KALANSEN 07
Jehova bɛ cogo di?
Ni i bɛ ka miiri Jehova Ala ko la, a kɛcogoya jumɛn de bɛ na i hakili la? Yala i b’a miiri ko Ala ka bon ani ko a sankɔrɔtalenba don kosɛbɛ, ko a ni an cɛ ka jan iko dugukolo ni dolow cɛ ka jan cogo min na wa? Walima i b’a miiri ko fangaba dɔrɔn de don min kɛcogoya tɛ se ka ɲɛfɔ iko sanpɛrɛn? Jehova bɛ cogo di tiɲɛ yɛrɛ la? Bibulu bɛ Jehova jogow fɔ an ye. A b’a fɔ fana ko Jehova b’a mago don i la.
1. Mun na an tɛ se ka Ala ye?
“Ala ye Ni [Hakilimaa] de ye.” (Yuhana 4:24) Hadamaden farikolo ɲɔgɔn tɛ Jehova la. Hakilimaa don, min bɛ ka ɲɛnamaya kɛ sankolo la, yɔrɔ la, an tɛ se ka a ye yɔrɔ min na.
2. Jehova jogo dɔw ye jumɛnw ye?
Hali ni an tɛ se ka Jehova ye, jogo ɲumanbaw b’a la minnu b’a kodiya a dɔnbagaw ye. Bibulu b’a fɔ ko: “Tiɲɛ ko [walima tilennenya ko] ka di Jehova ye. A tɛ a ka senumaw bila.” (Zaburu 37:28 Bible Senuma, 1961) A fana “ka hinɛ ni a ka ɲumaya ka bon haali”, kɛrɛnkɛrɛnnenya la ka ɲɛsin mɔgɔw ma minnu bɛ ka tɔɔrɔ. (Yakuba 5:11) “Matigi [Jehova] ka surun mɔgɔ dusu kasilenw na, a bɛ mɔgɔ dusu nimisibaatɔ kisi.” (Zaburu 34:19) Yala i b’a dɔn ko an bɛ se ka Jehova nisɔndiya walima ka a dusu kasi wa? Mɔgɔ min b’a sugandi ka ko jugu kɛ, o tigi bɛ Jehova dusu bɔ ani ka a dusu kasi. (Zaburu 78:40, 41 Bible Senuma, 1961) Nka mɔgɔ min bɛ ko tilennen kɛ, o tigi b’a nisɔndiya.—Ntalenw 27:11 kalan.
3. Jehova b’a jira cogo di k’a bɛ an kanu?
Jehova jogow bɛɛ la, min ɲɔgɔn tɛ, o ye kanuya de ye. Bawo “Ala ye kanuya de ye.” (1 Yuhana 4:8) Jehova ye a ka kanuya jira an na, a ma o kɛ Bibulu dɔrɔn sababu fɛ, nka a y’o kɛ a ka fɛn danenw fana sababu fɛ. (Kɛwalew 14:17 kalan.) Misali la, e k’a jateminɛ a ye an da cogo min na. A ye se di an ma ka kulɛri cɛɲumanbaw ye, ka fɔli dumanbaw mɛn ani ka dumuni dumanw diya dɔn. A b’a fɛ an ka ɲɛnamaya diyabɔ.
DƆ FARA I KA DƆNNIYA KAN
An k’a ɲini k’a dɔn Jehova ye baara kɛ ni fɛn min ye ka fɛn kabakomaw kɛ. O kɔ, an b’a lajɛ Jehova y’a jogo ɲumanbaw jira an na cogo min na.
4. Hakili senu—Ala fanga, a bɛ baara kɛ ni min ye
Iko an bɛ baara kɛ ni an bolow ye cogo min na, Jehova fana bɛ baara kɛ ni a ka hakili senu de ye. Bibulu b’a jira ko hakili senu tɛ mɔgɔ yɛrɛ-yɛrɛ ye, nka fanga de don Ala bɛ baara kɛ ni min ye walasa ka fɛnw kɛ. Luka 11:13 ani Kɛwalew 2:17 kalan, o kɔ aw ka baro kɛ nin ɲininkaliw kan:
-
Ala na a ka hakili senu “jigin” mɔgɔw kan minnu b’a deli a fɛ. O la, yala e hakili la, hakili senu ye mɔgɔ yɛrɛ-yɛrɛ de ye wa, walima Ala fanga de don, a bɛ baara kɛ ni min ye wa? Mun na e ko ten?
Jehova bɛ baara kɛ ni a ka hakili senu ye walasa ka fɛn kabakomaw kɛ. Zaburu 33:6 ani 2 Piɛrɛ 1:20, 21 kalan, o kɔ aw ka baro kɛ nin ɲininkali kan:
-
Jehova ye baara kɛ ni a ka hakili senu ye sira minnu fɛ, olu dɔw ye jumɛnw ye?
5. Jogow bɛ Jehova la minnu ko ka di mɔgɔw ye
Musa tun ye Jehova batobaga kantigi ye, nka a y’a ɲini ka a dabaga dɔn koɲuman. O de la Musa y’a fɔ a ye ko: “I ka i cogo jira ne la, walisa ne ka i dɔn”. (Ekisode 33:13) Jehova ye Musa jaabi a kɛtɔ ka a jogo dɔw fɔ a ye. Ekisode 34:4-6 kalan, o kɔ aw ka baro kɛ nin ɲininkaliw kan:
-
Jehova ye a jogo jumɛnw de fɔ Musa ye?
-
Jehova jogo jumɛnw de ko ka di e ye kɛrɛnkɛrɛnnenya la?
6. Jehova b’a janto mɔgɔw la
Ala ka mɔgɔw, ni olu tun ye Heburuw ye, olu tun bɛ jɔnya la Misira. U ka tɔɔrɔw ye mun de kɛ Jehova la? A’ye FƐN LAMƐNTA kɛ a la ani aw ka to ka o tɛmɛsiraw lajɛ aw kɛtɔ k’a lamɛn, walima aw ka Ekisode 3:1-10 kalan. O kɔ aw ka baro kɛ nin ɲininkaliw kan:
-
Nin maana in bɛ mun de jira i la Jehova kɛcogoya kan ka ɲɛsin Hadamadenw ka tɔɔrɔw ma?—Tilayɔrɔdenninw 7 ani 8 lajɛ.
-
Yala e hakili la, Jehova b’a fɛ tiɲɛ yɛrɛ la ka Hadamadenw dɛmɛ wa? Ani yala o kɛli se b’a ye wa? Mun na e sɔnnen bɛ o ma walima mun na e ma sɔn o ma?
7. Fɛn danenw bɛ Jehova jogow jira an na
Jehova b’a jogow jira an na a ka fɛn danenw fɛ. A’ye WIDEYO lajɛ. O kɔ, aw ka Romɛkaw 1:20 kalan ani aw ka baro kɛ nin ɲininkali kan:
-
E ye Jehova jogo jumɛnw de ye a ka fɛn danenw la?
MƆGƆ DƆW B’A FƆ KO: “Ne ma d’a la ko Ala ye mɔgɔ ye ne bɛ se k’a ɲini ka min dɔn.”
-
E dun, e bɛ mun de miiri?
-
Mun na e b’o miiri?
BAKURUBAFƆLI
Jehova ye Hakilimaa de ye an tɛ se ka min ye. Jogo ɲumanba caman b’a la minnu ko ka di mɔgɔw ye, kɛrɛnkɛrɛnnenya la kanuya.
Seginnkanni
-
Mun na an tɛ se ka Jehova ye?
-
Hakili senu ye mun de ye?
-
Jehova jogo dɔw ye jumɛnw ye?
NINNU LAJƐ
Daliluw lajɛ minnu b’a jira ko Jehova tɛ fɛnw bɛɛ kɔnɔ.
A lajɛ kun min na Bibulu bɛ kuma hakili senu ko la iko Ala bolow.
A gɛlɛyara cɛ dɔ ma min ye fiyɛntɔ ye ka d’a la ko Ala b’a kanu. A lajɛ fɛn min y’a hakilina yɛlɛma.