LESEN 06
Wiskain Laip Bin Stat?
“Yu [God] bin gibe laip po ebriting.” (Rebaleisan 4:11) Yu tingk diskain a? Sam pipol tingk laip bin kasa stat prom nating. Ip i tru, i min nobodi bin meke laip. Bat ip Zeoba God bin meke laip, em mas gad gud rizan po mekem. a Tingbaut wiskain da Baibol bin tokbaut da wei ol laip bin stat, ane aukam yumi ken bilibem.
1. Wea ol sta, speis ane ert kam prom?
Baibol spik: “Mina prapa longtaim, bipotaim, God i bin meke da skai ane ebriting de antap wea da skai, da lan ya daun ane ebriting lo da lan.” (Zenasis 1:1) Man uda stadi saiens gri dat da wold, sta ane speis bin stat prom bipotaim. Wiskain God bin mekem? Em bin yuze “paua” blo em—em oli spirit—po meke ebriting.—Zenasis 1:2.
2. Aukam God bin meke da ert?
Zeoba no bin meke ert “po nating, bat em bin mekem po gad laip.” (Aizaia 45:18) Em bin meke ert wan nais ples, wea i gad ebriting man i nidem po gad laip poeba. (Rid Aizaia 40:28; Pas Misnare Wok 17:24, 25.) Man uda stadi saiens spik ert i mina spesil. I dipren prom dem ples wase Mars ane Jupiter bikoz mata ert gad ebriting po lugaut laip po man.
3. Wanem meke pipol dipren prom animal?
Apta Zeoba bin meke da ert, em bin meke ol laip wea ert. Pas ting em bin mekem wea ert, i olkain plant ane olkain animal. Den, “God i bin meke ol pipol wea seimkain imiz wase em.” (Rid Zenasis 1:27.) Wanem meke pipol dipren prom animal? God bin meke pipol lo imiz blo em, dasmin yumpla ken soe dem seimkain pasin blo God, po soe lab ane peawei. Nada samting tu, em bin meke yumi sole wi ken lane dipren langus, gede api piling prom atwok, ane enzoi miusik. So, animal i dipren prom pipol, bikoz yumi ken wosip God ane kam pren blo em.
TINGBAUT MO NAU
Paindaut wanem ken prube sambodi bin plan po meke laip, ane aukam yumi ken bilib Baibol, wen i tokbaut wiskain laip bin stat. Lan wanem ol gudpasinwei blo man, ken tise yumi baut God.
4. Laip soe samwan bin planem
Pipol gede preiz po demting dempla i bildem, wen ol kopi demwei plant ane animal wok. So, uda mas gede ona ane preiz, po meke ebriting pas? Plei da BIDYO, ane tokbaut dis kwestin ya.
-
Wanem pipol bin bildem, wea ol bin kopi demwei blo plant ane animal?
Ebridem aus, i gad kapenta uda bin planem ane bildem. Bat, uda bin plan ane bilde ebriting lo ert? Rid Ibrupipol 3:4, ane tokbaut dem kwestin ya:
-
Wanem spesil samting yu luk lo ert, wea yu mina laikem?
-
Wiswei yu tingk, i meke sens po bilib ol sta, speis ane ebriting ya lo ert, bin gad samwan uda bin plan ane bildem a? Aukam?
Yu bin sabe a?
Yu ken paine mo bidyo ane samting po rid wea jw.org. Luk “Was It Designed?” ane “Viewpoints on the Origin of Life.”
“Ebridem aus, i gad kapenta, bat God i da prapa bigbos, bikoz em i da wan i bin meke ebriting”
5. Wen Baibol tokbaut wiskain laip bin stat, i gad gud rizan po bilibem
Lo Zenasis sapta 1, da Baibol tokbaut wiskain ert ane laip bin stat pas. Ken yu tras wanem i spik, o i laia stori? Plei da BIDYO, ane tokbaut dem kwestin ya.
-
Wiswei, Baibol i tise ert ane laip antap lo ert, bin apen mata lo siks dei a?
-
Wiswei, wen Baibol tokbaut wiskain laip bin stat, yu tingk i meke sens po bilibem a? Aukam?
Rid Zenasis 1:1, ane tokbaut dis kwestin ya:
-
Pipol uda stadi Saiens spik ert ane speis i bin gad stat tu. Yu tingk wanem dempla spik, i lainap wea demting yu bin rid de lo Baibol?
Sam pipol tingk God bin state laip wea wan mina smol samting pas, den God bin libe dat smolting po kam olkain pis, animal ane man, so ol tingk God no bin teke pat po meke demting. Rid Zenasis 1:21, 25, 27, ane tokbaut dem kwestin ya:
-
Wiswei, Baibol i tis God bin state laip wea wan mina smol samting pas, ane den God bin libem a? O em bin meke “olkain” dipren laipsamting?
6. Pipol i mina spesil wok blo God
Zeoba bin meke yumpla dipren prom dem animal. Rid Zenasis 1:26, ane tokbaut dis kwestin ya:
-
Wi ken soe lab ane sorewei bikoz God bin meke yumi lo imiz blo em, so wanem seimkain pasin mas God emselp gad tu?
SAM PIPOL SPIK: “Da Baibol stori baut wen laip bin stat, i laiwan.”
-
Wanem yu tingk? Aukam?
WANEM YU BI LAN
Zeoba bin meke ol sta, speis ane ol laip.
Wiskain Yu Go Spik
-
Wanem Baibol tis baut wiskain laip ane ebriting bin stat?
-
Wiswei, God bin state laip wea wan mina smol samting pas, ane den bin libem, o em bin meke olkain dipren laipsamting?
-
Wanem i spesil baut pipol?
PAINDAUT MO
Lan wiskain ol plant ane animal soe i gad samwan uda bin planem.
Luk wan papa yuze Baibol po soe em smolboi wiskain laip bin stat.
Tingbaut wanwei sam pipol bilib, ane luk ip i lainap wea Baibol.
“Did God Use Evolution to Create the Different Types of Life?” (Web article)
Luk sam impotant oul bon ane wanem Saiens bin testem, po soe ip samwan bin meke laip, o i bin kasa apen prom nating.
Yu Mait Laik Dem Samting Ya Tu
OL KWESTIN PIPOL ASKEM
Wanem dem Baibol Stadi Lesen ol Zeoba Witnis i Gibem po Pipol?
Wea dis niu wei po stadi Baibol dat ol Zeoba Witnis i mekem, i pri, ane yu ken yuze eni Baibol yu wandem. Yu welkam po inbait pamle blo yu ane eni pren po stadi tu.
