WEKELO 06
Ngande wakatatɛ lɔsɛnɔ?
“Le [Nzambi] kele kiɔkɔ ya lɔsɛnɔ.” (Osambo 36:9) Onde wɛ mbetawɔka dui sɔ? Anto amɔtshi fɔnyaka dia lɔsɛnɔ lakaye oyaya. Naka dui sɔ diekɔ mɛtɛ, kete takaye paka lo bandjikwi. Ko naka Jehowa Nzambi mbakatonge lɔsɛnɔ, kete lɔ pombaka monga l’oyango ɔmɔtshi, shi mɛtɛ? a Tɔsɛdingole ɔkɔndɔ wa lo Bible wendana la kiɔkɔ ya lɔsɛnɔ ndo lande na kele ɔkɔndɔ ɔsɔ wekɔ mɛtɛ.
1. Ngande wakatatɛ andja?
Bible mbutaka ɔnɛ: “Lo etatelo, Nzambi akatonge olongo la nkɛtɛ.” (Etatelo 1:1) Ambeyi wa siansɛ efula mbetawɔka di’andja wekɔ la etatelo. Ngande wakatonge Nzambi andja? Nde akakambe la ‘wolo ande wakamba olimu,’ mbuta ate nyuma kande k’ekila dia ntonga oseka ɛngɔ tshɛ kele l’andja, mbidja ndo waa galaksi, tɔɔtɔ ndo waa planɛtɛ.—Etatelo 1:2.
2. Lande na kakatonge Nzambi nkɛtɛ?
Jehowa ‘kotonga nkɛtɛ otongatonga, koko nde akayikenge dia anto mbidjasɛka lɔkɔ.’ (Isaya 45:18) Nde akatonge nkɛtɛ dia tɔ monga dihole dia dimɛna di’anto mbidjasɛka lɔkɔ pondjo pondjo. (Adia Isaya 40:28; 42:5.) Ambeyi wa siansɛ mbutaka dia nkɛtɛ kekɔ dihole dia laande diotshikitanyi la waa planɛtɛ nkina. Tɔ kekɔ tshɔi ya planɛtɛ keyama kakoka anto mbidjasɛ.
3. Kakɔna katshikitanya anto la waa nyama?
L’ɔkɔngɔ wa nde ntonga nkɛtɛ, Jehowa akatonge diangɔ diasɛna lɔkɔ. Ntondotondo, nde akalodja nkɛtɛ la ntombatomba ndo la waa nyama. Oma laasɔ, “Nzambi akatatɛ ntonga onto lo efanelo kande.” (Adia Etatelo 1:27.) Lande na kele sho anto tekɔ ditongami dia laande? Nɛ dia sho takatongama lo efanelo ka Nzambi. Sho koka nkɛnɛmɔla waonga ande, ɛnyɛlɔ ngandji la losembwe. Nde akatotonge la dikoka dia mbeka ɛtɛkɛta, ngɛnangɛna la diangɔ di’amɛna ndo la mishiki. Otshikitanyi la waa nyama, sho kokaka ntɛmɔla Otungi aso.
NYOMOTSHIMOLA
Tɔsɛdingole kɛnɛ kɛnya dia lɔsɛnɔ lakatongama ndo di’ɔnɛ ɔkɔndɔ wa lo Bible wendana la etongelo wekɔ mɛtɛ. Eka dia mbeya kɛnɛ katetsha waonga waki anto lo kɛnɛ kendana la Nzambi.
4. Lɔsɛnɔ lakatongama
Anto wekɔ lo nsala diangɔ lo mbokoya nɛ diakatongama ndo vɔ wekɔ lo nongola lotombo lo dikambo sɔ. Ko ahomba nongola lotombo lo diangɔ diakatongama? Nyende VIDƐO, ndo oma laasɔ, nyɔkɛtshanya dimbola diayela nɛ:
-
Kakɔna kakasale anto lo nsangola diangɔ diakatongama?
Luudu tshɛ mbikamaka oma le onto ɔmɔtshi. Ko akatonge diangɔ dia l’andja? Nyadia Hɛbɛru 3:4, ndo oma laasɔ, nyɔkɛtshanya ambola anɛ:
-
Kakɔna kakambiya lo diangɔ diakatongama?
-
Onde ekɔ dui dia lomba mbetawɔ di’andja ndo ɛngɔ tshɛ ka lɔkɔ kakatongama? Lande na?
Onde wɛ akeyaka?
