OCIPAMA 06
Omuenyo wa Fetika Ndati?
“Ove [okuti Suku] wuno yomuenyo.” (Olosamo 36:9) O tava hẽ kolondaka viaco? Omanu vamue va sima okuti, omuenyo ka wa lulikiwile. Nda eci ocili, etu tu kasi komuenyo omo okuti tua tukuluka ño. Pole, nda Yehova Suku wa lulika omuenyo, eci nda ca kuata ocimãho, ale haicoko? a Kũlĩhĩsa ulandu Wembimbiliya u lekisa ndomo omuenyo wa fetika kuenda esunga lieci tu tavela okuti, ulandu waco wocili.
1. Ongongo kuenda olombungululu via fetika ndati?
Embimbiliya liti: “Kefetikilo Suku wa lulika ovailu kuenda ongongo.” (Efetikilo 1:1) Olonoño vialua vi tava okuti, ongongo kuenda olombungululu via kuata efetikilo. Suku wa vi lulika ndati? Eye wa talavaya ‘longusu ya pama’—okuti, espiritu sandu, oco a lulike ovina vialua violuali oku kongelamo oviengele, olombungululu kuenda oviengele vikuavo.—Efetikilo 1:2.
2. Momo lie Suku a lulikila ongongo?
Yehova “[ongongo] ka yi lulikile oco yi kale upolokoso, pole, wa yi sovola oco mu tungiwe.” (Isaya 45:18) Eye wa lulika ongongo oco yi kale ocitumãlo cimue ciwa kuenda oku kuata ovina viosi omanu va sukila oco va kale komuenyo otembo ka yi pui. (Tanga Isaya 40:28; 42:5.) Uloño u lekisa okuti, ongongo ocina cimue cilikasi kuenda ya litepa loviengele vikuavo. Ocengele caco oco lika ci ecelela omanu oku kuata omuenyo.
3. Etepiso lipi li kasi pokati komanu lovinyama?
Yehova noke yoku lulika ongongo, wa kapamo omuenyo. Catete, Yehova wa lulika ovikũla kuenda ovinyama. Kuenje “Suku wa lulika omunu ukuesetahãlo liaye.” (Tanga Efetikilo 1:27.) Nye ci lingisa omanu oku kala oviluvo vilikasi? Omo okuti tua lulikiwa lesetahãlo lia Suku, tu pondola oku kuata ovituwa ndevi viaye ndeci, ocisola kuenda esunga. Eye wa tu lulika luloño woku lilongisa alimi, oku komõha ovina via posoka kuenda oku sola ovisungo. Ca litepa lovinyama ceci okuti, etu tu pondola oku fendela Ululiki wetu.
LILONGISA ONDONGOSI
Kũlĩhĩsa uvangi wokuti, omuenyo wa lulikiwa kuenda ulandu Wembimbiliya watiamẽla koku lulika wocili. Lilongisa eci ovituwa viomanu vi tu longisa catiamẽla ku Suku.
4. Omuenyo wa lulikiwa
Omanu va siata oku pandiyiwa omo lioku panga ovina vimue va setukula kovina via lulikiwa. Pole, helie o sesamẽla esivayo kovina via lulikiwa? Tala OVIDEO, noke konomuisa epulilo li kuãimo.
-
Ocina cipi omanu va setukula kovina via lulikiwa?
Onjo yosi ya tungiwa la umue. Pole, helie wa tunga ovina viosi voluali luosi? Tanga Va Heveru 3:4, noke konomuisa apulilo a kuãimo:
-
Kilu lieve oviluvo vipi vi ku komõhisa?
-
Ca sunguluka hẽ oku tava okuti ongongo kuenda olombungululu lovina vikuavo vi kasimo via lulikiwa? Momo lie?
Wa ci kũlĩha?
O pondola oku sanga ovipama kuenda olovideo viatiamẽla kosapi eyi vo jw.org polonepa “Ca Lulikiwa?” kuenda “Ovisimĩlo Viatiamẽla Kono Yomuenyo.”
“Ocili okuti onjo yosi ya tungiwa la umue, pole, u wa tunga ovina viosi Suku”
5. Ulandu Wembimbiliya watiamẽla koku lulika wocili
Kelivulu Liefetikilo kocipama 1, Embimbiliya li tukula ono yongongo kuenda yomuenyo. O pondola hẽ oku kolela kulandu owu, ale o sima okuti wesanda? Tala OVIDEO, noke konomuisa apulilo a kuãimo.
-
Anga hẽ Embimbiliya li longisa okuti ongongo kuenda omuenyo via lulikiwa volowola 24 violoneke epandu?
-
O sima hẽ okuti ulandu Wembimbiliya watiamẽla koku lulika wa sunguluka kuenda wocili? Momo lie?
Tanga Efetikilo 1:1, noke konomuisa epulilo li kuãimo:
-
Olonoño vi popia okuti, ongongo kuenda olombungululu via kuata efetikilo. Ovisimĩlo viavo vi kuete elitokeko lipi leci wa mala oku tanga Vembimbiliya?
Omanu vamue, va lipula nda okuti Suku wa kuama onjila yokuti ovina vi tukuluka ño oco a lulike omuenyo. Tanga Efetikilo 1:21, 25, 27, noke konomuisa apulilo a kuãimo:
-
Anga hẽ Embimbiliya li longisa okuti Suku wa panga ociluvo cimue comuenyo wa leluka noke wa ecelela okuti ociluvo caco ci li pongolola olõsi, ovinyama kuenda omanu? Ale eye wa lulika “apata” osi omuenyo? b
6. Omanu oviluvo vilikasi via Suku
Etu tua litepa lovinyama Yehova a lulika. Tanga Efetikilo 1:26, noke konomuisa epulilo li kuãimo:
-
Omo okuti tua lulikiwa lesetahãlo lia Suku, uloño wetu woku lekisa ocisola kuenda ohenda, vi situlula nye catiamẽla kekalo lia Suku?
OMANU VAMUE VA POPIA VATI: “Ulandu Wembimbiliya watiamẽla koku lulika wesanda.”
-
Nye o sima? Momo lie?
NYE WA LILONGISA?
Yehova wa lulika ongongo, olombungululu kuenda omuenyo wosi.
Oku Pitulula
-
Nye Embimbiliya li longisa ndomo ongongo kuenda olombungululu via fetika?
-
Anga hẽ Suku wa panga ociluvo cimue comuenyo wa leluka noke wa ecelela okuti ociluvo caco ci li pongolola vapata osi omuenyo, ale eye wa a lulika osi?
-
Nye ci lingisa omanu oku kala oviluvo vilikasi?
OCO O KŨLĨHE OVINA VIKUAVO
Tala ovina via lulikiwa voluali vi situlula okuti, kuli Ululiki umue.
“Ovina vi sangiwa voluali vi tu longisa nye?” (Omasuli!, Yenyenye Linene 2006)
Tala ndomo isia umue a lomboluila komõlaye utito ulandu Wembimbiliya watiamẽla koku lulika.
Kũlĩhĩsa nda elongiso liokuti ovina via tukuluka ño li likuata Lembimbiliya.
Limbuka nda akepa osimbu ale akonomuiso ovoloño a situlula okuti omuenyo wa lulikiwa ale wa tukuluka ño.
Efetikilo Liomuenyo—Apulilo Atãlo a Sukila Oku Tambuluiwa (Ombrochura)
a Ocipama 25 ci ka lombolola ocipango ca Suku catiamẽla komanu.
b Vembimbiliya ondaka “apata” yi tiamisiwila kocimunga cimue cinene coviendalomuenyo.
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
