JORHENGUARHIKUA 6
¿Néna ueenaski jarhani tsípikua?
Tata Diosï kueraasti “parhakpinini ka iámindu ambe enga parhakpinirhu jaka” (Ukuecha 17:24). ¿Jakajkusïntsï chá ini ambe? Uánikua kʼuiripuechaksï uandasïndi eska no jarhaska kueraajpiri ma. Engajtsïni no nema kueraaka, jimajkani ískuesti juchaari irekua, peru engajtsïni Jeoba kueraaka, jiájkani irekaxakachi jukaparhakua ambe jimbo. a Jorhenguarhi je na enga Biblia uandajka eskachi kueraanhaska ka exe je andichisï jakajkujki eska i ambe ísïiska.
1. ¿Néna niáraski jarhani parhakpini ka jóskuecha?
Biblia uandasïndi: “Uénakuarhu, Tata Diosï kueraasti auandani ka echerini” (Génesis 1:1). Sáno iámindu kʼuiripuechaksï jakajkusïndi eska nema kueraaska Echerini ka jóskuechani. Peru, ¿néna kueraaski Tata Diosï iámindu ambe? Ima úrasti imeeri uinhapikuani enga jindeeka “espiritu santu” para iámindu ambe kueraani, Echerini, jóskuechani, planetechani... (Génesis 1:2).
2. ¿Andisï kueraa Tata Diosï Echerini?
Jeoba “no ísku kuera[asti] Echerini sino paraka irekanhapinga” (Isaías 45:18). Jeoba kueraasti Echerini paraka sési jándepiringa ka parakaksï kʼuiripuecha sési irekuarhipiringa (arhinta je Isaías 40:28 ka 42:5). Sientifikuechaksï uandasïndi eska i parhakpini kánikua ambakeska ka no mítekuarhisti eskaksï máteru planeta jimbo úpiringa irekani kʼuiripuecha.
3. ¿Andiksïsï no májkuenii kʼuiripuecha ka eska animalicha?
Enga Jeoba kueraapkia Echerini, tátsekua kueraaspti iámindu ambe enga tsípiti jaka. Enga Jeoba na kueraapkia Echerini tátsekua kueraaspti plantechani ka animalichani. Ka tátsekua “Tata Diosï niáraspti úni acheetini ísï eska ima na jásïika” (arhinta je Génesis 1:27). ¿Andichisï no májkuenii animalicha jingoni? Jimbokajtsïni Tata Diosï ísï kueraaska eska ima na jásïika májkueni eska ima ístuchi úsïnga xarhatani uékperakua, ka eskachi jurhimbitiska. Ístujtsïni kueraasti parachi úni jorhenguarhiani máteru idiomechani, tsitini kueraakata ambe ka tsípikuarhini kústakua jingoni. Ka juchachi úsïnga kʼéri ambe arhini juchaari Kueraajpirini ambe engaksï animalicha no újka úni.
JORHENGUARHI JE SÁNDERU AMBE
Ju je exeni ambe ka ambe xarhatasïni eska Tata Diosï kueraaska iámindu ambe enga tsípiti jaka ka eska ísïiska na enga uandajka Biblia eska kueraanhaska ambe ma. Ka jorhenguarhi je eska ambakiti ambe engaksï kʼuiripuecha újka, uaatijtsïni jorhendani Tata Diosïri ambe.
4. Nema kueraasti iámindu ambe enga tsípiti jaka
Engaksï kʼuiripuecha kopiarijka ambe ma kueraakatarhu, ambe kʼéri ambeksï exenhasïndi. Peru ¿né kʼéri ambe arhisïni imani enga kueraaka iámindu ambe? Exe je BIDEUNI ka uandontskuarhi je íri ambe:
-
¿Ambe ka ambeksï kopiariskia kʼuiripuecha kueraakatarhu?
Iámindu kʼumanchikuechani nema diseniariuasti ka uaani. Peru ¿né diseniariski ka úni iámindu ambe enga jaka? Arhinta je Ebreu 3:4 ka uandontskuarhi je íri ambe:
-
¿Ambeksïni sánderu ísku pakatasïni kueraakateri ambe?
-
¿Sési jaki jakajkuni eska nema kueraaska parhakpinini ka auandani ka iámindu ambe enga jaka? ¿Andi?
¿Mítespijtsï ini ambe?
Exeantauakajtsï sánderu artikuluechani ka bideuechani engaksï íri ambe uandajka ixú jw.org, partirhu “¿Nema kueraaski?” ka “Ambe enga uandanhajka tsípikueri ambe“.
