensan. Génesis 1:21, 25 y 27ta liishpa, cai tapuicunata contestapangui:
-
¿Bibliapica shuj uchilla celulaguta animalcunaman, gentecunaman tigrachishcatachu yachachin? o ¿Taita Diospachachu cai alpapi tucui animalcunata, gentecunataca rurarca?
6. Taita Diospa tucui rurashcacunamanda ricushpaca gentecunaca diferentemi canchi
Animalcunahuan ricujpica ñucanchicunaca diferentepachami capanchi. Génesis 1:26ta liishpa, cai tapuita contestapangui:
-
Gentecunaca Jehová Diosman rijchajta rurashcacuna caimandami juyaita, shujcunata llaquishcatapash ricuchi ushapanchi. Chaicunata ricushpaca ¿imatata Jehová Diosmandaca yachajupanchi?
HUAQUINGUNACA, “Taita Diosmi tucuita rurashca ninaca yanga parlollami can” ninmi.
-
Quiquinga ¿imatata nipanguiman?
YARINGAPAJ
Jehová Diosmi estrellacunata, cai alpata, cai alpapi tucui tiashcacunatapash rurashca.
¿Imatata yachajupashcanchi?
-
¿Bibliapica cai alpa imashina tiai callarishcatata yachachin?
-
¿Taita Diosca shuj celulagumandallachu cai alpapi causai tiachun saquishca? o ¿paipachachu animalcunata, gentecunatapash rurarca?
-
Taita Diospa rurashcacunamandaca ¿imapita gentecunaca shujpacha canchi?
CAITAPASH RICUPAI
Cai alpapi tucui tiashcacunata pi rurashcata ricupai.
“¿Qué nos enseña la naturaleza?” (¡Despertad!, septiembre 2006)
Cai alpa imashina tiai callarishcata imashina shuj taita paipa huahuaguman yachachijta ricupai.
Evolucionbi nishcacunahuan Bibliapi nishcacunahuan igual cajta o na igual cajta ricupai.
“¿Creó Dios los distintos tipos de seres vivos mediante la evolución?” (jw.org paginapi ricupangui)
Causai yangamanda tiai callarishcata o pipash churajpi tiai callarishcataca cientificocunapa nishcacunahuan chimbapurashpa ricupai.
El origen de la vida. Cinco cuestiones dignas de análisis (folleto)
a Lección 25pimi gentecuna imashina causachun Jehová Dios munashcata ricugripanchi.
Cai temacunata ashtahuan liipai
GENTECUNAPA TAPUICUNA
Testigo de Jehovacunaca ¿imashinata Bibliamandaca yachachinchi?
Testigo de Jehovacunahuan Bibliamanda yachajujushpaca quiquin charishca Bibliatallatami utilizaita ushapangui. Bibliamanda yachajujushpaca quiquinba familiata o pitapash invitaita ushapanguillami.
