INU NKWEEN̄ 07

Mbet Ene Okukup Ke Jioba Ore?

FIT

Osikikeek mkpọ ofolek Jioba, keke okinu owu me ejit? Jioba ire ogwu ebekaan̄ ukpook me lek bak lek ikupbe me ujọn̄ọ ere kubọk ntoronyan̄ okup me akpabin inyọn̄ ni? Mè iyaka ire, ire okeek ibe ke Jioba ikaan̄ unye, ire, ikakaan̄ ugwem ubọk isinyọn̄ okisook okaan̄be unye mè ikakaan̄ge ugwem ni? Ike owa ke Jioba ochubọk ikup? Inan̄a me lek Usem kan̄, orere Baibul, Jioba ikpọk mbum usini eru echi ikaan̄be melek ulọk ikaan̄be me lek kwun̄.

1. Keke orọ eji kpekikọt imun̄ Awaji?

“Awaji ìre ekwukwu.” (Jọn 4:24) Jioba ikakaan̄ anam akpalek. Ọmọ ire Ekwukwu okiluk me emen inyọn̄, ere eji kpekọtge imun̄.

2. Keke ore usini me lek eru echi Jioba okaan̄be?

Jioba omaan̄ me atikọ ikerere ibe ke eji kpekimun̄ ọmọ, ikaan̄ si eru echi okitaba ebi irọriọọn̄ ọmọ iriaak me lek kan̄. Baibul ibe ke Jioba “îma irọrọ inu ònenen; eya orọ, ìkabojit ebi ìkekeke inye me lek kan̄ mgbọ geege.” (Okwa Itọn̄ 37:28) Ọmọ si ire ogwu okakaan̄ “ejit njijin, mè ejit nsan,” ògak ge, me lek ebi ikibọkọ ukwook. (Jemis 5:11) Jioba “òwa me agba lek ebi uga ufieejit; ìkinyan̄a ebi kpeyaka ikaan̄ ikpọchieen̄ geege.” (Okwa Itọn̄ 34:18) Ire oriọọn̄ ibe ke eru kiji ikikaan̄ mgbaan̄ me lek Jioba ni? Ire ene igobo irọrọ ijo inu, ene ya ikirọ inyi ejit inaan̄ ọmọ. (Okwa Itọn̄ 78:40, 41) Ire, ogwu okirọ inu otatat ikirọ inyi ejit kan̄ ibele.—Fuk Urọk 27:11.

3. Kpa ubọk ke Jioba okisa ijeen̄ ibe ke ọmọ ima eji?

Me lek eru echi Jioba okaan̄be, eyi okukup okpan okpan ire ima. Me atikọ, “Awaji ìre imumechieen̄.” (Jọn Eyi Adasi 4:8) Jioba ikpọk mbum ima kan̄ ikare gaalek inan̄a me lek Baibul, ire, inan̄a me lek mkpọ echi irombe si. (Fuk Ikwaan̄ 14:17.) Kubọk inu njeen̄, keek nu ubọk irombe eji. Jioba irọ inyi eji ekọt ekemun̄ esese esese chieen̄ inu, ekegban̄ atalek okwa mè ekenwọọn̄ utop utop inorie. Ichubọk iweek ibe eji enwọọn̄ ugwem.

KWEEN̄ GBAALEK

Kween̄ ubọk Jioba okisa irọ uyeke uyeke mkpọ. Mè mun̄ ike Jioba okisa ikpọk mbum ukama ukama eru echi ikaan̄be.

4. Ekwukwu mbuban—unye Awaji

Jioba ikisa ekwukwu mbuban kan̄ isi ikwaan̄ ike eji ekisa ubọk kiji isi ikwaan̄. Baibul ijeen̄ ibe ke ekwukwu mbuban ire unye Awaji okisa irọ inu, ikare ene. Fuk Luk 11:13 mè Ikwaan̄ 2:17, mè igbaan̄ ikpa idodo chi:

Ire eji ibeek ibe Awaji inyi eji ekwukwu mbuban, monyi eji. Eya orọ, ire okikeek ibe ke ekwukwu mbuban ire ene ni? Keke orọ ofọọkbe ikeya?

Jioba ikisa ekwukwu mbuban kan̄ irọ mkpọ uyeke uyeke. Fuk Okwa Itọn̄ 33:6 mè Pita Eyi Òso Iba 1:20, 21, mè igbaan̄ ikpa idodo yi:

Me oniin̄ okukup ke Jioba osa ekwukwu mbuban kan̄ irọ mkpọ?

5. Jioba ikaan̄ eru echi okitaba ene iriaak me lek kan̄

Mosis ire ogwu usun̄ Awaji ogbegbe utoon̄-ejit, ire, iweek irọriọọn̄ Ogwu Ororom ọmọ ijaan̄. Ọmọ orọ Mosis otumube inyi Awaji ibe: “Soso jeen̄ emi nkeek kwun̄, mè ǹriọọn̄ owu ǹjaan̄.” (Isisibi 33:13) Jioba ifọọk Mosis sa me ikpakpa inyi ọmọ mbet ene Ọmọ orebe. Fuk Isisibi 34:4-6, mè igbaan̄ ikpa idodo chi:

Kpasi agọọk me lek eru kan̄ ke Jioba okpa inyi Mosis?
Eru eyi owa ke oma ichit?

6. Jioba ima ebi ene

Ebi eyi Awaji, orere, ebi Ijeren mikup me irek usun̄ me Ijipiti. Ike owa ke ukwook ebi Ijeren ebọkọbe me mgbọ ema ekupbe me irek usun̄ me Ijipiti okup me lek Jioba? Fit AUDIO yi mè kikpọ mè iyaka ire fuk Isisibi 3:1-10. Mè igbaan̄ ikpa idodo chi ogọgọọk.

AUDIO: Jioba Ikpọ Ema Chieen̄ Me Lek Me Mgbọ Ufialek (2:45)

Mfufuk yi ijeen̄ owu keke ofolek ubọk ukwook ebilene ekibọkọ okikup me lek Jioba?—Kpọ agba 7 mè 8.
Ire okeek ibe ke Jioba ichubọk iweek itatap ubọk inyi ebilene, ke ọmọ mokọt irọ ikeya ni? Keke orọ ofọọkbe ikeya?