LESEN 07
?Jehova i Olsem Wanem?
?Wanem faswan samting we i kam long tingting blong yu, taem yu tingbaot Jehova God? ?Yu ting se hem i hae tumas mo i stap farawe long yu olsem ol sta blong galaksi? ?O yu ting se hem i olsem wan tanda we i gat bigfala paoa, be i no gat ol fasin blong hem? So, ?Jehova i olsem wanem? Jehova i soemaot ol fasin blong hem tru long Tok blong hem Baebol, mo se hem i intres long yu.
1. ?From wanem yumi no save luk God?
“God hem i Spirit.” (Jon 4:24) Jehova i no gat bodi olsem man. Hem i wan Spirit we i stap long heven, hemia wan ples we yumi no save luk.
2. ?Wanem sam fasin blong Jehova?
Nating se yumi no save luk Jehova, be hem i wan ril Man we i gat ol fasin blong hem. Mo olgeta we oli save hem, oli laekem hem from ol fasin ya. Baebol i talem se: “Jehova i laekem jastis, mo bambae hem i no lego ol man blong hem we oli holemstrong.” (Ol Sam 37:28) Mo tu hem “i lavem man tumas, mo i gat sore,” speseli long ol man we oli stap safa. (Jemes 5:11) “Jehova i stap klosap long olgeta we hat blong olgeta i brok, hem i sevem olgeta we tingting blong olgeta i foldaon.” (Ol Sam 34:18, futnot) ?Mo yu yu save se ol aksen blong yumi oli save afektem Jehova? Man we i jusum blong mekem rabis samting, hem i mekem God i no glad mo i harem nogud. (Ol Sam 78:40, 41) Be man we i mekem samting we i stret, hem i mekem God i glad.—Ridim Ol Proveb 27:11.
3. ?Olsem wanem Jehova i soem se i lavem yumi?
Bigfala fasin blong Jehova, hemia lav. Blong talem stret, “God hem i lav.” (1 Jon 4:8) Jehova i soem lav blong hem tru long Baebol, be i no hemia nomo, hem i soem tru long ol samting we hem i krietem tu. (Ridim Ol Wok 14:17.) Eksampol, tingbaot olsem wanem hem i wokem yumi. Hem i mekem se yumi naf blong luk ol naesfala kala, harem ol gudfala miusik, mo testem ol nambawan kakae. Hem i wantem se yumi enjoem laef.
DIGIM MOA
Faenemaot wanem we Jehova i yusum blong wokem ol nambawan samting. Biaen luk olsem wanem Jehova i soem ol gudfala fasin blong hem mo i talemaot.
4. Tabu spirit—paoa blong God
Yumi yusum han blong yumi blong mekem wok, long sem fasin, Jehova i yusum tabu spirit blong hem. Baebol i soem se tabu spirit i no wan man, be hem i paoa we God i yusum blong mekem ol wok. Ridim Ol Wok 2:17; 6:3, mo tokbaot ol kwestin ya:
-
God i save “kafsaedem” tabu spirit, mo ol man oli save “fulap” long tabu spirit. ?So yu ting se tabu spirit i wan man? ?From wanem yu ansa olsem?
Jehova i yusum tabu spirit blong wokem ol nambawan samting. Ridim Ol Sam 33:6 mo 2 Pita 1:20, 21, mo tokbaot kwestin ya:
-
?Jehova i yusum tabu spirit blong hem long wanem rod bakegen?
5. Jehova i gat ol nambawan fasin
Moses i wan gudfala man we i wosipim God, be hem i wantem savegud long Krieta blong hem moa. Ale Moses i talem long hem se: “Yu tijim mi long ol rod blong yu, nao bambae mi save yu.” (Eksodas 33:13) Blong ansa long Moses, Jehova i soem sam long ol gudfala fasin blong Hem. Ridim Eksodas 34:4-6, mo tokbaot ol kwestin ya:
-
?Jehova i talemaot wanem gudfala fasin blong Hem long Moses?
-
?Weswan long ol gudfala fasin blong Jehova we yu yu laekem moa?
6. Jehova i kea long ol man
Ol man blong God, hemia ol man Hibru, oli bin wok slef long Ijip. ?Jehova i harem olsem wanem taem i luk we oli stap safa? Plei ODIO mo lesin gud, o ridim Eksodas 3:1-10. Biaen tokbaot ol kwestin ya.
-
?Stori ya i soem wanem filing blong Jehova, taem ol man oli safa?—Luk vas 7 mo 8.
-
?Yu ting se Jehova i wantem mo i naf blong halpem ol man? ?From wanem yu ansa olsem?
7. Ol samting raonabaot long yumi, oli soem ol gudfala fasin blong Jehova
Jehova i soem ol gudfala fasin blong hem tru long ol samting we hem i krietem. Plei VIDEO. Biaen ridim Rom 1:20, mo tokbaot kwestin ya.
-
?Wanem ol gudfala fasin blong Jehova we yu luk long ol samting we hem i wokem?
SAM MAN OLI SE: “God i no wan man, hem i jes wan paoa we i stap long evri ples.”
-
?Wanem tingting blong yu?
-
?From wanem yu talem olsem?
SAMARI
Jehova i wan Spirit we yumi no save luk, be hem i gat ol gudfala fasin, speseli lav.
Tingtingbak
-
?From wanem yumi no save luk Jehova?
-
?Tabu spirit i wanem?
-
?Wanem sam gudfala fasin blong Jehova?
FAENEMAOT
Faenemaot ol fo stamba fasin blong Jehova, blong kasemsave moa long hem.
Jekem ol pruf se Jehova i no stap long evri samting.
Traem luk from wanem Baebol i kolem tabu spirit se han blong God.