“Jimboka iámindu kʼumanchikuecha úkata jarhasïnga nemani jimbo, peru ima enga kueraaka iámindu ambeni, jindeesti Diosï”
5. Uánikua ambe xarhatasïndi eska ísïiska ambe enga Biblia uandajka kueraakateri ambe
Génesis kapitulu 1 jimbo, Biblia uandantasïndi na enga ueenaka jarhani Echeri ka iámindu ambe enga tsípiti jaka. ¿I ambe solu uandantskua máe enga no ísïika? Exe je BIDEUNI ka uandontskuarhi je íri ambe:
-
¿Biblia jorhentpisïni eska parhakpini ka iámindu ambe enga tsípiti jaka kueraanhaska seisi jurhiatikua jimbo 24 oraeri?
-
¿Jakajkusïntsï ambe enga Biblia uandantajka kueraakateri ambe? ¿Andi?
Arhinta je Génesis 1:1 ka uandontskuarhi je íri ambe:
-
Sientifikuechaksï uandasïndi eska Echeri no méntkisï jarhaspka. ¿Terukuntasïni na engaksï imeecha eratsejka ini ambe jingoni engajtsï Bibliarhu arhintaka?
Máru kʼuiripuechaksï kurhamarhikuarhisïndi sini Tata Diosï kueraaski ambe ma enga tsípiti japka ka i tátsekua sánhani arhini mójtakurhipani. Arhinta je Génesis 1:21, 25, 27 ka uandontskuarhi je íri ambe:
-
¿Biblia jorhentpisïni eska Tata Diosï kueraaska máru ambe ka jurajkuni eska mójtakurhipapiringa asta niárani animali o kʼuiripu úkuarhintani? ¿O Tata Diosï kueraaski “mámaru jásï ambe” enga tsípiti jaka? b
6. Kʼuiripuechachi ménderueniska eska máteru ambe enga Tata Diosï kueraaka
Juchachi kánikua ménderueniska eska animalicha. Arhinta je Génesis 1:26 ka uandontskuarhi je íri ambe:
-
Juchachi úsïnga xarhatani uékperakua ka pʼamojperakua, jimbokachi ísï kueraakata jarhaska eska Tata Diosï. Míteparini ini ambe, ¿Jeoba na jásï Tata Diosï máeski?
MÁRUKSÏ I AMBE UANDASÏNDI: “Ambe enga Biblia uandantajka kueraakateri ambe, solu uandantskua ambeesti enga no ísïika”.
-
¿Chá ambe eratsesïni? ¿Andi?
AMBE ENGACHI JORHENGUARHIKA
Jeoba kueraasti parhakpinini ka iámindu ambe enga tsípiti jaka.
Ambejtsï jorhenguarhiski
-
¿Ambe jorhentpisïni Biblia néna enga ueenaka jarhani parhakpini?
-
¿Tata Diosï kueraaspi ambe ma enga tsípiti japka ka jurajkuni eska i mójtakurhipapiringa ka niárani máteru ambe úkuarhintani? ¿O sánderu sési ima kueraaski iámindu ambe enga tsípiti jaka?
-
¿Andichisï kʼuiripuecha ménderueni kueraakata jaki eska máteru ambe?
ÍSTU EXE JE INI AMBE
Exe je máru ambe enga kueraakatarhu jaka enga xarhatajka eska jarhaska nema enga kueraaka iámindu ambe.
“¿Ambejtsïni jorhendasïni kueraakata ambe?” (¡Tsínharhi!, septiembri 2006)
Exe je na enga taati ma jorhendajka uájpani ambe enga Biblia uandantajka kueraakateri ambe.
Exe je sini ebolusioni terukuntasïni imani ambe jingoni enga Biblia jorhentpijka.
Exe je ambe enga xarhatajka ióntki anapu ambe engaksï exentaka ka ambe engaksï sientifikuecha újka: tsípikua ísku ueenaski o nema kueraaski.
El origen de la vida. Cinco cuestiones dignas de análisis (foietu)
a Jorhenguarhikua 25, uandasïndi andisï Tata Diosï kueraa kʼuiripuni.
b Enga Bibliarhu uandajka mámaru jásï ambe, arhikuekasïndi uánikua ambe enga tsípiti jaka; sientifikuechaksï úrasïndi ini ambe paraksï máteru ambe arhikuekani.
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
