IRUẸMWI 07

De Aro Ọmwa Ne Jehova Khin?

KPẸRE

De aro ọmwa ne uwẹ roro wẹẹ e Jehova khin? Emwa eso roro ẹre wẹẹ, ọmwa nọ gbe orrirri ẹre Jehova khin kevbe wẹẹ, ọ kakabọ rree ne ima vbene orhọnmwẹ rree ne uhunmwu otagbọn na. Aro vberriọ ẹre uwẹ vbe ya ghee ẹre ra? Ra te uwẹ roro ẹre wẹẹ, emwi kẹkan nọ kakabọ mwẹ ẹtin, vbe na ghee avannukhunmwu ẹre Jehova khin? De aro ọmwa ne Jehova gele khin? E Baibol gi ima rẹn aro ọmwa ne Jehova khin, ọ na vbe tama ima wẹẹ ọ hoẹmwẹ ima.

1. Vbọzẹ ne ima i na sẹtin bẹghe Osanobua?

“Orhiọn ẹre Osanobua khin.” (Jọn 4:24) E Jehova i mwẹ egbe ikpakpa vbe na ghee emwa nagbọn. Ọmwa Orhiọn nọ. Ẹrinmwi ẹre ọ ye; ọna keghi re ehe ne ima i sẹtin bẹghe.

2. De aro ọmwa ne Jehova khin?

Agharhemiẹn wẹẹ ima i bẹghe Jehova, Ọmwa nọ gele rrọọ ne ima gha sẹtin sikẹ, ẹre nọ. E Baibol khare wẹẹ: “E Nọyaẹnmwa hoẹmwẹ emwi nọ gbae, ẹi vbe he emwa ni guobọ ẹre yotọ.” (Psalm 37:28) Ọ wa vbe tohan emwa, katekate emwa ni rri oya rhunmwuda, te irẹn wa “vuọn ne itohan kevbe ẹnina.” (Jems 5:11) E Jehova “sikẹ iran ne agbọn zẹ ọre ẹtin. Ọ vbe miẹn iran hia ne ẹtin . . . fo nẹ fan.” (Psalm 34:18) Uwẹ kue rẹn wẹẹ, emwi ne ima rhirhi ru gha sẹtin ya ẹko rhiẹnrhiẹn e Jehova, ọ gha vbe sẹtin dae vbe ekhọe? Vbe igiemwi, ẹko i rhiẹnrhiẹn e Jehova vbe ọmwa ghaa ru emwi dan. (Psalm 78:40, 41) Sokpan ọmwa ghaa ru emwi esi, ọ ghi gha sẹ ọre ọyẹnmwẹ.—Tie Itan 27:11.

3. De vbene Jehova ya rhie ẹre ma hẹ wẹẹ irẹn hoẹmwẹ ima?

Emwi na wa mobọ rẹn e Jehova yi, ọre ahoẹmwọmwa ọghẹe. Uhiẹn, e Baibol khare wẹẹ, “ahoẹmwọmwa ọre Osanobua khin.” (1 Jọn 4:8) Gberra wẹẹ e Baibol tama ima wẹẹ Osanobua hoẹmwẹ ima, emwi ne Osanobua yi vbe rhie ẹre ma wẹẹ ọ gele hoẹmwẹ ima. (Tie Iwinna 14:17.) Vbe igiemwi, gia ziro yan vbene Osanobua ya yi ima ne emwa nagbọn. Ọ keghi yi ima ne ima sẹtin gha bẹghe ẹmu ughughan ne mose mose, ne ima sẹtin gha danmwehọ ihuan nọ rhiẹnrhiẹn kevbe ne ima sẹtin gha rri evbare nọ rhiẹnrhiẹn. Te Osanobua hoo ne agbọn gha rhiẹnrhiẹn ima.

GUALỌ OTỌ RE SAYỌ

Gia guan kaẹn emwi ne Jehova loo ya ru avbe emwi ọyunnuan nọ ru. Iyeke ọni, a ghi ziro yan vbene Jehova ya gi ima rẹn aro ọmwa ne irẹn khin.

4. Orhiọn nọhuanrẹn—ẹtin ne Osanobua ya winna

Vbene ima ya obọ ima winna, erriọ e Jehova vbe ya ya orhiọn nọhuanrẹn ọghẹe winna. E Baibol gi ima rẹn wẹẹ, orhiọn nọhuanrẹn i re ọmwa, sokpan ẹtin ne Osanobua loo ya winna ẹre nọ. Tie Luk 11:13 kevbe Iwinna 2:17, iyeke ọni, uwa ghi ziro yan avbe inọta na:

Osanobua gha “hihiẹ” orhiọn nọhuanrẹn yan ọmwaikọmwa nọ nọ rẹn. Nọnaghiyerriọ, uwẹ yayi wẹẹ ọmwa ẹre orhiọn nọhuanrẹn khin ra, ra ẹtin ne Osanobua loo nọ? Vbua gu kha vberriọ?

Orhiọn nọhuanrẹn ẹre Jehova loo ya ru avbe emwi ọyunnuan nọ ru. Tie Psalm 33:6 kevbe 2 Pita 1:20, 21, iyeke ọni, uwa ghi ziro yan inọta na:

De emwi eso ne Jehova he loo orhiọn nọhuanrẹn ọghẹe ya ru?

5. E Jehova keghi re ọmwa na hoo na sikẹ

Agharhemiẹn wẹẹ, ukpo nibun ẹre Mosis ya ya ẹkoata ga Osanobua, ọ na ye gha hoo nọ rẹn Osanobua sayọ. E Mosis keghi tama Osanobua wẹẹ: “Tama mwẹ vbene u mwamwa emwi hia hẹ, ne I miẹn ehe na rẹn . . . ruẹ.” (Ẹksodọs 33:13) Ẹre Jehova na ghi gi e Mosis rẹn emwi eso vbekpa irẹn. Tie Ẹksodọs 34:4-6, NW, iyeke ọni, uwa ghi ziro yan avbe inọta na:

De emwi eso ne Jehova tama e Mosis vbekpa aro ọmwa ne irẹn khin?
De nọ ghi yẹẹ ruẹ sẹ vbe odẹ ne Jehova ya ru emwi?

6. E Jehova mwẹ ẹmwẹ ima vbe orhiọn

Eviẹn ẹre Ivbi e Hibru ne eguọmwadia e Jehova ghaa khin vbe otọ Igipt. Vbọ gha ye Jehova hẹ vbe iran rri oya? Kpee RRẸKỌDI na, ne u vbe gha rhie aro lelẹe vbe Baibol ruẹ, ra u ghi tie Ẹksodọs 3:1-10. Iyeke ọni, uwa ghi ziro yan inọta ni lelẹe.

E RRẸKỌDI: Ọ Kegha Da E Jehova Vbe Iran Rri Oya (2:45)

Zẹvbe nọ rre ako ọghe Baibol na, vbọ ye Jehova hẹ vbe emwa ghaa rri oya?—Ghee uviẹn 7 kevbe 8.
Uwẹ yayi wẹẹ e Jehova gele hoo nọ ru iyobọ ne ima ra? Uwẹ yayi wẹẹ ọ gha sẹtin ra? Vbua gu kha vberriọ?