WIRIKAPAI 06
Waigu Raka Aenge?
“Gugaabi unga du be [Mbori].” (Atambuahe 36:9) Ya mo mo idi kuti gupai re? Gu kura aboro naberã gupai nga raka aenge nisaha. Ka si du nga rengo du nga gupai re, ani naraka mbiko mamu du namangi. Ono ka si du nga Yekova Mbori nakusi unga, ndupai kinaho ani araka ti ni, nga wo te? a Mo bingo gu pangbanga nga ga Baibiri nga gu nafura tipa wai raka aenge na ndu gupai rengbe ani ti ni ka ida kuti gupai nga gu pangbanga re nga rengo.
1. Waigu haurago aenge?
Baibiri nagumba gupai nga: ‘Ho rago aenge ni Mbori afu ngbangbaturũ na kpotosende.’ (Bambata Pai 1:1) Badungu aboro birĩ-inohe idi kuti gupai nga tonatona haurago kina ti ni. Waigu Mbori akusihe? Ko amangisunge na gako “toro,” nga gako zaaza ome mangapai, tipa ka kusa agu ahe dunduko du rogo haurago, kodihe na badona akerekuru, akerekuru gbiati apapara zegino.—Bambata Pai 1:2.
2. Tipagine Mbori akusi kpotosende ti ni?
Yekova ‘amanga nga [kpotosende] ni kungba he te, ko ambakadi he aboro niraki rogo ho.’ (Yesaya 45:18) Ko akusi kpotosende ni gu ba du ni bawenehe na ni nyenye ba fu aboro. (Mo gedi Yesaya 40:28; 42:5.) Aboro birĩ-inohe nagumba gupai nga kpotosende ima du kia. Si nga gu yangara ba rogo haurago rengbe rakiraki ahe ka raka rogoho.
3. Ginipai nasa aboro i du kia ti anya?
Tingbafuo Yekova kusi kpotosende, ko akusi unga ahe si niraki auruhe. Ni bambataha, ko ahiisi kpotosende na rukuruku ahe gbiati anya. Fuoho, ‘Mbori ki fu boro ni kpiako.’ (Mo gedi Bambata Pai 1:27.) Ginipai nasa aboro i du kia? Wa duhe nga i akusi rani rogo kpia Mbori yo, ani ima rengba ka yugo asinoko wa gu nga nyemuse gbiati rurupai. Ko akusi rani a na gu rengba nga ani wiriki kura afugo, ani gbia ngbarago ti bi wene ahe, na ki gbia ngbarago ti manzigo. Ani ima rengba ka iriso Bakusirani, nga gupai ka anya amanganga ha ya.
MO WIRIKI KURA DUNGU APAI
Mo wisigi gu goapai nayugo gupai nga i akusi unga akusa, na nayugo gupai nga, gu pangbanga nga ga Baibiri du tipa kusa ahe nga rengo. Mo wiriki gupai agu asino du ti aboro ayugoho tipa Mbori.
4. I akusi unga akusa
Aboro nagbia taarimo ti mbakada agu ahe i abi kpiaha ti agu ahe Mbori akusihe. Sidu, da du si aida ni gbia taarimo tipa kusa agu ahe re ni bambataha? Mo bi gu VIDIO re, na tifuoho, mo ki sakipai tipa gu sanahe ngbefuoho.
-
Gini ahe abambakadi ahe nambakadihe nga gu i abi kpiaha ti agu ahe Mbori akusihe?
Abambu dunduko, aboro du naduaha. Ono da nakusi agu ahe du auru kpotosende? Mo gedi AEbere 3:4, na tifuoho, mo ki sakipai tipa agi asanahe re:
-
Gini ahe nga gu Mbori akusihe ngba tiro gbe?
-
Ya mo si ruaru ani idi kuti gupai nga haurago na agu ahe dunduko du rogo yo i akusi he akusa? Tipagine?
Ya mo mo ini gipai re?
Mo ima rengba ka gbia gu kekeapai gbiati avidio du tipa gi riipai re rogo jw.org rogo gu rii-apai naye ti mburu kuraha nga “Was It Designed?” na “Viewpoints on the Origin of Life.”
