PES 07
Lelaa Yéhôva a yé
We u nhégda le Yéhôva a yé lelaa? Ngandak bôt i nhoñol le Djob a nlôôha ba nkeñi, a bak ki haa ni bés kayéle a nla bé tôñ bés inyule di nlôôha ba dipéda. Baa u nhoñol le tolakii Djob a yé nu ngui yosôna, a nkona bé ngoo? Ndi lelaa Yéhôva a yé toi? Mu Lipôdôl jé le Bibel, Yéhôva a ñunda bés lelaa a yé, a ébga ki le a ntôñ bés.
1. Inyuki di nla bé tehe Djob?
“Nyambe a yé Mbuu.” (Yôhanes 4:24) Yéhôva a gwé bé nyuu i mut binam. A yé Mbuu. A nyééne i ngii.
2. Djob a gwé bimbe bilem?
Kiki u mba u nigil bilem bi Djob ikété Bibel, w’a léba le a niñ toi, a bak ki Mut nu a nla yila liwanda joñ. Bibel i nkal le: “Inyule Yéhôva a ngwés telepsép, a ga tjôô bé ba ba tiñi ni nye.” (Tjémbi 37:28) Bibel i nkônde ki le “a yôni ni ñem gwéha lôñni konangoo,” téntén inyu i bet ba nok ndutu. (Yakôbô 5:11) “Yéhôva a yé bebee ni ba ba gwé miñem mi mi yé nkogok; a ntohol ki ba ba nimis makénd.” (Tjémbi 34:18, matila isi lipep.) Baa u nyi le maboñok moñ ma nla kônha Yéhôva maséé tole ma nla unbaha nye? I mut a mpohol i boñ bibéba bi mam a ñunbaha Yéhôva. (Tjémbi 78:40, 41) Ndi i mut a mpohol i boñ loñge, a nkônha ñem wé maséé.—Añ Bingéngén 27:11.
3. Lelaa Yéhôva a ñéba le a ngwés bés?
Lem i Yéhôva i bisu i yé gwéha. “Nyambe a yé gwéha.” (1 Yôhanes 4:8) Gwéha i Yéhôva i nene ndik bé mu lipôdôl jé le Bibel, ndi i nene yak mu mam a bi hek. (Añ Minson mi baôma 14:17.) Kiki ’héga, béñge lelaa a bi hek bés. A bi ti bés mis inyu béñge biloñge bi gwom, a ti bés maôô inyu emble nsik, a ti ki bés hilémb inyu nok line li bijek bilam. A ngwés le di ba maséé mu niñ yés.
KÔNDE TÉM
Béñge lelaa Yéhôva a bi hek bihélha bi mam, i mbus u béñge lelaa a ñéba bés bilem gwé.
4. Mbuu mpubi u yé ngui i Djob
Kiki di ngwélél moo més inyu sal, hala nyen yak Yéhôva a bi gwélél mbuu wé mpubi inyu hek. Bibel i niiga le mbuu mpubi u ta bé mut. Ndi u yé ngui Nyambe a ngwélél inyu boñ ngandak mam. Añ Lukas 11:13, ni Minson mi baôma 2:17, i mbus ni kwélél mambadga mana:
-
Ibale bôt ba mbat nye mbuu wé mpubi, Djob a ga ti bo wo. Ndi baa u nhoñol le mbuu mpubi u yé ngim mut tole u yé ngui Djob a ngwélél inyu boñ mam? Inyuki u nkal hala?
Yéhôva a ngwélél mbuu wé mpubi inyu boñ bihélha bi mam. Añ Tjémbi 33:6 ni 2 Pétrô 1:20, 21, i mbus ni kwélél mbadga ini:
-
Baa u nla sima ngim mangéda Yéhôva a bi gwélél mbuu wé mpubi?
5. Bilem bi Yéhôva bi ntinde bés i kôôge nye bebee.
Môsi a bé ngwélél Djob, ndi to hala a bé gwés tibil yi Nhek wé. Jon Môsi a kal le: “Boñ le me yi manjel moñ, kayéle me yi we.” (Manyodi 33:13) Inyu timbhe nye, Yéhôva a bi yeelene nye njee a yé. Añ Manyodi 34:4-6, i mbus ni kwélél mambadga mana:
-
Yéhôva a bi éba Môsi le a gwé bimbe bilem?
-
Bimbe bilem bi Yéhôva bi nlémél we tôbôtôbô?
6. Yéhôva a ntôñ litén jé
Bon ba Lôk Héber ba ba bé litén li Djob, ba bé minkol i loñ Égiptô. Kii Yéhôva a bé nôgda ngéda litén jé li bé nok ndutu? Emble LISOÑGOL tole Añ Manyodi 3:1-10. I mbus ni kwélél mambadga mana.
-
I jam u ñemble li ñunda le kii Yéhôva a nôgda ngéda a ntehe bôt ba binam ba nok ndutu?—Béñge minlôñ 7, ni 8.
-
Baa u nhoñol le Yéhôva a gwé toi ngôñ i hôla bôt ba binam ni le a gwé ki ngui i boñ hala? Inyuki?
7. Di nla nigil bilem bi Djob ngéda di mbéñge bihégél
Bihégél bi nyeelene bés bilem bi Yéhôva. Tuk VIDÉÔ. Añ Rôma 1:20, i mbus ni kwélél mbadga ini.
-
Bimbe bilem bi Yéhôva u nyimbe mu mam a bi hek?
BÔT BAPE BA NKAL LE: “Djob a ta bé mut, a yé homa nyensôna.”
-
We u nhoñol laa?
-
Inyuki u nhoñol hala?
I SEM KWEP
Yéhôva a yé mbuu, di nla bé tehe nye, a gwé ngandak bilem, ndi lem yé bisu i yé gwéha.
Mambadga ma mbigda
-
Inyuki di nla bé tehe Yéhôva?
-
Kii i yé mbuu mpubi?
-
Baa u nla sima ngim bilem bi Djob?
KÔNDE YÉÑ
Tibil yi Yéhôva, u tibil ki yi bilem gwé bi-na bi tôbôtôbô.
Béñge mam ma nla kwés we nkaa le Yéhôva a ta bé homa nyensôna ni le a ta bé ikété hiki yom.
“Baa Djob a yé homa nyensôna i nlélém ngéda?” (kee i jw.org)
Béñge inyuki Bibel i hégha mbuu mpubi ni moo ma Djob.
Mut ndim wada a bé hoñol le Djob a ntôñ bé nye. Ndi kii i bi hôla nye i héñha mahoñol?