КИЧЭЭЛ 06
Чуртталга канчаар тыптып келген?
Бурган бүгү дириг чүүлдү чаяаган (Ырлар 35:10). Силер аңаа бүзүрээр силер бе? Чамдык улус чуртталга душ бооп тывылган деп санаар. Ол шын болза, таварылга ачызында тывылган ышкажыл бис. Бир эвес чуртталганы Бурган чаяаган болза, ооң ужур-утказы турар эвес бе a? Библияда чуртталга канчаар тывылганының дугайында чүү дээнин база чүге аңаа бүзүреп болурун көрүптээлиңер.
1. Октаргай канчаар тывылган?
Библияда: «Эң эгезинде Бурган дээр биле черни чаяап каан» — дээн (Эге дөс 1:1). Эртемденнерниң хөй кезии Октаргайның эгези турган деп санаар. Бурган ону канчаар чаяаганыл? Бурган Октаргайны, ооң санында галактикаларны, сылдыстарны, планеталарны чаяарда, ыдыктыг сүлдезин хөделдирикчи күжүн ажыглап турган (Эге дөс 1:2).
2. Бурган Черни чүү дээш чаяаган?
Иегова «черни ээн турбазын, аңаа кижилер чурттазын дээш... чаяап каан» (Исайя 45:18). Бурган кижилерни черге аас-кежиктиг мөңге чурттаар кылдыр чаяагаш, херек шупту чүүлдү берген. (Номчуптуңар: Исайя 40:28; 42:5.) Бүгү Октаргайда чер ышкаш кайгамчык планета чок деп эртем шинчилелдери бадыткаан. Кижилерге чүгле черге амыдыраары болдунар.
3. Кижи дириг амытаннардан чүзү-биле ылгалып турар?
Иегова черни, үнүштерни болгаш дириг амытаннарны чаяаган. Оон «Бурган Бодунуң овур-хевири-биле, Бодунга дөмейлештир кижи амытанны... чаяап каан». (Номчуптуңар: Эге дөс 1:27.) Кижилер чүзү-биле онзагай? Бис Бурганның овур-хевири-биле чаяаттынган болгаш, Ооң ынакшыл, чөптүг чорук дээн ышкаш шынарларын илередип болур бис. Оон ыңай уран чүүлдү, хөгжүмнү үнелеп, дылдар өөренип шыдаар кылдыр чаяаттынган бис. Бис дириг амытаннарга бодаарга, Чаяакчывыска ынакшылды илередип, Аңаа мөгейип чоруур бис.
ХАНЫ ШИНЧИЛЕҢЕР
Библияда бижээн чүүлге бүзүреп болурун, чуртталга чаяаттынган деп бадыткалдарны көрүңер. Кижилерниң шынарлары Бурганның дугайында чугаалап турарын билип алыр силер.
4. Чуртталга чаяаттынган
Кижилер бир-ле чүвени чогаадырда бойдустан дөмейлеп кылгаш, алдар-макталды ап чоруур. А бойдуста бар бүгү чүвени кым чогаадып тургусканыл? ВИДЕОНУ көргеш, айтырыгга харыылаптыңар:
-
Эртемденнер бойдустан чүнү дөмейлеп кылган?
Бажың бүрүзүн бир кижи тудар. А бойдуста бар чүүлдү кым чаяаган? Еврейлерге 3:4-тү номчааш, харыылаптыңар:
-
Силерни ылаңгыя кандыг чаяалгалар кайгадыр-дыр?
-
Октаргайны болгаш ында бар бүгү чүвени чаяап каан деп бодаары шын бе? Чүге?
Билир силер бе?
Бо темага хамаарыштыр статьяларны, видеоларны jw.org деп сайтыда «Чуртталга канчаар тыптып келген?», «Чуртталганың тывылганынга көрүш» деп рубрикалардан тып ап болур.
