NÍ KASEMI 07
Kɛ O Susu Kaa Yehowa Ngɛ Ha Kɛɛ?
Ke o susu Yehowa Mawu he ɔ, mɛni lɛ baa o juɛmi mi? Anɛ o naa lɛ kaa e ji nɔ ko nɛ e he ngɛ nyakpɛ, se e ngɛ tsitsaa lokoo, kaa bɔ nɛ dodoe ɔmɛ hu a ngɛ tsitsaa lokoo ɔ lo? Aloo o susu kaa e pi nɔ ko nɛ e ngɛ nitsɛnitsɛ? Kɛ Yehowa ngɛ ha kɛɛ? Baiblo ɔ maa tsɔɔ wɔ bɔ nɛ Yehowa ngɛ ha tutuutu, suhi nɛ e ngɛ, kɛ jehanɛ se hu bɔ nɛ e susuɔ o he ha.
1. Mɛni he je nɛ wa nɛ́ Mawu kɛ wa hɛngmɛ ɔ?
‘Mawu ji Mumi.’ (Yohane 4:24) Yehowa be he lo nɔmlɔ tso kaa bɔ nɛ wa ngɛ ɔ, mohu ɔ, e ji Mumi nɛ e ngɛ hiɔwe. Hiɔwe ji he ko nɛ wa be nyɛe maa na kɛ wa hɛngmɛ.
2. Mɛni ji Yehowa su komɛ?
E ngɛ mi kaa wa nɛ Yehowa kɛ wa hɛngmɛ mohu lɛɛ, se e ji Nɔ Ko nɛ e ngɛ nitsɛnitsɛ, nɛ ke wa ba le lɛ saminya a, wa maa suɔ lɛ, ejakaa e ngɛ su kpakpahi fuu. Baiblo ɔ de ke: ‘Yehowa suɔ nɔ́ nɛ da, nɛ nihi nɛ yeɔ lɛ anɔkuale ɔ, e kua we mɛ.’ (La 37:28) Jehanɛ se hu ɔ, e “mi mi hi wawɛɛ nɛ e ji mɔbɔ nalɔ.” E jeɔ su nɛ ɔmɛ kpo kɛ tsɔɔ nihi nɛ a ngɛ nɔ́ nae ɔ titli. (Yakobo 5:11) ‘Nihi nɛ a kɔni mi jɔ̃, kɛ nihi nɛ a be hɛ nɔ kami ɔ, Yehowa hii a kasa nya, konɛ e wo mɛ he wami.’ (La 34:18) Anɛ o le kaa wa ní peepee ma nyɛ ma ha nɛ́ Yehowa bua nɛ jɔ, nɛ e ma nyɛ ma ha nɛ e hao hulɔ lo? Ke nɔ ko peeɔ yayami ɔ, e dɔɔ Yehowa nɛ e yeɔ aywilɛho. (La 78:40, 41) Se ke nɔ ko peeɔ nɔ́ nɛ da a, e haa nɛ Yehowa bua jɔɔ.—Kane Abɛ 27:11.
3. Mɛni Yehowa pee kɛ tsɔɔ kaa e suɔ wɔ?
Yehowa su ko nɛ se be ji suɔmi. Ngɛ anɔkuale mi ɔ, “Mawu ji suɔmi.” (1 Yohane 4:8) Baiblo ɔ nɛ́ Yehowa ha wɔ, kɛ níhi nɛ e bɔ ɔmɛ haa nɛ wa naa kaa e suɔ wɔ. (Kane Ní Tsumi 14:17.) Kaa nɔ hyɛmi nɔ́ ɔ, mo susu bɔ nɛ e bɔ wɔ ha a he nɛ o hyɛ. E bɔ wɔ konɛ wa bua nɛ jɔ kɔla slɔɔtohi nɛ a ngɛ fɛu, la ngɔngɔɛhi, kɛ niye ní ngɔngɔɛhi a he. E suɔ nɛ́ wa bua nɛ jɔ wa he ngɛ si himi mi.
MOO KASE BABAUU
Moo kase he wami nɛ́ Yehowa kɛ pee níhi nɛ́ a ngɛ nyakpɛ ɔ he ní. Jehanɛ se hu ɔ, moo kase bɔ nɛ Yehowa jeɔ e suhi nɛ a se be ɔmɛ kpo kɛ tsɔɔ wɔ ha a he ní.
4. Mumi klɔuklɔu ɔ ji he wami nɛ Mawu kɛ tsuɔ ní
Kaa bɔ nɛ waa kɛ wa nine tsuɔ ní ɔ, jã nɔuu nɛ Yehowa hu guɔ e mumi klɔuklɔu ɔ nɔ kɛ tsuɔ ní. Baiblo ɔ tsɔɔ kaa mumi klɔuklɔu ɔ pi nɔmlɔ, mohu ɔ, e ji he wami nɛ Mawu kɛ tsuɔ ní. Nyɛɛ kane Ní Tsumi 2:17, 6:3, nɛ́ nyɛ susu sane bimihi nɛ nyɛɛ se nɛ ɔmɛ a he:
-
Mawu ma nyɛ ma plɛ e mumi klɔuklɔu ɔ kɛ pue nihi a nɔ, nɛ mumi klɔuklɔu ɔ ma nyɛ ma hyi nihi tɔ. Lɔ ɔ ngɛ ngmami nɛ ɔ nya a, anɛ o susu kaa mumi klɔuklɔu ɔ ji nɔmlɔ lo? Mɛni he je nɛ o de jã a?
