PONJI MIR 07

Yehova tie Ng’atu ma nenedi?

NG'II DHOK M'IMARU

Ibed iparu nia Yehova Mungu tie Ng’atu ma nenedi? Dhanu moko giyiyo nia etie Mungu ma dwong’ andha, ento giparu nia ebor akeca kudwa, ma waromo bedo ngo gin moko i wang’e kadi nibedo jurimbe de. Jumoko ke paru nia etie ngo Ng’atu m’unuti andha, ento piny moko ma tie ku tego ma lee ve yamu. Dong’ i andha, Yehova tie Ng’atu ma nenedi? Biblia unyutho iwa kite (kurayung) moko pa Yehova. Enyutho bende nia Yehova ubedieng’ piri.

1. Pirang’o wacopo neno ngo kum Mungu?

“Mungu en e tipo.” (Yohana 4:24) Yehova tie ku kum ma ve mwa e ngo. Etie ku kum mi tipo ma kwo i polo, kaka ma wa dhanu wacopo neno ngo.

2. Kite pa Yehova moko

Kadok waromo neno ngo kum Mungu de, re tekene wabeponjo ning’eye, wacaku mare lee pilembe etie Ng’atu m’unuti andha man etie ku kite dupa ma beco. Biblia uyero kumae: “Yehova maru bedopwe, man ekuno jumaleng’ pare ngo.” (Zaburi 37:28) Etie bende “won ngisi (won mer lee) ku kisa bende,” asagane ni dhanu ma gibesendiri. (Yakobo 5:11) ‘Yehova ni ceng’ini ku ju ma adundegi tur, man ebodho wagi ju ma cwinygi dieng’.’ (Zaburi 34:18) Nyo ing’eyo bende nia timo mwa copo foyo iye kunoke copo nyayu can i iye? Ka ng’atu moko ubetimo lembe ma rac mir akakaka, lembene nyayu can man eton i iye bende. (Zaburi 78:40, 41) Ento kan ibetimo lembe m’atira, inyayu mutoro i iye.—Som Lembrieko 27:11.

3. Yehova benyutho nenedi nia emaruwa?

Kite (kurayung) pa Yehova ma dit man ma cuu nisagu zoo utie mer. I andha, Biblia uyero ngo kende kende nia Mungu tie ku mer, ento nia “en [gire zoo] e mer.” (1 Yohana 4:8) Yehova ubenyutho iwa mer pare nikadhu kud i Biblia man bende nikadhu kud i piny m’ecwiyo. (Som Tic mi Jukwenda 14:17.) Ku lapor, ecwiyowa i ayi ma segi dit. Emiyo iwa copo mi neno rangi dupa ma beco, mi winjo mizik ma beco, man mi bilo mido cam. Eno nyutho nia ebemito wakwo kud anyong’a.

MED NYANG’ PERI

Wakenen kawoni lembe ma wang’u ic ma Yehova ubecuku timo. Wanen bende ayi ma Yehova ubenyutho ko iwa kite kunoke kura pare ma beco.

4. Tipo ma leng’ tie tego ma Mungu timo ko tic

Tap calu ma wabed watiyo ku cingwa pi nitimo tic, Yehova bende betiyo ku tipo ma leng’ pare kumeno. Biblia unyutho nia tipo ma leng’ utie ngo mungu, ento etie tego ma Mungu betiyo ko pi nitimo lembe ma tung’ tung’. Som Luka 11:13 man Tic mi Jukwenda 2:17, man i ng’eye wuwec iwi penji m’ulubo e:

Mungu ‘bikonjo’ tipo ma leng’ pare iwi ju m’ubekwaye. Dong’ nyo ibeparu nia tipo ma leng’ne copo bedo ng’atini, kunoke nyo etie tego ma Mungu timo ko tic? Pirang’o ibewacu kumeno?

Yehova betiyo ku tipo ma leng’ pare pi nitimo lembe ma wang’u ijo. Som Zaburi 104:30 man 2 Pethro 1:20, 21, man i ng’eye wuwec iwi penji m’ulubo e:

Yehova udaru tiyo ku tipo ma leng’ pare pi nitimo lembe moko ma kani?

5. Kite pa Yehova tie beco lee

Musa ubino jatic ma pwe pa Mungu, re asu egam emito eng’ey Jacwic pare cuu nisagu. Uketho ekwayu Mungu kumae: ‘Nyuth ira yo peri, kara ang’eyi.’ (Ai 33:13) Pi nidwoko wang’ kwac pare, Yehova unyutho ire kite pare moko, niwacu enyutho ire nia etie Ng’atu ma nenedi. Som Ai 34:4-6, man i ng’eye wuwec iwi penji m’ulubo e:

Yehova unyutho kite pare moko ma kani ni Musa?
Kekwan kite parene moko ma nyeng’i nisagu

6. Yehova ubedieng’ pi dhanu

I rundi ma con, dhanu pa Mungu, niwacu Juisrael, gineno can lee i Misiri kum gibino ng’eca. Yehova uwinjere nenedi i kum masendi migi? Keth DWAL MIR AWINJA man woth lubo somne kud i Biblia peri i Ai 3:1-10, kunoke som versene asoma. I ng’eye, wuwec iwi penji m’ulubo e:

DWAL MIR AWINJA: Yehova udieng’ pi masendi migi (2:45)

Nimakere ku verse maeni, Yehova bewinjere nenedi i kum masendi mi dhanu?—Nen verse mir 7 ku mir 8.
Nyo iparu Yehova utie andha kud ava man copo mi daru masendi mi dhanu? Pirang’o ibeparu kumeno?

7. Piny ma Yehova ucwiyo ubenyutho iwa kite pare kamaleng’

Yehova ubenyutho iwa kite pare ma tung’ tung’ nikadhu kud i piny m’ecwiyo. Nen VIDEO. I ng’eye, som Jurumi 1:20, man wuwec iwi penji m’ulubo e: