LESONA 06
Na Faapefea Ona Iai le Ola?
O le Atua “o le puna o le ola.” (Salamo 36:9) E te talitonu i lenā manatu? E manatu nisi tagata e leai se isi na foafoaina le ola, ae na teʻi lava ua iai. Pe afai e moni lenā manatu, o lona uiga na teʻi lava ua tatou iai. Ae afai na foafoaina e Ieova le Atua le ola, e iai la le fuafuaga na foafoaina ai, a ea? a Seʻi iloilo tala o loo i le Tusi Paia e faatatau i le amataga o le ola, ma māfuaaga e tatou te talitonu ai e moni na tala.
1. Na faapefea ona iai le vateatea?
Ua taʻua i le Tusi Paia: “Na foafoaina e le Atua le lagi ma le lalolagi i le amataga.” (Kenese 1:1) E ioe le toʻatele o saienitisi, na foafoaina le vateatea. Na faapefea ona foafoaina e le Atua le vateatea? Na ia faaaogā lona “mana galue” po o lona agaga paia, e foafoaina ai mea uma i le vateatea e aofia ai aniva, fetu ma paneta.—Kenese 1:2.
2. Aiseā na foafoaina ai e le Atua le lalolagi?
E leʻi “foafoaina fua [e Ieova] le lalolagi ae na ia faia ina ia ʻainā.” (Isaia 45:18) Na ia faia le lalolagi o se nofoaga tumau ma talafeagai lelei mo tagata ina ia ola ai. (Faitau le Isaia 40:28; ma le 42:5.) Ua faailoa mai e le faasaienisi, e matuā ese lava le lalolagi mai i isi paneta. E na o le pau lea o le paneta e maua ai mea uma lava e manaʻomia e le tagata ina ia ola ai.
3. O ā mea e ese ai tagata mai manu?
Ina ua uma ona foafoaina e Ieova o le lalolagi, ona ia foafoaina loa lea o meafaiola. Muamua, na ia foafoaina laau ma manu. “Ona foafoaina lea e le Atua o le tagata i lona faatusa.” (Faitau le Kenese 1:27.) O le ā se mea e ese mai ai le tagata? Talu ai na foafoaina i tatou i le faatusa o le Atua, e mafai ona tatou faaatagia atu ona uiga e pei o le alofa ma le faamasinotonu. Na ia foafoaina foʻi i tatou ma le tomai e aʻoaʻo ai gagana, talisapaia ai mea matagofie, ma fiafia ai i musika. E mafai foʻi ona tatou tapuaʻi i Lē na foafoaina i tatou, ae e lē mafai e manu.
SAʻILIʻILI ATILI
Iloilo faamaoniga e iloa ai na foafoaina le ola, ma e moni tala o le foafoaga i le Tusi Paia. Ia talanoa po o ā mea tatou te aʻoaʻoina e faatatau i le Atua, mai i uiga o tagata.
4. Na foafoaina le ola
E viiviia tagata i fausaga o mea latou te faia, lea e kopi mai i mea o le natura. O ai la e tatau ona viiviia i le foafoaina o mea o le natura? Faaali le VITIŌ, ona talanoa lea i le fesili lenei:
-
O ā mea ua faia e tagata e kopi mai i mea o le natura?
O soo se fale lava e iai se tasi na fuafuaina ma fausia. Ae o ai na fuafuaina ma fausia mea o le natura? Faitau le Eperu 3:4, ona talanoa lea i fesili nei:
-
O le ā se mea o le natura e te maofa ai?
-
Pe e te talitonu na foafoaina le vateatea ma mea uma o loo iai? Aiseā?
E te silafia?
E te maua lomiga ma vitiō e faatatau i lenei mataupu i le jw.org, i le faasologa o vitiō “Pe na Teʻi Lava ua Iai?” ma le vaega “Manatu e Faatatau i le Amataga o le Ola.”
“O le mea moni, e tofu lava le fale ma le tagata na ia faia, a o lē na faia mea uma o le Atua lea”
5. E moni tala o le foafoaga o loo i le Tusi Paia
I le mataupu 1 o le tusi o Kenese, o loo faamatalaina ai le foafoaina o le lalolagi ma le ola. Pe e tatau ona e talitonu i na tala, pe ua na o ni tala fatu? Faaali le VITIŌ, ona talanoa lea i fesili nei:
-
Po o taʻu mai e le Tusi Paia, na foafoaina le lalolagi ma le ola i aso e ono e taʻi 24 itula?
-
Pe e te manatu e faasolosolo lelei ma moni tala o le foafoaga o loo i le Tusi Paia? Aiseā?
Faitau le Kenese 1:1, ona talanoa lea i le fesili lenei:
-
Ua faapea mai saienitisi e iai le amataga o le vateatea. O le ā se mea e tutusa ai o latou manatu ma le manatu o le Tusi Paia sa e faitauina?
E manatu nisi tagata na faaaogā e le Atua le evolusione e foafoaina ai le ola. O lona uiga na foafoa e le Atua se tamaʻi sela, ona liua loa lea ma avea ma meaola eseese. Faitau le Kenese 1:21, 25, 27, ona talanoa lea i fesili nei:
-
Po o aʻoaʻo mai e le Tusi Paia na faaaogā e le Atua le evolusione e maua mai ai iʻa, isi meaola ma tagata? Pe na ia foafoaina “ituaiga” uma o meaola? b
6. E ese mai lava tagata i foafoaga a le Atua
E lē pei i tatou o manu na foafoaina e Ieova. Faitau le Kenese 1:26, ona talanoa lea i le fesili lenei:
-
Na foafoaina i tatou i le faatusa o le Atua. Pe a tatou faaalia la le alofa ma le tigā alofa, o le ā ua taʻu mai ai e faatatau i uiga o le Atua?
UA FAAPEA MAI NISI: “O tala o le foafoaga o loo i le Tusi Paia o ni tala fatu.”
-
O le ā sou manatu? Aiseā?
AOTELEGA
Na foafoaina e Ieova le vateatea ma le ola.
Fesili Autalu
-
O le ā le aʻoaʻoga a le Tusi Paia e faatatau i le amataga o le vateatea?
-
Pe na foafoa e le Atua se sela itiiti, ma liua e avea ma meaola eseese, pe na ia foafoaina mea uma?
-
O le ā le mea e ese mai ai tagata?
MANATU FAAOPOOPO
Iloilo mea o le natura e iloa ai e iai Lē na foafoaina mea.
“O le ā ua Faailoa Mai i Mea o le Natura?” (Mataupu o le Ala Mai!)
Mātau le auala e faamatala ai e se tamā tala o le foafoaga o loo i le Tusi Paia i lona atalii.
Iloilo pe ōgatusa le evolusione ma le Tusi Paia.
“Pe na Faaaogāina e le Atua le Evolusione e Foafoaina ai Meafaiola Eseese?” (Mataupu i le jw.org)
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
