FARKARKOR 07
Yahwe Ima Imnis Rariso?
Kwara ido, Allah Yahwe ima imnis rariso? Sia soḇe Manseren Allah ima ikaki syadi ma isren kaku, inja snonggaku koine na kopok kofanam yoḇ I ḇa. Sia wer soḇe ima samambraḇ ḇeba kaku raris wamdoḇer ya. Ḇape ḇekaku ya, Allah Yahwe ima imnis rariso? Yahwe manggundi ikofenḇair ḇe ko rari-rari ḇepyum Ḇyena ro Refo ya. Refo fyasnaiḇair kako snar Manseren Allah iswar kaku ko.
1. Rosai ḇefnai fa Manseren Allah ima kopok komam I ḇa?
’Allah ima Rur rirya’. (Yohanes 4:24) Yahwe dakna baken raris snonggaku koine ḇa. Yahwe ima rur rirya ma ikenem ro nanggi, iso moḇ kopok komam na ḇa.
2. Yahwe rari-rari Ḇyenama rosai monda?
Koma kopok komam Yahwe I ḇa, mboi ima isya kaku. Komambir Yahwe I ma kofawi rari ḇepyum Ḇyena kada, na komarisen kofanam yoḇ I. Refo ya doḇe, ”Yahwe ima imarisen faro roi ḇenapes ya, ma ipok ibur snonggaku ḇesoasuser Ḇyesi ḇa.” (Mazmur 37:28) Yahwe I kako ’saswar Ḇyedi iba ma ifo kuker sawarwar’, ipyum syadi wer iswar snonggaku ḇekandera sya. (Yakobus 5:11) ”Yahwe fyanam kuker snonggaku ḇesanekar ma snonggaku ḇena raryaḇ ḇa kwar fyaspar si.” (Mazmur 34:18) Rosai kofrur na bisa nafnai fa Yahwe imarisen ḇaido imarisen ḇa. Kokinfir fa kofrur roi ḇeḇye ḇa ido, nari Yahwe fyafko ma imarisen ḇa. (Mazmur 78:40, 41) Imboi kokinfir fa kofrur roi ḇepyum kada, nari Yahwe imarisen.—Kowasya Amsal 27:11.
3. Moḇsa Yahwe fyasnai ima iswar ko rai?
Yahwe rari ḇepon kaku Ḇyediso saswar ya. Refo ya doḇe, ”Allah ikada isaswar.” (1 Yohanes 4:8) Refo ya doḇe Yahwe ima iswar fafaya ko. Irya monda ḇa, Yahwe fyasnai saswar Ḇyena kako ro rosai ifrur na. (Kowasya Farfyar [Kisah] 14:17.) Kokarapan moḇ Yahwe ifrur baken koḇena raya. Byuk samambraḇ ḇe ko fa komam roi ḇesnai farawriwek, korower musik ḇerok pyum, ma kan roḇean ḇeyan pyum na. Imarisen insama kosmai marasrisen ro kenem koḇena.
SWEWAR KAKU WER
Nari kofarkor rosai Yahwe byuk kwar fa byukifrur roi ḇebor ḇepyum na. Nari kawos kako moḇsa Yahwe fyasnai rari-rari ḇepyum Ḇyena rai.
4. Rur ḇesren iso Yahwe samambraḇ ḇeba kaku Ḇyenairi
Raris kobuk koḇramna fa kokfararure, Yahwe byuk rur ḇesren Ḇyeja fa ikfrur rosai imarisen na. Refo ya doḇe rur ḇesren iso Yahwe samambraḇ ḇeba kaku Ḇyena fa byukifrur roi ḇebor kam. Fama, sia sikofen ḇo soḇe rur ḇesren ima dores ro manggundi. Kowasya Lukas 11:13 ma Farfyar 2:17, raimnai kawos fakfuken nane:
-
Mnuk ine doḇe mansei ḇeyor rur ḇesren ro Allah, nari byuk na faro si. Inja kwara kada, rur ḇesren ima Allah dirya ke, ima Allah samambraḇ ḇeba Ḇyenairi? Kwara rarirya kukro?
Yahwe byuk rur ḇesren Ḇyeja fa ikfrur roi ḇebor ḇepyum na. Kowasya Mazmur 33:6 ma 2 Petrus 1:20, 21, raimnai kawos fakfuken ine:
-
Yahwe byuk rur ḇesren Ḇyeja fa ikfrur roi risai?
5. Yahwe rari ḇepyum kaku Ḇyena
Moses fyarmyan faro Yahwe I kuker sne ḇesiper ro swaf kawan kwar, ḇape kyara fyandun kaker fa myambir pyum syadi Manḇefrur ḇyedi. Inja dor ḇe Yahwe I ḇo doḇe, ”Wafnoḇek aya fa yafawi nyan Bena, insama ido yamambir Au.” (Keluaran 33:13) Mura, Yahwe ikofenḇair rari ḇepyum Ḇyena faro Moses i. Kowasya Keluaran 34:4-6, raimnai kawos fakfuken suine:
-
Rari ḇepyum risai monda Yahwe ikofenḇair na faro Moses i?
-
Rari minsai wamarisen syadi ro Yahwe rari Ḇyena?
6. Yahwe ḇyefandun kaku ko
Allah kawasa Ḇyesi ro fafisu naiwara iso snonggaku Ibrani sya. Sḇe si fa sewomen ro sup Masir ma sekandera kaku. Inja, moḇsa Yahwe ḇyaḇir rai fafisu myam marmor kandera sena? Korower AUDIO SEREKAM ma koso ḇaḇewasya ḇyena ro Refo ya, ḇaido kowasya Keluaran 3:1-10. Raimnai kawos fakfuken nane.
-
Raris korower kwar ro fawar ine, moḇsa Yahwe ḇyaḇir rai fafisu myam snonggaku sya sekandera?—Mam mnuk ḇe 7 ma 8.
-
Yahwe imarisen isaramper snonggaku sya ma syambraḇ fa isaramper si ke? Rosai ḇefnai fa kwara radiri?
7. Komam Yahwe rari ḇepyum Ḇyena ro rosai ifrur kwar na
Yahwe fyasnai rari ḇepyum Ḇyena ro rosai ifrur kwar na. Komam VIDIO. Posa kwar ido, kowasya Roma 1:20, raimnai kawos fakfuken ine.
-
Ro Yahwe rari Ḇyena, minsai mam ro fararur Ḇyena?
SIA SOḆE: ”Manseren Allah ima myam kandera yena ḇa.”
-
Moḇsa na kwarem rai?
-
Kwarem rarirya kukro?
FARKARKOR ḆYENA
Yahwe ima kopok komam I ḇa, mboi ima isya kaku. Rari ḇepyum Ḇyena nabore, mboi ḇepon kaku iso saswar ya.
Waswarepen Kaḇer
-
Rosai ḇefnai fa koma kopok komam Yahwe I ḇa?
-
Rur ḇesren ido rosairiri?
-
Rari ḇepyum rosai monda Yahwe nya na?
SWEWAR NABOR WER
Swewar fa mambir pyum Allah Yahwe I kuker wafarkor rari ri fyak ḇepon kaku Ḇyena.
Roi ḇefasnai Yahwe isya ro moḇ nakam naisya ḇaḇeri.
”Manseren Allah Ima Isya ro Moḇ Nakam Ke?” (Fasfas ro situs jw.org)
Mam rosai ḇefnai fa Refo fyasnaiḇair rur ḇesren ḇe Allah ḇramin Ḇyeja.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