Yehowa guɔ e mumi klɔuklɔu ɔ nɔ kɛ tsuɔ nyakpɛ níhi. Nyɛɛ kane La 33:6 kɛ 2 Petro 1:20, 21, nɛ nyɛ susu sane bimi nɛ ɔ he:
-
Mɛni ji ní komɛ nɛ́ Yehowa kɛ e mumi klɔuklɔu ɔ pee?
5. Yehowa ngɛ su kpakpahi fuu
Mose ji Mawu sɔmɔlɔ nɛ́ e yeɔ anɔkuale, se kɛ̃ ɔ, e suɔ nɛ́ e le e Bɔlɔ ɔ saminya. Lɔ ɔ he ɔ, Mose de Mawu ke: “Moo tsɔɔ mi o blɔ ɔ, konɛ ma le mo saminya.” (2 Mose 33:13) Enɛ ɔ he ɔ, Yehowa tsɔɔ Mose e suhi nɛ e ngɛ ɔ ekomɛ. Nyɛɛ kane 2 Mose 34:4-6, nɛ nyɛ susu sane bimihi nɛ nyɛɛ se nɛ ɔmɛ a he:
-
Mɛni ji Yehowa su komɛ nɛ e wo nɔ ta kɛ tsɔɔ Mose?
-
Yehowa su ɔmɛ a kpɛti te nɛɛ lɛ o bua jɔ he wawɛɛ?
6. Yehowa susuɔ nihi a he
Mawu sɔmɔli nɛ ji Hebri bi ɔmɛ ya je nyɔguɛ yemi sisi ngɛ Egipt zugba a nɔ. Benɛ a ngɛ mɛ yi mi wae nɛ a ngɛ nɔ́ nae ɔ, kɛ Yehowa nu he ha kɛɛ? Moo fia MUNYU NƐ A FIAA NƐ A BUƆ TUE ɔ, aloo nyɛɛ kane 2 Mose 3:1-10. Lɔ ɔ se ɔ, nyɛ susu sane bimihi nɛ́ nyɛɛ se nɛ ɔmɛ a he.
-
Ngɛ ngmami nɛ ɔ nya a, kɛ Yehowa nuɔ he ha kɛɛ, ke adesahi ngɛ nɔ́ nae?—Hyɛ kuku 7, 8.
-
Anɛ o susu kaa Yehowa suɔ nɛ́ e ye bua adesahi lo? Ke o hyɛ ɔ, e ma nyɛ maa pee jã niinɛ lo? Mɛni he je nɛ o de jã a?
7. Adebɔ níhi haa nɛ wa naa Yehowa suhi
Wa naa Yehowa suhi ngɛ níhi nɛ e bɔ ɔmɛ a mi. Mo je VIDEO ɔ. Lɔ ɔ se ɔ, nyɛɛ kane Roma Bi 1:20, nɛ́ nyɛ susu sane bimi nɛ ɔ he.
-
Mɛni ji Yehowa su komɛ nɛ o naa ngɛ níhi nɛ e bɔ ɔmɛ a mi?
NI KOMƐ DEƆ KE: “Mawu ɔ, pi nɔ ko nɛ e ngɛ nitsɛnitsɛ.”
-
Kɛ o susu kɛɛ?
-
Mɛni ha o susu jã a?
NYA MWƆMI
Wa be nyɛe maa na Yehowa kɛ wa hɛngmɛ ejakaa Mumi ji lɛ, se e ngɛ su kpakpahi fuu, titli ɔ, suɔmi.
Mi Nylɔmi
-
Mɛni he je nɛ wa be nyɛe maa na Yehowa kɛ wa hɛngmɛ ɔ?
-
Mɛni ji mumi klɔuklɔu ɔ?
-
Mɛni ji suhi nɛ́ Yehowa ngɛ ɔ ekomɛ?
NÍ KPAHI NƐ MAA YE BUA MO
Moo kase Yehowa su titli eywiɛ komɛ a he ní, konɛ lɔ ɔ nɛ ha nɛ o le lɛ saminya.
Moo kase níhi nɛ maa nɔ mi kaa Yehowa be he fɛɛ he ko ɔ he ní.
Moo hyɛ nɔ́ he je nɛ Baiblo ɔ tsɛɛ mumi klɔuklɔu ɔ ke Mawu nine ɔ.
E he wa kɛ ha nyumu ko nɛ e hɛngmɛ yu ɔ kaa e ma he ye kaa Mawu suɔ lɛ. Se moo hyɛ nɔ́ nɛ ye bua lɛ nɛ́ e tsake e susumi.
“Amlɔ Nɛ ɔ Lɛɛ I Nuɔ He Kaa Ma Nyɛ Ma Ye Bua Ni Kpahi” (Hwɔɔmi Mɔ ɔ mi munyu)