Wɛ koka ntana asawo ndo tovidɛo tendana la sawo nɛ lo jw.org lo asawo wele l’ɔtɛ a dui ɔnɛ: “Onde akatongama kana akaye oyaya?” ndo wata ɔnɛ: “Tokanyi tele l’anto lo kɛnɛ kendana la kiɔkɔ ya lɔsɛnɔ.”
“Lo mɛtɛ, luudu tshɛ tokamaka oma le onto ɔmɔtshi, koko otungi wa diangɔ tshɛ ele Nzambi”
5. Ɔkɔndɔ wa lo Bible wendana la etongelo wekɔ mɛtɛ
Etatelo tshapita 1 mɛnyaka woho wakatongama nkɛtɛ ndo diangɔ diasɛna lɔkɔ. Onde wɛ koka mbetawɔ ɔkɔndɔ wa lo Bible ɔsɔ, ko kana vɔ wekɔ tsho shimu? Nyende VIDƐO, ndo oma laasɔ, nyɔkɛtshanya ambola wayela anɛ:
-
Onde Bible mbetshaka dia nkɛtɛ la diangɔ diasɛna lɔkɔ diakatongama lo nshi shamalo ya wenya 24?
-
Onde wɛ fɔnyaka di’ɔkɔndɔ wa lo Bible wendana la etongelo wekɔ shikaa ndo mɛtɛ? Lande na?
Nyadia Etatelo 1:1, ndo oma laasɔ, nyɔkɛtshanya dimbola nɛ:
-
Ambeyi wa siansɛ mbetawɔka di’andja wakonge la etatelo. Onde kɛnɛ ketawɔwɔ kɛsɔ mbɔtɔnɛka la kɛnɛ kadishayɛ lo Bible?
Anto amɔtshi ndjambolaka dia kana Nzambi akakambe l’ohilwelo dia ntonga diangɔ diasɛna. Nyadia Etatelo 1:21, 25, 27, ndo oma laasɔ, nyɔkɛtshanya ambola anɛ:
-
Onde Bible mbetshaka dia Nzambi akasale yoho mɔtshi ya lɔsɛnɔ ya tshitshɛ, ko oma laasɔ ndjitshika dia yɔ mpilo nse, nyama ndo anto? Ko kana nde akatonge diangɔ tshɛ diasɛna lo ndjela “weho” adiɔ? b
6. Anto wekɔ ditongami dia laande diaki Nzambi
Jehowa akatotonge lo yoho yotshikitanyi la waa nyama. Nyadia Etatelo 1:26, ndo oma laasɔ, nyɔkɛtshanya dimbola nɛ:
-
Lam’ele Nzambi akatotonge lo efanelo kande, kakɔna kɛnya dikoka diaso dia mbokana ngandji ndo kɛtshi lo dikambo dia lonto laki Nzambi?
ANTO AMƆTSHI MBUTAKA ƆNƐ: “Ɔkɔndɔ wa lo Bible wendana la etongelo wekɔ shimu.”
-
Ko afɔnyayɛ? Lande na?
LO TSHENA PE
Jehowa akatonge andja ndo diangɔ tshɛ diele la lɔsɛnɔ.
Ovuswelo
-
Kakɔna ketsha Bible lo kɛnɛ kendana la woho wakatatɛ andja?
-
Onde Nzambi akatshike weho wa nsɛnɔ yotshikitanyi dia yɔ mpilo oma lo yoho ya lɔsɛnɔ ya tshitshɛ, ko kana nde akatonge weho wa nsɛnɔ shɔ tshɛ?
-
Lande na kele sho anto tekɔ ditongami dia laande?
SALA EYANGELO
Enda bɛnyɛlɔ diɛnya ɔnɛ otungi ɔmɔtshi ekɔ.
“Kakɔna katetsha diangɔ diakatongama?” (Emɔ!, Ngɔndɔ ka divwa 2006)
Enda woho wakoka papa nembetshiya yana yande ya hiami ɔkɔndɔ wa lo Bible wendana la etongelo.
Tɔsɛdingole kana wetshelo w’ohilwelo mbɔtɔnɛka la wetshelo wa lo Bible.
“Onde Nzambi akakambe la ohilwelo dia ntonga weho wa nsɛnɔ yotshikitanyi?” (Sawo dia l’Ɛtɛrnɛtɛ)
Tɔsɛdingole dia kana emindo kana awui wa siansɛ mɛnyaka dia lɔsɛnɔ lakatongama ko kana lakaye oyaya.
Ambola atanu wa ndjambola lo dikambo dia kiɔkɔ ya lɔsɛnɔ (biukubuku)
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