«Оран-сава бүрүзүн бир-ле кижи туткан, а бүгү бар чүүлдү Бурган туткан»
5. Бүгү чүве чаяаттынган деп библейжи медээге бүзүреп болур
Библияда Эге дөс номунуң 1-ги эгеде Черниң база чуртталганың канчаар тыптып келгенин бижээн. Аңаа бүзүреп болур бе? Азы ол чүгле тоолчургу чугаа бе? ВИДЕОНУ көргеш, айтырыгларга харыылаптыңар:
-
Чер болгаш ында чуртталга чүгле алды хонук иштинде чаяаттынган деп, Библия өөредип турар бе?
-
Бүгү чүве чаяаттынган деп, библейжи медээ ужур-уткалыг болгаш шын деп чөпшээрежир силер бе? Тайылбырлаптыңар.
Эге дөс 1:1-ни номчааш, харыылаптыңар:
-
Эртемденнер Октаргайның эгези турган деп чугаалап турар. Ол чүүл Библиядан ам чаа номчаан чүүлүңер-биле дүгжүп турар-дыр бе?
Чамдык улус Бурган эволюцияны ажыглап тургаш, бүгү амылыг бойдусту чаяаган деп санап турар. Эге дөс 1:21, 25, 27-ни номчааш, харыылаптыңар:
-
Бурган чуртталганың бөдүүн хевирлерин чаяап каарга, олардан балыктар, дириг амытаннар база кижилер сайзырай берген деп, Библия өөредип турар бе? Азы Ол шупту дириг амытаннарны «уксаа» аайы-биле чаяап каан бе? b
6. Кижи — Бурганның кайгамчык чаяалгазы
Бис дириг амытаннардан ылгалдыг бис. Эге дөс 1:26-ны номчааш, харыылаптыңар:
-
Бис Бурганның овур-хевири-биле чаяаттынган болгаш, ынакшып, кээргеп билир бис. Ол чүүл биске Бурганның дугайында чүнү чугаалап турар?
ЧАМДЫК УЛУС МЫНЧА ДЕП БОЛУР: «Бүгү чүве чаяаттынган деп библейжи медээ тоолчургу чугаа-дыр».
-
Силер чүү деп бодаар силер? Тайылбырлаптыңар.
КОЛ БОДАЛ
Иегова Октаргайны болгаш бүгү амылыг чүүлдү чаяаган.
Катаптаашкын
-
Библияда Октаргайның тыптып келгениниң дугайында чүү дээн?
-
Бурган чуртталганың бөдүүн хевирлерин чаяап каарга, олар чоорту эволюцияның дузазы-биле нарын хевирлерже шилчий берген бе?
-
Кижилер чүзү-биле онзагай?
НЕМЕЛДЕ:
Чаяакчы бар деп бойдустан көскү.
«Бойдус бисти чүү чүвеге өөредип турар?» («Оттуп келиңер!» сентябрь, 2006 чыл)
Бүгү өртемчей канчаар чаяаттынганын чаш төлге тайылбырлаарын көрүңер.
Эволюция Библия-биле дүгжүп турар бе, номчуңар.
«Бурган чуртталганың аңгы-аңгы хевирлерин эволюция дузазы-биле чаяаган бе?» (веб-статья)
Палеонтологтуг бижилгелер болгаш эртем шинчилелдери чүү чүвеже айтып турар? Чуртталга чаяаттынган азы боду тывылган деп бе?
a Бурганның кижилерге хамаарыштыр үзел-бодалын 25-ки кичээлге сайгарар.
b Библияда «уксаа» деп сөс эртемденнерниң ажыглап турар термининге бодаарга, элээн делгем уткалыг.
Силерге солун бооп болур
ҮРГҮЛЧҮ САЛЫР АЙТЫРЫГЛАР
Иегованың Херечилериниң библейжи кичээлдери канчаар эртип турар?
Иегованың Херечилеринде Ыдыктыг Бижилге-биле таныжып алырынга дузалаар ажыктыг курс бар. Өөредилге үезинде бодуңарның Библияңарны ажыглап, кичээлдерже өг-бүлеңерни, эштериңерни чалап ап болур силер.
