LIKE SUANLƐ 07
?Zoova ti wafa sɛ?
?A bu i kɛ Zoova ti wafa sɛ? Sran wie’m be bu i kɛ Ɲanmiɛn le ɲrun dan naan be kwlá faman be wun be mɛntɛnmɛn i. ?A bu i sɔ wie? ?A bu i kɛ ɔ timan sran naan ɔ ti kɛ angblannan sa? ?Kɛ a niɛn i sa’n, Zoova ti sɛ? Biblu’n kle e sran wafa nga Zoova ti’n. Ɔ kle e kɛ e ndɛ lo i.
1. ?Ngue ti yɛ e kwlá wunman Ɲanmiɛn-ɔn?
“Ɲanmiɛn ti aolia nun sran.” (Zan 4:24) Ɔ leman wunnɛn kɛ klɔ sran’m be liɛ’n sa. Yɛ ɔ tran ɲanmiɛn su lɔ.
2. ?Nzuɛn benin yɛ Zoova yi i nglo-ɔ?
E kwlá wunman Zoova, sanngɛ kɛ e ko si i’n, e klo i. Afin i nzuɛn’n ti kpa. Biblu’n se kɛ: “Zoova klo sa nuan su sɛsɛ yolɛ’n, yɛ ɔ su yimɛn i sufuɛ kpa’m be ase le.” (Jue Mun 37:28) Asa ekun’n, ɔ ‘kle kɛ ɔ klo sran dan yɛ ɔ si sran aunnvɔɛ.’ I li be nga afɛ o be su’n yɛ ɔ yo i sɔ be lika kpa-ɔ. (Zaki 5:11) “Zoova mantan be nga be awlɛn w’a kpɔtɔ be klun’n, ɔ de be nga be akunndan’n w’a sanngan’n.” (Jue Mun 34:18, ndɛ ng’ɔ o ja ngua lɔ’n) ?A si kɛ like nga e yo’n, ɔ kwla yo Zoova i fɛ annzɛ ɔ kwla bo i wla? Kɛ sran kun yo sa tɛ’n, i sɔ’n yo i ya, yɛ ɔ bo i wla. (Jue Mun 78:40, 41) Sanngɛ kɛ sran kun yo sa kpa’n, i sɔ’n jɔ Ɲanmiɛn klun.—Kanngan Nyanndra Mun 27:11 nun.
3. ?Wafa sɛ yɛ Zoova kle kɛ ɔ klo e-ɔ?
Like cinnjin kpafuɛ nga be fa sie Zoova i nzɔliɛ’n yɛle i sran klolɛ’n. I kpa bɔbɔ’n, Biblu’n se kɛ “Ɲanmiɛn ti klolɛ.” (1 Zan 4:8) Nán Biblu’n i ngunmin yɛ ɔ kle kɛ Zoova klo sran-ɔn, sanngɛ ninnge ng’ɔ yili be’n be kle sɔ wie. (Kanngan Sa Nga Be Yoli’n 14:17 nun.) I wie yɛle wafa ng’ɔ yili e’n. Sɛ like kun i ɲin ti ɔkwlɛ, annzɛ ɔ ti ble, annzɛ ɔ ti wafa uflɛ’n, e kwla wun i wlɛ. E kwla tie miziki fɛfɛ mun, yɛ kɛ e di aliɛ’n e kwla wun i fɛ. I sɔ’n kle kɛ ɔ kunndɛ kɛ e wun e wun fɛ.
SI NDƐ’N NUN KPA EKUN
Maan e nian like nga Zoova fa yi ninnge mun’n. I sin’n, é wá wún wafa nga Zoova yi i nzuɛn’n i nglo.
4. Ɲanmiɛn i wawɛ’n yɛle Ɲanmiɛn i wunmiɛn m’ɔ fa yo ninnge mun’n
E liɛ’n, e sa yɛ e fa yo ninnge mun-ɔn. Zoova liɛ’n, i wawɛ’n yɛ ɔ fa yo ninnge mun-ɔn. Biblu’n kle kɛ Ɲanmiɛn i wawɛ’n timan sran. Ɲanmiɛn i wunmiɛn m’ɔ fa yo ninnge mun’n yɛ be flɛ sɔ-ɔ. An kanngan Liki 11:13 nin Sa Nga Be Yoli’n 2:17 nun, i sin’n an koko kosan yɛ’m be su yalɛ:
-
Biblu’n se kɛ Ɲanmiɛn wá ‘fɛ́ i wawɛ’n mán’ be nga be srɛ i. ?Ɔ maan kɛ a niɛn i sa’n Ɲanmiɛn i wawɛ’n ti sran? ?Annzɛ yɛle i wunmiɛn m’ɔ fa yo ninnge mun’n? ?Ngue ti yɛ a se sɔ-ɔ?
