PELAJAREN 07

Uga kin Situhuna Jahwe e?

MAINKEN

Adi ukurindu kerna Dibata Jahwe, kai nge si bayangkenndu? La nge Ia terdeheri bali bagi bintang-bintang perban luar biasa kel Ia? Ntah bayangkenndu nge Jahwe e bagi sekalak jelma si erkuasa tapi la lit perasanNa? Uga kin situhuna Jahwe e? Arah Pustaka si Badia, ikataken Jahwe man banta uga sipat-sipatNa. Janah ikatakenNa ka maka ermediate Ia man banta.

1. Engkai maka la banci siidah Dibata?

“Dibata e la banci siidah janah Ia i surga.” (Johanes 4:24) Jahwe e labo bagi kita. Adi kita mahluk jasmani, lit daging ras darehta. Tapi Ia sada Pribadi si la teridah si tading i surga, ingan si la banci siidah.

2. Uga nge sipat-sipat Jahwe?

Amin gia Jahwe la banci siidah, Ia tuhu-tuhu lit. Adi sitandai Jahwe, pasti keleng ateta Ia sebap luar biasa kel sipat-sipatNa. Nina Pustaka si Badia, “Keleng ate Jahwe keadilen, labo pagi tadingkenNa pelayanNa si setia.” (Masmur 37:28) “Lembut kel kekelengen Jahwe ras mbelin perkuah ateNa,” khususna man kalak si sangana ngadapi kesusahen. (Jakup 5:11) “Jahwe ndeher ras kalak si getem pusuhna, selamatkenNa kalak si lanai semangat.” (Masmur 34:18) Selain si e, perbahanenta banci mpengaruhi perasan Jahwe. Adi silakoken si la mehuli, Jahwe banci kecewa ras sakit hati. (Masmur 78:40, 41) Tapi adi silakoken si mehuli, meriah ukur Jahwe.—Baca Kuan-kuanen 27:11.

3. Uga cara Jahwe ncidahken maka keleng ateNa kita?

Sipat Jahwe si utama eme kekelengen. Bas Pustaka si Badia ikataken, “Dibata e kekelengen.” (1 Johanes 4:8) Cidahken Jahwe kekelengenNa arah Pustaka si Badia bage pe arah ciptanNa. (Baca Perbahanen Rasul-Rasul 14:17.) Contohna, ukurilah uga Dibata nciptaken kita. BanNa kita banci ngidah erbage warna, mbegiken musik si mejile, ras ngenanami pangan si entabeh. AteNa meriah min siakap ndalani kegeluhenta.

PELAJARI TERBAGESEN

Sibahas kari kai si gunaken Jahwe sanga lakokenNa kai si luar biasa. Sibahas ka kari uga Jahwe ncidahken sipat-sipatNa si luar biasa.

4. Kesah si badia eme kuasa Dibata

Jahwe erdahin alu kesah si badiaNa bali bagi kita erdahin alu tan. Kesah si badia labo sada pribadi, tapi bas Pustaka si Badia ikataken maka kesah si badia eme kuasa Dibata guna ngelakoken kerinana. Bacalah Lukas 11:13 ras Perbahanen Rasul-Rasul 2:17, kenca si e bahas penungkunen enda:

Pasti ‘curcurken’ Dibata kesah si badiaNa man kalak si mindosa. Adi bage cocok nge kapndu ikataken kesah si badia e sada pribadi? Engkai maka bage nindu?

Pake Jahwe kesah si badiaNa guna ngelakoken kerina si luar biasa. Bacalah Masmur 33:6 ras 2 Petrus 1:20, 21, kenca si e bahas penungkunen enda:

Kai saja si ilakoken Jahwe alu kesah si badiaNa?

5. Sipat-sipat Jahwe erban kita takjup

Amin pe enggo ertahun-tahun Musa ngelayani Dibata, tapi perlu denga akapna nandai Dibata terbagesen. Nina Musa man Jahwe, “Ajari min aku kerna dalan-dalanNdu, gelah banci kutandai Kam.” (Keluaren 33:13) Emaka ikataken Jahwe piga-piga sipatNa man Musa. Bacalah Keluaren 34:4-6, kenca si e bahas penungkunen-penungkunen enda:

Kai saja sipat Jahwe si katakenNa man Musa?
Sipat Jahwe si apai si menarikna akapndu?

6. Iperdiateken Jahwe kita kerina

Mbarenda kalak Heber eme umat Dibata. Kalak e pernah jadi budak i Mesir janah mesui kel ate kalak e. Uga nge perasan Jahwe ngidah kalak e? Putar AUDIO janah ikutilah sanga ayat e ibacaken, ntah pe bacalah Keluaren 3:1-10. Kenca si e bahas penungkunen enda.

AUDIO: Iperdiateken Jahwe Kesusahen Kalak e (2:45)

Bagi si iceritaken bas kejadin e, uga nge perasan Jahwe ngidah manusia rate mesui?—Nen ayat 7 ras 8.
Adi menurutndu, merhat nge Jahwe nampati manusia janah ngasup nge Ia ngelakokenca? Engkai maka bage nindu?