PARLAJARAN 07

Naibata na Sonaha do Jahowa?

PADALAN

Sanggah irimangi ham pasal Naibata Jahowa, aha do na ibayangkon ham? Dong na mangkatahon halani Ia na Markuasa, lang boi hita dohor hu Bani. Dong homa na mangkatahon gogoh tumang Ia tapi lang parduli banta. Sasintongni, Naibata na sonaha do Jahowa ai? Marhitei Bibel ipatugah Ia do sonaha sifat-sifat-Ni, janah ipatugah do homa anggo Ia parduli bamu.

1. Mase Naibata lang boi ididah hita?

“Tonduy do Naibata.” (Johannes 4:24) Lang songon hita, Jahowa ai lang boi ididah, anjaha marianan i surga do Ia.

2. Aha do sifat-sifat ni Jahowa?

Age pe lang boi ididah hita Jahowa, tapi boi do holong uhurta hu Bani anggo itanda hita Ia. Bibel mangkatahon, “Ihaholongi Jahowa do pambahenan na pintor anjaha seng itadingkon Ia halak na setia.” (Psalmen 37:28) Leganni ai, ‘parholong anjaha paridop ni uhur do Jahowa’, tarlobih hubani halak na marsitaronon. (Jakobus 5:11) “Dohor do Jahowa bani halak na maretek ni uhur, anjaha ipaluah Ia do halak na mandolei.” (Psalmen 34:18) Ai ibotoh ham do adong pengaruh ni parlahounta hubani Jahowa? Anggo ihorjahon hita na masambor, pusok ma uhur-Ni. (Psalmen 78:40, 41) Tapi anggo ihorjahon hita na madear, gabe malas ma uhur-Ni.—Basa Podah 27:11.

3. Sonaha Jahowa patuduhkon anggo Ia mangkaholongi hita?

Na sibanggalan humbani sifat ni Jahowa ai ma holong. Bibel mangkatahon, “Naibata ai ma haholongon.” (1 Johannes 4:8) Ipatuduh do holong-Ni marhitei Bibel ampa tompaon-Ni. (Basa Lahoan 14:17.) Umpamani, rimangi ma sonaha Jahowa manompa hita. Ibahen do ase boi hita mangidah marmasam warna na jenges, boi mambogei musik, ampa mandai sipanganon na sodap. Sihol do Ia ase martuah goluhta.

PARLAJARI ROH BAHATNI

Parlajari ma aha do na igunahon Jahowa laho pasaudkon harosuh-Ni. Dob ai, pardiateihon ma sonaha Jahowa patuduhkon sifat-sifat-Ni na jenges.

4. Hagogohon ni Naibata do tonduy na pansing

Usih songon hita manggunahon tangan laho marhorja, sonai homa Jahowa manggunahon tonduy na pansing laho mangkorjahon harosuh-Ni. Bibel mangkatahon tonduy na pansing sedo Naibata, tapi hagogohon-Ni do ai. Basa ma Lukas 11:13 pakon Lahoan 2:17, anjaha ulas ma sungkun-sungkun on:

Anggo ipindo hita tonduy na pansing, “useihonon” ni Naibata do ai hubanta. Jadi anggo boi do tonduy na pansing ibagi-bagi, ai sosok do anggo ai ihatahon Naibata, atap hagogohon-Ni do ai? Mase sonai balosmu?

Igunahon Jahowa do tonduy na pansing laho pasaudkon harosuh-Ni. Basa ma Psalmen 104:30 pakon 2 Petrus 1:20, 21, anjaha ulas ma sungkun-sungkun on:

Aha ma na ibahen Jahowa marhitei tonduy na pansing?

5. Jenges tumang sifat-sifat ni Jahowa

Age pe domma dokah si Musa manombah Naibata, tapi sihol do ia lambin bagas mananda Naibata. Halani ai, ihatahon si Musa ma hu Bani, “Urupi Ham ma ahu laho mambotoh dalan-Mu ase boi hutanda Ham.” (2 Musa 33:13) Jadi ipatugah Jahowa ma sifat-sifat-Ni bani si Musa. Basa ma 2 Musa 34:4-6, anjaha ulas ma sungkun-sungkun on:

Aha do sifat-sifat ni Jahowa na ipatugah-Ni hubani si Musa?
Na ija do sifat ni Jahowa na iharosuhkon ham?

6. Parduli do Jahowa hubanta

Hinan, halak Israel do juakjuak ni Naibata. Ongga do sidea iparjabolon i Masir. Sonaha pangahap ni Jahowa mangidah ai? Tangar ma rokaman AUDIO, atap basa ma 2 Musa 3:1-10. Dob ai, ulas ma sungkun-sungkun on.

AUDIO: Ididah Jahowa do Sitaronon ni Juakjuak-Ni (2:45)

Songon na ipatugah bani rokaman ai, sonaha pangahap ni Jahowa sanggah mangidah sitaronon ni jolma?—Tonggor ma ayat 7 pakon 8.
Anggo iahap ham, ra do Jahowa mangurupi jolma? Mase sonai balosmu?

7. Hita boi mananda sifat-sifat ni Jahowa humbani tompaon-Ni

Marhitei tompaon-Ni ipatuduh Jahowa do sonaha sifat-sifat-Ni. Tonton ma VIDEO, dob ai basa ma Rom 1:20, anjaha ulas ma sungkun-sungkun on.