Zoova fɛ i wawɛ’n yo abonuan sa mun. An kanngan Jue Mun 33:6 nin 2 Piɛli 1:20, 21 nun, i sin’n an koko kosan yɛ’n i su yalɛ:
-
?Ninnge benin mun yɛ Zoova fɛli i wawɛ’n yoli-ɔ?
5. Zoova i nzuɛn’n yo ɲɛnmɛn
Moizi ti Ɲanmiɛn i sufuɛ kpa, sanngɛ ɔ kunndɛli kɛ ɔ́ sí Ɲanmiɛn i kpa ekun. Ɔ maan Moizi seli i kɛ: “Yo maan n si ɔ atin mun. I liɛ’n, ń kwlá sí wɔ.” (Ezipti Lɔ Tulɛ 33:13) Zoova yili sran wafa ng’ɔ ti’n i nglo kleli Moizi. An kanngan Ezipti Lɔ Tulɛ 34:4-6 nun, i sin’n an koko kosan yɛ’m be su yalɛ:
-
?Zoova i nzuɛn benin yɛ ɔ kɛnnin i ndɛ kleli Moizi-ɔ?
-
?Zoova i nzuɛn benin yɛ a klo i kpa-ɔ?
6. Sran’m be ndɛ lo Zoova
Ebre mɔ be ti Ɲanmiɛn i sran mun’n, be yoli kanga Ezipti lɔ. ?Kɛ bé wún ɲrɛnnɛn’n, wafa sɛ yɛ i sɔ’n yoli Zoova-ɔ? An bo BIBLU’N NUN KANNGANLƐ’N. Kɛ bé kánngan nun’n, an nian su Biblu’n nun. Annzɛ kusu an kanngan Ezipti Lɔ Tulɛ 3:1-10 nun, i sin’n an koko kosan yɛ’m be su yalɛ:
-
?Kɛ sran’m be wun ɲrɛnnɛn’n, wafa sɛ yɛ i sɔ’n yo Zoova-ɔ?—Nian ndɛ mma 7 nin 8 nun.
-
?A bu i kɛ Zoova kunndɛ kɛ ɔ́ úka sran mun sakpa? ?A bu i kɛ ɔ kwla uka be? ?Ngue ti-ɔ?
7. Ninnge nga Zoova yili be’n be yi i nzuɛn’n i nglo
Zoova i nzuɛn’n i ɲin fite ninnge ng’ɔ yili be’n be nun. An bo VIDEO’N. Kpɛkun an kanngan Rɔmunfuɛ Mun 1:20 nun, i sin’n an koko kosan yɛ’n i su yalɛ:
-
?Zoova i nzuɛn benin yɛ i ɲin fite ninnge ng’ɔ yili be’n be nun-ɔn?
SRAN WIE’M BE WAAN: “E kwlá wunman Ɲanmiɛn, ɔ maan e kwlá simɛn i.”
-
?A bu ndɛ sɔ’n i sɛ?
-
?Ngue ti-ɔ?
NDƐ’N I KPƆLƐ BOLƐ
Zoova ti aolia nun sran. I nzuɛn’n yo ɲɛnmɛn. I nzuɛn cinnjin kpafuɛ’n yɛle klolɛ’n.
Ndɛ’n i nun flanlɛ
-
?Ngue ti yɛ e kwlá wunman Zoova-ɔ?
-
?Ngue yɛle Ɲanmiɛn i wawɛ’n?
-
?Zoova i nzuɛn’n ti sɛ? ?A kwla yiyi nun kan?
NDƐ WIE MUN EKUN
Zoova i nzuɛn nnan mɔ be kwla uka ɔ naan w’a si i kpa’n.
“?Ɲanmiɛn i nzuɛn’n ti sɛ?” (Sasafuɛ Tranwlɛ’n, afuɛ 2019 No. 1)
Biblu’n kle weiin kɛ Zoova nunman lika kwlaa.
Like nga ti yɛ Biblu’n flɛ Ɲanmiɛn wawɛ’n kɛ Ɲanmiɛn i sa’n.
Laa’n, aɲinsifuɛ kun lafiman su kɛ i ndɛ lo Ɲanmiɛn. Sanngɛ ɔ wa kacili i akunndan’n.
“Siɛn’n, n si kɛ n kwla uka min wiengu mun” (Sasafuɛ Tranwlɛ’n nun ndɛ)
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