“Bambiko abambu dunduko aboro du nadua ha; ono gu ko nadua ahe dunduko nga Mbori”
5. Gu pangbanga nga ga Baibiri du tipa kusa ahe nga rengo
Rogo Bambata Pai kapita 1, Baibiri fura tipa pa enga kpotosende gbiati unga ahe auruhe. Ya mo mo rengbe ka du na kido kuti gu pangbanga re, watadu kungbo paturẽ du gbua? Mo bi gu VIDIO re, na tifuoho, mo ki sakipai tipa agu asanahe ngbefuoho.
-
Ya mo Baibiri nayugo gupai nga kpotosende na gu unga ahe du rogo ho i akusihe vuru auru yo sita nga gu du na asaa rogoho 24?
-
Ya mo mo nabihe nga gu pangbanga nga ga Baibiri du tipa kusa ahe ruaru? Tipagine mo abihe ti ni wo watadu tipagine arunga ha ti ni ya?
Mo gedi Bambata Pai 1:1, na tifuoho, mo ki sakipai tipa gi sanahe re:
-
Aboro birĩ-inohe nagumba gupai nga tonatona haurago kina ti ni. Waigu gu gayo digisopai re aringbisa tihe na gupai mo nagedihe rogo Baibiri?
Bete kura aboro nabaka kina bangiriyo singia Mbori akusi taata ngbatunga raka nga gu nasu kini ka kusa kura ngbatunga dungu araka. Mo gedi Bambata Pai 1:21, 25, 27, na tifuoho, mo ki sakipai tipa agi asanahe re:
-
Ya mo Baibiri nayugo gupai nga Mbori ambakadi taata ngbatunga raka na tifuoho si ki su ki satihe ku rogo atĩo, anya gbiati aboro? Watadu ko akusi “ngbatunga” rakiraki ahe dunduko? b
6. Aboro nga gu kparakpara kusikusi ahe Mbori akusihe
Ani kia ti anya nga agura Yekova akusi ra. Mo gedi Bambata Pai 1:26, na tifuoho, mo ki sakipai tipa gi sanahe re:
-
Mbiko gupai nga i akusi rani rogo kpia Mbori yo, ginipai gu rengba du ani na ni ka yugo nyemuse gbiati wenesino ayugoho tipa agu asino du ti Mbori?
GU KURA ABORO NAPE GUPAI NGA: “Gu pangbanga nga ga Baibiri du tipa kusa ahe, si nga kungbo paturẽ.”
-
Ginipai mo aberãha? Na tipagine?
GINIPAI MO NAWIRIKIHE?
Yekova nakusi haurago na gu rakiraki ahe dunduko du rogoho.
Fugöpai
-
Ginipai Baibiri ayugoho nibipa enga zegino?
-
Ya mo Mbori ambu ngbatunga araka dunduko si su ti gu taata raka ko ambakadihe watadu ko nakusihe dunduko?
-
Ginipai nasa aboro i du kia ti anya?
MO WETEKE GU KURA APAI
Mo bi gu kpiapai nga ga gu kusikusi ahe nayugo gupai nga Bakusiahe kina ti ni.
“Ginipai Agu Ahe Mbori Akusihe Ayugoho?” (Awake!, Mbirinvuo 2006)
Mo bi wai rengbe bagude ka sakapai fu paranga wiriko tipa gu pangbanga nga ga Baibiri du tipa kusa ahe.
Mo wisigingo singia gu yugopai nga ahe akuru nisaha nandu sa na gupai Baibiri apehe.
Mo wisigingo singia meme agu aboro nadu mbata gbiati agu apai aboro biri-inohe apehe nayugo gupai nga i akusi unga akusa watadu si akuru nisaha.
a Wirikapai nga ga 25 nika sakapai tipa ga Mbori ringbisapai tipa aboro.
b Rogo Baibiri, gu fugo nga “ngba arikara” nayugo pa kikii badona nga ga rakiraki ahe.
